كارىپبەك كۇيىكوۆ قاراعاندى وبلىسىنىڭ سەمەي يادرولىق پوليگونىنىڭ ماڭىنداعى ەگىندىبۇلاق اۋىلىندا دۇنيەگە كەلگەن. قانشاما جاندى قان قاقساتقان زۇلماتتىڭ زاردابىن ءبىر كىسىدەي تاتقان سۋرەتشى بۇل تاقىرىپتى ءوز شىعارماشىلىعىنىڭ وزەگىنە اينالدىردى. «العاشقى جارىلىس» تۋىندىسىندا تۋىندىگەر كۇيىپ كەتكەن دالانىڭ ورتاسىندا كوككە قاراي كوتەرىلگەن جان تۇرشىگەرلىك يادرولىق ساڭىراۋقۇلاقتى بەينەلەيدى. ونىڭ كەيىنگى بارلىق تۋىندىلارى دا وسى تاقىرىپتى تەرەڭنەن قاۋزاعان.
ءا.قاستەەۆ اتىنداعى ونەر مۋزەيىندە الەمدىك انتييادرولىق قوزعالىستىڭ بەلسەندىسى, حالىقارالىق «اتوم» جوباسىنىڭ قۇرمەتتى ەلشىسى اتانعان قىلقالام شەبەرىنىڭ جەكە كورمەسى اشىلدى. ەكسپوزيتسياعا ءار جىلدارى سالىنعان 50 كارتينا قويىلعان.
– بۇگىن قانداي دا ءبىر جەتىستىككە جەتسەم, ول ءبىرىنشى كەزەكتە اتا-انامنىڭ ارقاسى. دارىگەرلەردىڭ ۇكىمىنە قاراماستان, مەنى دالاعا تاستاماي, باعىپ-قاعىپ, وسى كۇنگە جەتكىزدى. التى جاسىمنان باستاپ سۋرەت سالدىم. قابىلەتىمدى العاش بايقاپ, قولداۋ كورسەتكەن, شىعارماشىلىق تۇرعىدا جەتىلۋىمە ىقپال ەتكەن دە سول جاندار. سەمەي يادرولىق پوليگونىنان 100 شاقىرىمداي جەردەگى ەگىندىبۇلاق اۋىلىندا دۇنيە ەسىگىن اشتىم. اتا-انام سول سىناقتاردى ءوز كوزىمەن كورگەن. اكەم تالاي تاريxي وقيعالاردى اڭگىمەلەپ وتىراتىن. پوليگوننان زارداپ شەككەن كوپتەگەن وتباسىن بىلەمىن. مەنىڭ اكەمنىڭ ارىپتەسى 10 بالا ءسۇيدى. بىراق بارلىعى دا اۋرۋ بولىپ تۋىپ, شەتىنەپ كەتتى. قايران اكەنىڭ جۇرەگى بۇل كۇيىككە شىداعان جوق. مۇنداي جاعدايلار وتە كوپ, – دەيدى كارىپبەك كۇيىكوۆ.
كورمەنىڭ اشىلۋ سالتاناتىنا قاتىسقان «نەۆادا – سەمەي» انتيادرولىق قوعامدىق قوزعالىسىنىڭ وكىلدەرى كۇيىكوۆتىڭ بۇل تاقىرىپتاعى ىزدەنىستەرى دارا مانگە يە ەكەنىن, يادرولىق سىناق زالالىن قامتىعان كارتينالارىن الەمدىك قاۋىمداستىق بەيبىتشىلىكتى تۋ ەتكەن دارا تۋىندىلار رەتىندە مويىندايتىنىن جەتكىزدى. وسىدان جيىرما جىل بۇرىن قازاقستاننىڭ انتيادرولىق كەزەڭىنىڭ سيمۆولى بولعان كارىپبەك كۇيىكوۆتىڭ شىعارمالارى امەريكا, جاپونيا, گەرمانيانىڭ جەكە جانە مەملەكەتتىك كوللەكتسيالارىندا ساقتاۋلى. سۋرەتشىنىڭ كورمەلەرى جاپونيا, اقش, گەرمانيا, تۇركيا, قىتاي سەكىلدى الەمنىڭ بىرقاتار ەلىندە كوپشىلىك نازارىنا ۇسىنىلعان.
الماتى
