ماڭعىستاۋدا اۋىل ايەلدەرىنىڭ وبلىستىق فورۋمى ءوتتى

-بۇگىن مىنە اۋىل ايەلدەرى فورۋمىن 14-ءنشى وبلىستا وتكىزۋگە كەلىپ وتىرمىز. جالپى مەملەكەت ساياساتىنداعى ماڭىزدى تاقىرىپتىڭ ءبىرى ول اۋىلدىڭ تۇراقتى دامۋى جانە اۋىل تۇرعىندارىنىڭ تابىسىن ارتتىرۋ بولىپ تابىلادى. بۇگىنگى فورۋمدا اۋىل ايەلدەرىنىڭ كاسىبىن دامىتۋ ءۇشىن قانداي ادىستەر قولداندى؟ قارجى ماسەلەسى قالاي شەشىلدى؟ مەحانيزمدەر قانداي؟ دەگەن سۇراقتاردى كەڭىنەن تالقىلاپ, تاجىربيە الماستى, دەدى پرەزيدەنت جانىنداعى جاسىل ەكونوميكاعا ءوتۋ كەڭەسىنىڭ مۇشەسى سالتانات راقىمبەكوۆا

اۋىل ايەلدەرىنىڭ فورۋمى 2008 جىلى بىرىككەن ۇلتتار ۇيىمى اسسامبلەياسىنىڭ باستاماسىمەن, 15-قازان حالىقارالىق اۋىل ايەلدەرىنىڭ كۇنى اياسىندا جۇزەگە اسىرىلىپ كەلەدى. الداعى ۋاقىتتا ىسكەر ايەلدەردىڭ ءوڭىر ەكونوميكاسىنا قوسىپ وتىرعان ۇلەسىمەن, جەتىستىككە جەتكەن تاريحىن كەڭ كولەمدەگى كىتاپ قىلىپ شىعارۋ جوسپارلانۋدا.

-اۋىل ايەلدەرىنىڭ ماڭعىستاۋ وبلىسىنداعى فورۋمى عاجاپ دۇنيە دەپ ەسەپتەيمىن. بۇل ءوڭىر ەجەلدەن قايماعى بۇزىلماعان, ۇلتتىق ءداستۇرى ساقتالعان, وزىندىك ۇستانىمى بار تاماشا ءوڭىر. ءبىز تۋراسىنا كەلسەك قازىر قالاعا كوبىرەك كوڭىل بولدىك. ال دالامەن قالانىڭ اراسىن جاقىنداتۋ ول تەك اۋىلداعى ايەلدەردى قولداۋ عانا ەمەس, ءومىردى جاقسارتۋ ءۇشىن بولىپ جاتقان دۇنيەلەر. ونىڭ ارعى جاعىن الىپ قارايتىن بولساق, ۇلتتىق مۇددە, رۋحاني ءوسۋ, وتباسىلىق قۇندىلىقتار جاتىر. وسى رەتتە مەن قازاق ايەلىن ۇلكەن كۇش دەپ ايتار ەدىم, دەدى پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ مۇشەسى قاراكوز سۇلەيمەنوۆا.

شىلدە ايىندا باستاۋ العان فورۋمعا ەلىمىزدىڭ ءار ايماعىنان 2700  ايەل ازاماتتار قاتىسىپ, 85- كە جۋىق ىسكەر ايەلدىڭ جەتىستىك تاريحى ايتىلدى. بۇگىنگى كۇنى اۋىلدىڭ تۇراقتى دامۋىنا قانداي ىقپال جاسالىپ وتىر؟ ۇكىمەت تاراپىنان قانشا باعدارلاما ىسكە اسىرىلۋدا؟ كاسىپتى قالاي, نەدەن باستاۋ قاجەت, قاي جاعىنان كەلۋ كەرەك دەگەن ماسەلەلەر وسى فورۋمدا ءسوز بولدى. 

ايتا كەتەيىك, 7-8 قاراشا كۇندەرى II رەسپۋبليكالىق اۋىل ايەلدەرىنىڭ فورۋمى نۇر-سۇلتان قالاسىندا وتپەك. وعان ءار وبلىستان 15 دەلەگات قاتىسادى دەپ كۇتىلۋدە.