رۋحانيات • 09 قازان، 2019

ۆاشينگتوندا قازاق قولونەرىنىڭ تاريحىنا ارنالعان سيمپوزيۋم ءوتتى

90 رەتكورسەتىلدى

ۆاشينگتونداعى ۇلتتىق ساۋلەت مۋزەيىندە «قازاقستاننىڭ ساندىك-قولدانبالى ونەرى جانە كرەاتيۆتىك ەكونوميكا» اتتى سيمپوزيۋم ءوتتى. الەمدەگى الدىڭعى قاتارلى مۋزەيلەردىڭ ءبىرى سميتسون ينستيتۋتىنىڭ ماماندارى جانە ءا. قاستەەۆ اتىنداعى مەملەكەتتىك ونەر مۋزەيىنىڭ  جەتەكشى عالىمدارى مەن زەرتتەۋشىلەرى بايانداما جاساعان ونەر جارمەڭكەسى اقش-تاعى قازاقستان ەلشىلىگىنىڭ قولداۋىمەن جۇزەگە اسىپ وتىر.

ءوزىنىڭ باستاۋ بۇلاعىن كوشپەلى ساق مادەنيەتى مەن ۇلى جىبەك جولىنان الاتىن قازاق حالقىنىڭ ساندىك-قولدانبالى ونەرى مەن قول ونەر بۇيىمدارى الەم ەلدەرىنەن كەلگەن مۋزەي قاۋىمداستىعىنىڭ قىزىعۋشىلىعىن وياتتى. ءا.قاستەەۆ اتىنداعى ونەر مۋزەيىنىڭ قورىندا  مۇراجاي قىزمەتكەرلەرىنىڭ بىرنەشە بۋىنى ەلىمىزدىڭ ءتۇرلى وڭىرلەرى مەن قازاق دياسپورالارى تۇراتىن شەت ەلدەردەن جىلدار بويى جيناعان، زەرتتەگەن قازاق ساندىك-قولدانبالى ونەرىنىڭ قوماقتى كوللەكتسياسى ساقتالعان. بۇل تۇرعىدا اتالمىش ونەر ۇجىمى مونوگرافيالار، ماقالالار مەن كوركەمسۋرەت البومدارىن جاريالايتىن، قازاق ونەرىن ىندەتە زەرتتەيتىن الدىڭعى قاتارلى عىلىمي ورتالىقتاردىڭ ءبىرى ەكەنىن ايتا كەتكەن ءجون.   

– ەكى مۋزەي بىرنەشە بىرلەسكەن جوبانى تابىستى اتقاردى. «قازاقستاننىڭ ساندىك-قولدانبالى ونەرى جانە كرەاتيۆتىك ەكونوميكا» سيمپوزيۋمى الەمدەگى قازاقتىڭ حالىقتىق قولدانبالى ونەرىن دامىتۋ جونىندە «رۋحاني جاڭعىرۋ» باعدارلاماسىنداعى ماڭىزدى وقيعا بولىپ وتىر. سيمپوزيۋم Craft2Wear Show كورمەسى مەن قازاقستان قولونەرشىلەر وداعىنىڭ «قازاقستان: ءتاڭىر جانى» قازاق ونەرى اياسىندا ءوتتى. سميتسون ينستيتۋتىنىڭ ايەلدەر كوميتەتى جىل سايىن ۇيىمداستىراتىن ساندىك-قولدانبالى ونەر شوۋى بەدەلدى قولدانبالى ونەر الاڭى بولعاندىقتان، اقش پەن الەمنىڭ تاماشا سۋرەتشىلەرى مەن ديزاينەرلەرىنىڭ جۇمىستارىن ەكسپوزيتسيالايدى، – دەيدى پروفەسسور گۇلميرا شالاباەۆا. 

