ءىس-شارانىڭ ماقساتى قازاق رۋحانياتىنىڭ ءۇش بايتەرەگى اتانعان ساكەن سەيفۋللين, ءىلياس جانسۇگىروۆ جانە بەيىمبەت ءمايليننىڭ ادەبي مۇراسىن رۋحاني جاڭعىرۋ كونتەكسىندە ءارى فيلولوگياداعى سوڭعى پاراديگمالار تۇرعىسىنان قاراستىرۋ جانە كوپشىلىككە ناسيحاتتاۋ.
القالى باسقوسۋعا م.و.اۋەزوۆ اتىنداعى ادەبيەت جانە ونەر ينستيتۋتىنىڭ ديرەكتورى, ف.ع.د كەنجەحان ماتىجانوۆ, اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ پروفەسسورى, ف.ع.د سەرىك اسىلبەك ۇلى, م.و. اۋەزوۆ اتىنداعى ادەبيەت جانە ونەر ينستيتۋتىنىڭ باس عىلىمي قىزمەتكەرى, ف.ع.د اقىش نۇرداۋلەت, ءال-فارابي اتىنداعى قازاق ۇلتتىق ۋنيۆەرسيتەتىنىڭ پروفەسسورى, ف.ع.د كۇلاش احمەت باستاعان عالىمدار مەن ادەبيەت الىپتارىنىڭ شىعارماشىلىق مۇراسىن سان قىرىنان زەرتتەگەن وقۋ ورىندارى مەن عىلىمي-زەرتتەۋ مەكەمەلەرىنىڭ ادەبيەتتانۋشى, فولكلورتانۋشى ماماندارى, ستۋدەنت, ماگيسترانت, دوكتورانتتار قاتىستى.
زەرتتەۋشىلەر ۇلت ادەبيەتىنىڭ الىپتارىنا اينالعان شىعارماشىل تۇلعالاردىڭ ءتۇرلى جانرداعى زەرتتەۋ ەڭبەكتەرى جايىندا وي-تۇجىرىمدار ۇسىندى. سونىمەن قاتار ولاردىڭ جەكە كوركەمدىك ۇستانىمدارىن انىقتاۋ, ادەبي-كوركەم جانە عىلىمي مۇراسىنا قاتىستى زەرتتەۋ جۇمىستارىمەن تانىسۋ, تۋىندىلارىنداعى نەگىزگى تاقىرىپتاردىڭ بەينەلەنۋ جولدارىن جاڭا عىلىمي پاراديگما اياسىندا تالداۋ, وتاندىق فولكلورتانۋ مەن ادەبيەتتانۋدى دامىتۋعا قوسقان ۇلەسىن سارالاۋ, شىعارمالارىن شەت تىلىنە اۋدارۋدىڭ ماڭىزىن باعامداۋ, ناسيحاتتاۋ جۇمىستارى تالقىلاندى.
