جىل باسىنان بەرى 1700-دەن اسا ماڭعىستاۋلىق وسى مۇمكىندىكتى پايدالانىپ, جول قوزعالىسى ەرەجەلەرى بويىنشا ءبىلىمىن تەكسەرگەن.
«ازاماتتارعا ارنالعان ۇكىمەت» مەملەكەتتىك كورپوراتسياسى ماڭعىستاۋ وبلىسى بويىنشا فيليالىنىڭ ديرەكتورى ەربول بايجىگىتتىڭ ايتۋىنشا, ەندى ازاماتتار ەمتيحان الدىندا وزدەرىنىڭ ءبىلىمىن مامانداندىرىلعان حالىققا قىزمەت كورسەتۋ ورتالىقتارىندا تەكسەرە الادى. اۆتو حقو-نىڭ پراكتيكالىق اۆتودرومى اپتانىڭ التى كۇنىندە دە جۇمىس ىستەيدى.
ايتا كەتەتىن جاعداي, ۇمىتكەر ءبىرىنشى رەت جۇرگىزۋشى كۋالىگىن الۋ ءۇشىن ەكى ەمتيحان تاپسىرۋ قاجەت. ءبىرىنشىسى – تەوريالىق ەمتيحان, ول 40 سۇراقتان تۇرادى, ال پراكتيكالىق ەمتيحاندى اۆتودرومدا تاپسىرادى. جۇرگىزۋشى كۋالىگىن الۋدى قالايتىندار ءۇشىن 3 رەتكە دەيىن ەمتيحان تاپسىرۋعا مۇمكىندىك بەرىلەدى. ەگەر ۇشەۋىنەن دە ءساتسىز وتسە, كەلەسى ەمتيحاندى تەك التى ايدان كەيىن تاپسىرۋعا بولادى. سونداي-اق بۇگىندە جۇرگىزۋشى كۋالىگىن العاش الاتىنداردان اۆتومەكتەپتە وقىعانى تۋرالى كۋالىك تالاپ ەتىلمەيدى.
جىلدىڭ باسىنان بەرى 1700-دەن اسا ماڭعىستاۋلىقتار اۆتوماتتاندىرىلعان اۆتودرومدا اۆتوكولىك جۇرگىزۋ قىزمەتتەرىن پايدالانعان. سونىمەن قاتار جىل باسىنان بەرى 16 مىڭنان استام جۇرگىزۋشىگە جۇرگىزۋشى كۋالىگى بەرىلىپ, 86 مىڭعا جۋىق اۆتوكولىك تىركەلدى.
