وسى ورايدا ءىس باستايمىن دەگەن شەبەرلەردى قولداپ, اياعىنان تۇرعىزۋعا تىرىساتىن, سونداي-اق كوپ بالالى انالار مەن از قامتىلعان ايەلدەردىڭ جەكە ءىسىن جۇرگىزۋگە, ءوز مۇمكىندىكتەرىن دامىتۋىنا جانە ۇلتتىق قولونەردى ناسيحاتتاۋعا كومەكتەسەتىن الەۋمەتتىك جوبا – «كورپە Fest» مەگا-فەستيۆالىنىڭ ماڭىزى زور.
العاش تۇساۋىن نۇر-سۇلتان قالاسىندا كەسكەن فەستيۆال وڭىرلەردەگى جۇمىسىن اقتاۋ قالاسىنان باستادى. ەلىمىزدىڭ ەڭبەك جانە حالىقتى الەۋمەتتىك قورعاۋ مينيسترلىگى مەن ماڭعىستاۋ وبلىسى اكىمدىگىنىڭ ۇيىمداستىرۋىمەن وتكەن فەستيۆال اياسىندا وقىتۋ سەمينارلارى, تىگىن جانە قولدانبالى ونەر بويىنشا ساباقتار وتكىزىلدى, الەۋمەتتىك جەلىلەردە بيزنەس جۇرگىزۋ بويىنشا شەبەرلىك سىنىپتارى مەن كورمەلەر ۇيىمداستىرىلدى.
شارا اياسىندا تانىمال ەتنوديزاينەر, «التىن ساپا» سىيلىعىنىڭ لاۋرەاتى ىرزا تۇرسىنزادانىڭ قولونەرشى ءىزباسارلارى دايىنداعان بۇيىمدار جارمەڭكەسى ءوتتى. سونىمەن قاتار «انالار اماناتى» دەرەكتى سەريالىنان فيلم كورسەتىلىپ, وندا «مادەني مۇرالار مەن ۇلتتىق قولونەردى جاڭعىرتۋ» الەۋمەتتىك جوباسى تۋرالى ايتىلدى.
ىرزا تۇرسىنزادا مەن ونىڭ شاكىرتتەرى ماڭعىستاۋ وبلىسىنىڭ تاريحي ورىندارى بويىنشا ەكسپەديتسيا ۇيىمداستىرىپ, ولار «بەكەت اتا» مەشىتىنە ءوز قولدارىمەن تىگىلگەن جاستىقتار, كورپەلەر, ۇلتتىق ناقىشتاعى جامىلعىلار سىيلادى. ء«ولى رازى بولماي, ءتىرى بايىمايدى» دەيتىن حالقىمىزدىڭ بابالار رۋحىن قاستەرلەيتىن قالپىنا ساي جاسالعان سىيلىقتار ەندى مەشىتكە كەلگەن جاماعاتتىڭ قاجەتىنە جارايتىن بولادى.
سونداي-اق ەلىمىزدىڭ ءتول مادەنيەتىنىڭ دامۋىنا زور ۇلەس قوسىپ جۇرگەن باتىر انالارعا «امانات» قوعامدىق قورى اتىنان سىيلىق, ەڭ وزىق تىگىنشىلەرگە ماڭعىستاۋ وبلىسى اكىمدىگى مەن «تىگىن ماشينالار ءۇيى» اتىنان بارلىعى وتىز تىگىن ماشيناسى, قارجىلاي سەرتيفيكاتتار مەن العىسحاتتار تابىستالدى. ال قىز-كەلىنشەككە ارنالعان ەڭ ادەمى كويلەك تىككەن قاتىسۋشىعا ارناپ اۆتورلىق ديزايندا جاسالعان ماتالار سىيلىققا تاپسىرىلدى.
