كەلەسى جىلى وتەتىن ەۋروپا چەمپيوناتىنىڭ ىرىكتەۋ كەزەڭى باستالعاندا جەرلەستەرىمىز العاشقى كەزدەسۋىندە فيفا رەيتينگىندە توپ-50 قۇرامانىڭ قاتارىندا تۇرعان شوتلانديانى 3:0 ەسەبىمەن جەڭىپ, ايدى اسپانعا ءبىر-اق شىعارعان-دى. كەيىنگى كەزدەسۋلەرىندە بەلگيا جانە رەسەي قۇرامالارىنا ءىرى ەسەپپەن ەسە جىبەرسە دە, جانكۇيەرلەردىڭ بۇل جەڭىسكە قابىرعاسى قايىسا قويعان جوق. ويتكەنى ءبىرىنشىسى الەمدىك رەيتينگتە كوش باستاپ تۇرعان قۇراما بولسا, ەكىنشىسى بىلتىر عانا ءوز جەرلەرىندە فۋتبولدان الەم چەمپيوناتىن ۇيىمداستىرىپ, جارتىلاي فينالعا دەيىن جەتكەن بولاتىن. سونداي-اق ەكى قۇراما دا ءاۋ باستا ءبىزدىڭ توپتىڭ نەگىزگى فاۆوريتتەرى ەدى. 6-تۋردان كەيىن اتالعان ەكى قۇرامانىڭ ەۋروپا چەمپيوناتىنىڭ فينالدىق كەزەڭىنە شىققانى بەلگىلى بولدى.
قازاقستاندىق فۋتبول جانكۇيەرلەرى وتانداستارىمىزدىڭ بۇعان دەيىنگى جەڭىلىستەرىنە كەشىرىممەن قاراپ, الداعى ويىنداردان جەڭىس كۇتكەن بولاتىن. الايدا قۇرامانىڭ ەلورداداعى «استانا ارەنا» ستاديونىندا كيپردەن جەڭىلگەنى جانكۇيەرلەردىڭ كوڭىل كۇيىن ءتۇسىردى. ونى الەۋمەتتىك جەلى قولدانۋشىلارىنىڭ جازبالارىنان-اق انىق بايقاۋعا بولادى. سىرت الاڭدا تەڭ ويناپ كەلگەن قۇرامامەن ءوز الاڭىمىزدا, ءوز جانكۇيەرلەرىمىزدىڭ قولداۋىمەن وتكەن كەزدەسۋدە جەڭىپ تۇرىپ, جەڭىلۋى ۇيات, ارينە. جەڭىپ تۇرعان ويىندا جەڭىلىسكە ۇشىراۋ, كىم-كىمگە بولسا دا وڭاي ەمەس.
ماتچتىڭ العاشقى مينۋتىندا-اق باسىمدىققا يە بولعان وتانداستارىمىز قارسىلاس كوماندانىڭ قاقپا ماڭايىندا بىرنەشە قاۋىپتى شابۋىل ۇيىمداستىردى. ءبىرىنشى تايمنىڭ وزىندە يسلامبەك قۋاتتىڭ گول سوعاتىن 100 پايىزدىق ەكى بىردەي مۇمكىندىگى بولدى. الايدا ەكەۋىندە دە دوپتى قاقپاعا ەنگىزە المادى. سونداي-اق شابۋىلشى توقتار جانعىلىشباي دا ءوز مۇمكىندىگىن ءتيىمدى پايدالانا العان جوق. وسىلايشا جەرلەستەرىمىز گول سوعاتىن ءۇش بىردەي مۇمكىندىكتى جۇزەگە اسىرا المادى. ابىروي بولعاندا 34-مينۋتتا قورعاۋشى تەمىرلان ەرلانوۆ ەسەپ اشىپ, جانكۇيەر كوڭىلىن شات-شادىمان قىلدى. ەكىنشى تايمنىڭ العاشقى 25-مينۋتىن شابۋىلمەن وتكىزگەن فۋتبولشىلارىمىز 11-مينۋتتىڭ ىشىندە ەكى گول وتكىزىپ الدى. جەڭىپ تۇرعان ماتچتا جەڭىلە سالۋ قازاق جانكۇيەرلەرىنە اۋىر ءتيدى. البەتتە, كوماندانىڭ جەڭىلىسىنە ءبىرىنشى كەزەكتە چەح مامانى ميحال بيلەك جاۋاپ بەرەتىنى انىق. الايدا ماتچتان كەيىن وتاندىق باق وكىلدەرىنە سۇحبات بەرگەن يسلامبەك قۋات بۇل كەزدەسۋدەگى بار جاۋاپكەرشىلىكتى ءوز موينىنا الاتىنىن ايتقان.
كلۋبتىق دەڭگەيدەگى ەۋرودودا ويىندارىندا كيپردىڭ اپوەل كومانداسى قازاقستانعا ءۇش رەت كەلدى. ۇشەۋىندە دە ەلوردانىڭ «استانا» كومانداسىمەن كەزدەسكەن اپوەل فۋتبولشىلارى بارلىق ماتچتا جەڭىلىپ, ءوز ۇيلەرىنە ۇپايسىز ورالعان بولاتىن. ال كيپر قۇراماسى ەلىمىزگە العاش رەت كەلسە دە ءۇش ۇپايدى وپ-وڭاي يەلەنىپ, ەلدەرىنە جەڭىسپەن ورالدى.
وسىمەن قازاقستان – كيپر قۇرامالارى ءتورتىنشى رەت جاسىل الاڭدا جولىقتى. ءۇش كەزدەسۋدە كيپر فۋتبولشىلارى باسىم تۇسسە, ءبىر ويىن تەڭ ەسەپپەن اياقتالعان. ەڭ العاش ەكى كوماندانىڭ جولى 2004 جىلعى حالىقارالىق تۋرنيردە ءتۇيىسىپ, كيپردە وتكەن باسەكەدە الاڭ يەلەرى 2:1 ەسەبىمەن جەڭىسكە جەتكەن. اراعا 13 جىل سالىپ ەكى قۇراما 2017 جىلى جولداستىق كەزدەسۋ وتكىزدى. بۇل ويىندا دا كيپر قۇراماسى 3:1 ناتيجەسىمەن باسىم تۇسكەن-ءدى. ال وسىدان تۋرا ءبىر اي بۇرىن ەكى قۇراما ەۋروپا چەمپيوناتىنىڭ ىرىكتەۋ كەزەڭىندە قايتا جولىعىپ, وتانداستارىمىز العاش رەت قارسىلاس كوماندامەن تەڭ ويناعان-دى. مىنە, كۇنى كەشە ءۇشىنشى رەت كيپر قۇراماسىنا جول بەردىك.
بۇل جەڭىلىستەن سوڭ قازاقستان قۇراماسى I توبىندا 7 ۇپايمەن 4-ورىنعا ءتۇسىپ قالسا, كيپر فۋتبولشىلارى 10 ۇپايمەن 3-ورىنعا كوتەرىلىپ الدى.
