ايماقتار • 21 قازان، 2019

اقتاۋدا اسسامبلەيا ابايعا ارناپ كەش وتكىزدى

86 رەتكورسەتىلدى

اقتاۋدا وڭىرلىك قازاقستان حالقى اسسامبلەياسى ماڭعىستاۋ وبلىستىق امبەباپ كىتاپحانامەن بىرلەسىپ ۇلى اقىن اباي قۇنانباي ۇلىنىڭ 175 جىلدىعىنا وراي پوەزيالىق كەش وتكىزدى. ءىس-شاراعا ەتنومادەني بىرلەستىك وكىلدەرى، مۇرىن سەڭگىربەك ۇلى اتىنداعى گۋمانيتارلىق كوللەدجىنىڭ ستۋدەنتتەرى، ءارتۇرلى ەتنوس وقۋشىلارى جانە №6656 اسكەري ءبولىمىنىڭ ساربازدارى قاتىستى.

ءىس-شارا بارىسىندا كىتاپحاناشى اسيا نۇتانقىزى شاراعا قاتىسۋشىلاردى اباي شىعارمالارىمەن تانىستىردى. اباي ءومىرى مەن شىعارماشىلىعىنا قىزىعۋشىلىق تانىتىپ جۇرگەن  ستۋدەنتتەر، جاستار اقىننىڭ  ولەڭدەرىن، شىعارمالارىن وقىدى.

ءىس-شارا بارىسىندا سونىمەن قاتار ەتنوس جاستارى وكىلدەرى دە ۇلى اقىن ولەڭدەرىن، شىعارمالارىن جاتقا وقىدى. ابايدىڭ ءوزى «ادامزاتتىڭ ءبارىن ءسۇي، باۋىرىم دەپ» دەپ ايتىپ كەتكەنىندەي مۇنداي ءىس-شارالار قازاقستان حالقىن ىنتىماققا، دوستىققا، بىرلىككە شاقىرادى.

كەش بارىسىندا اقتاۋ قالاسىندا مەرزىمدى اسكەري بورىشىن وتەپ جۇرگەن - №6656 اسكەري ءبولىمىنىڭ ساربازى تولەۋتاي انسار ۇلى اقىنعا ءوزىنىڭ جۇرەكجاردى ولەڭىن وقىدى:

 

قاعىپ تۇرىپ مايىن ىشكەن قارا ءسوزدىڭ،
قاھارلى قيىندىقتىڭ ءبارىن ءتوزدىڭ.
الاش دەدىڭ ارعىماققا مىنگەن بويدا،
بويىمىزعا رۋح سىيلاعان بابا ءسوزىڭ.

دارحان دالام ءوزىڭدى ىزدەپ ازىنايدى،
ۇلتىڭ نەگە رۋحسىزدانىپ قالجىرايدى،
بىرەۋلەردىڭ جەتەگىندە كەتپەۋ ءۇشىن،
نامىستىڭ ارقاسىندا تاپجىلمايدى.

ءبىلىمدى ىزدەيتىندەر سيرەك بوپ تۇر،
ىستەگەنى راقىمسىز ب ۇلىك بوپ تۇر.
ارتىڭدا قالعان مىنا ۇرپاعىڭا،
اباي اتا اقىلىڭ كەرەك بوپ تۇر.

قارا ءسوزىڭ تۇنىپ تۇرعان تاربيەگە،
ءۇنىڭ سىنسىپ تۇرعانداي جان دۇنيەمدە.
اقىن بابا سەن سالعان دارا جولىڭ،
وشكەن جوق، شارىقتاپ تۇر ءالى كۇنگە.

الاش سەنى دانا دەگەن، دارا دەگەن،
ولەڭدەرىڭ وقىعانعا سانا بەرگەن.
اباي اتا، وزىڭىزگە مىڭ راحمەت،
حالقىڭا يمان نۇرىن الا كەلگەن.

ايىمىزدا تۋىپ كەلەدى جاڭا-جاڭا،
كۇن كەشكەن جوق ءشول باسقان ساحارادا
حالقىڭا نامىس بەرگەن، رۋح سىيلاعان،
قازاقتى ايگىلى ەتكەن اباي دارا.

ۇلى ابايعا ارنالعان پوەزيالىق كەش سوڭىندا اقىننىڭ ولەڭىن، شىعارمالارىن وقىعان جاستار العىس حاتتارمەن ماراپاتتالىپ، ەڭ جاقسى وقىعاندارعا وڭىرلىك اسسامبلەيانىڭ اتىنان سىيلىقتار تابىستالدى.

سوڭعى جاڭالىقتار

كۇلكى كەرۋەنى № 16

رۋحانيات • كەشە

اقىنعا ارنالعان كۇن

رۋحانيات • كەشە

باسپانامەن قامتيتىن باستى قۇجات

باعدارلامالار • كەشە

بولمىسى ءبۇتىن باعاەۆ

رۋحانيات • كەشە

ۇقساس جاڭالىقتار