الەم مادەنيەتىنىڭ ۇزدىك ونەرتانۋشىلارى باس قوسقان جيىندا قازاقتىڭ ساندىك-قولدانبالى ونەرىنىڭ ايرىقشا قىرلارىن اشاتىن «قازاق كىلەمدەرى – ۇلتتىق مادەني مۇرانىڭ بىرەگەي بولىگى»، «قازاقستان كەسكىندەمەسىندەگى كوشپەلى وركەنيەت وبرازدارى»، «زاماناۋي قازاق قولدانبالى ونەرىندەگى جانە ديزاينىنداعى ەجەلگى سيمۆولدار»، «قازاقستاننىڭ حالىقتىق جانە زاماناۋي زەرگەرلىك ونەرىندەگى كوشپەندىلەردىڭ مادەني داستۇرلەرى»، « ۇلى دالا قازىنالارى: قازاق تۋتانحامونى» تاقىرىپتارىندا وقىلعان باياندامالار  امەريكانىڭ عىلىمي قوعامداستىعىنا ۇلى دالا وركەنيەتىمەن تەرەڭىرەك تانىسۋعا مۇمكىندىك بەردى. سميتسون ينستيتۋتىنىڭ عالىمدارى  پول مايكل تەيلور، دجاسپەر ۆو-كۆوزەبارت، روبەرت پونتسيوەن، سۋپاماس سنيتۆونگزە، ينيگو اكوستا جانە دجارەد كوللەر قازاقستاندىق ارىپتەستەرمەن پىكىرتالاسقا ءتۇسىپ، ساندىك-قولدانبالى ونەردى سالىستىرمالى تالداۋدىڭ ۇلگىلەرىن كورسەتتى.

سيمپوزيۋمدى ۇيىمداستىرۋشى، ازيانىڭ مادەني تاريحىن زەرتتەۋ باعدارلاماسىنىڭ ديرەكتورى، دوكتور پول مايكل تەيلور: «بۇل سيمپوزيۋم داستۇرلەردى جاقىنداستىرىپ، وزىق مادەنيەتتەردى ءبىر ارنادا توعىستىراتىن الاڭ. جاھاندىق ونەرتانۋشىلار ءۇشىن قازاقستاننىڭ ساندىك-قولدانبالى ونەرىن زەرتتەۋگە جاڭا مۇمكىندىكتەر تۋدىرىپ وتىر» دەپ اتاپ ءوتتى.

«تۇڭعىش پرەزيدەنتىمىز – ەلباسى ن.ءا. نازارباەۆتىڭ « ۇلى دالانىڭ جەتى قىرى» ماقالاسىندا ايتىلعانداي، دالالىقتار ەجەلگى داۋىردە كيىمدەر مەن باسقا دا ءتۇرلى زاتتاردى  جاساۋ ءۇشىن تەرىدەن، كيىزدەن، ءجۇن مەن زىعىردان ازىرلەنگەن ماتەريالداردى پايدالاندى. دالا وركەنيەتىنىڭ قورشاعان الەممەن جانە تابيعاتپەن ۇيلەسىمى زاماناۋي قولدانبالى ونەر ەلەمەنتتەرىندە دە كورىنىس تاپتى. قازاقستاننىڭ سيمۆولدارىنىڭ ءبىرى – بارىس – وسىنىڭ ايعاعى. «رۋحاني جاڭعىرۋ»  باعدارلاماسىن جۇزەگە اسىرۋ اياسىندا اتاۋلى شارا ۇلى دالانىڭ دۇنيەتانىمى مەن حالىقتىق قۇندىلىقتاردىڭ، ءبىزدىڭ بابالارىمىزدىڭ تاريحي شەجىرەسىنىڭ ءبىر بولشەگى»،- دەدى ايتۋلى شاراعا قاتىسقان اقش-تاعى قازاقستاننىڭ توتەنشە جانە وكىلەتتى ەلشىسى ەرجان قازىحانوۆ.

سوڭعى جاڭالىقتار

ۇقساس جاڭالىقتار