جاقسىلىق جاساۋدى ماقسات ەتكەن شارانى باي-باقۋاتتى ادامدار مەن جۇرەگى جۇمساق جاندار قولداپ اكەتتى. تۇراقتى مەكەنجايى جوق ادامدارعا قولداۋ كورسەتۋ ماقساتىنداعى ءىس-شارا تالاي جاننىڭ جۇرەگىن شاتتىققا, ءجۇزىن قۋانىشقا بولەدى.
ماڭعىستاۋ وبلىستىق ءماسليحاتىنىڭ دەپۋتاتى اببات ورىسباەۆ, «CRUZ Logistics» جاۋاپكەرشىلىگى شەكتەۋلى سەرىكتەستىگى باتىس قازاقستان ءوڭىرى بويىنشا ديرەكتورى حيتەش چاندرا, جاس كاسىپكەرلەر ايگەرىم ايتباتىروۆا جانە شولپاناي سماعۇلوۆا جالعىزباستى زەينەتكەرلەر مەن تۇراقتى مەكەنجايى جوق ادامدارعا كومەك قولىن سوزدى.
ەرىكتى توپ الدىمەن ەكىنشى توپتاعى مۇگەدەك ولگا گولوۆكوۆانىڭ ۇيىنە بارىپ, قاجەتتى زاتتار تابىستادى. بۇگىندە سەكسەننىڭ سەڭگىرىنە شىققان ولگا الەكسەەۆنانىڭ قۋانعانى سونشالىق, كوز جاسىنا ەرىك بەردى. وعان گۇل شوقتارى, ازىق-ت ۇلىك, «زەرە» تىگىن شەبەرحاناسىندا تىگىلگەن توسەك-ورىن جابدىعىنىڭ جيىنتىعى تابىستالدى.
سودان سوڭ كوشە كەزىپ, ءۇيسىز جۇرگەن جاندارعا ىستىق تاماق ۇلەستىرىلدى. ولاردىڭ باسىم بولىگىنىڭ قاي اۋماقتاردا جۇرەتىندەرى بەلگىسىز, بىراق كوشەدە كەزدەسكەندەردىڭ ەشقايسىسى نازاردان تىس قالمادى. بۇگىنگى شارانى ۇيىمداستىرۋشىلار, اش جۇرگەن جاندارعا قايىرىمدىلىق كورسەتكەن ساۋاپتى ءىس دەپ بىلەتىندەرىن ايتادى جانە سانالى ادامدار بوس ۋاقىتتارىن پايدالى ىسكە جاراتقانى ماڭىزدى دەپ سانايدى. «كەز كەلگەن ساۋاپتى ءىس ءاربىر ازاماتتى, اسىرەسە جاستاردى مەيىرىمدىلىككە جانە ءار نارسەگە جاناشىرلىق تانىتۋعا تاربيەلەيدى» دەيدى ا.ورىسباەۆ.
«ادامنىڭ كۇنى – اداممەن» دەگەن وسى...
ماڭعىستاۋ وبلىسى
