بىلە بىلسەك, ناعىز ەڭبەك وسى كىسىلەردىكى. حالىقپەن تىكەلەي جۇمىس ىستەيتىن, كۇنى-ءتۇنى تىنىم تاپپايتىن – وسى سالا قىزمەتكەرلەرى. سوندىقتان مادەنيەت سالاسى ەڭبەككەرلەرى قانداي قۇرمەتكە دە لايىق.
پرەزيدەنت «حالىقتىڭ جەرگىلىكتى بيلىك جۇمىسىنىڭ تيىمدىلىگىن باعالاۋ جۇيەسىن قاناتقاقتى جوبا رەتىندە ەنگىزۋ مۇمكىن دەپ سانايمىن. مىسالى, ەگەر ساۋالناما ناتيجەسىندە تۇرعىنداردىڭ 30 پايىزدان استامى قالا نەمەسە اۋىل اكىمىنىڭ جۇمىسىن ءتيىمسىز دەپ ەسەپتەسە, بۇل ارنايى كوميسسيا قۇرۋ ءۇشىن نەگىز بولا الادى» دەدى. دۇرىس-اق. وڭىرىمىزدە اۋدان, اۋىل دەڭگەيىندەگى حالىقتىڭ كوڭىلىنەن شىقپاسا دا جايباراقات جۇمىسىن ىستەپ جۇرگەن اكىمدەر كوپ. شىنىن ايتقاندا, ولار وزدەرى جۇمىس ىستەپ وتىرعان حالىقتىڭ كوڭىلىنەن شىعۋدى ەمەس, وزدەرى باعىناتىن اكىمدەردىڭ كوڭىلىنەن شىعۋدى ويلايدى. سوندىقتان مەملەكەت باسشىسى ايتىپ وتىرعان ساۋالناما جۇزەگە اسىرىلار بولسا, سول ساۋالنامانى جۇرگىزۋ تەحنولوگياسىنا دۇرىس ءمان بەرىلسە دەيمىز. ويتكەنى ساۋالناما ادەتتەگىدەي كەرەكتى ادامداردان جيىپ الىنادى. سونى الامىز دا «مىنە, ساۋالناما جاسالدى» دەيمىز. وسى جاعى جان-جاقتى ەسكەرىلسە, قاناتقاقتى جوبانىڭ ءساتتى جۇزەگە اسارىنا كۇمان جوق.
پرەزيدەنت جولداۋىندا ۇكىمەتكە الداعى ءۇش جىلدا «اۋىل – ەل بەسىگى» جوباسىنا قوسىمشا 90 ميلليارد تەڭگە ءبولۋدى تاپسىردى. بۇل قاراجات ارينە جول, سۋ, مەكتەپ سەكىلدى جۇمىستارعا جۇمسالاتىنى انىق. ماسەلە – سونىڭ قالاي جۇمسالۋىندا. ماسەلەن, ءبىزدىڭ وبلىستا مەملەكەتتىڭ قانشاما قاراجاتى اۋىلدارعا مەكتەپ سالۋعا جۇمسالدى. وكىنىشتىسى سول, قازىر ول اۋىلداردا كىسى جوق. وقۋشىسى جوق اۋىلدارعا مەكتەپ سالىپ جاتىرمىز. باسقا جەردى ايتپاي-اق ءوزىم تۋىپ-وسكەن كاتونقاراعاي اۋدانىن ايتايىن. وسىدان ءبىراز جىل بۇرىن بالاسى جوق جاڭا ۇلگى اۋىلىنا اپارىپ ەكى قاباتتى مەكتەپ سالدى. 600-700 وقۋشىسى بار كەزىندە مەكتەپ سالىنباعان ورەل اۋىلىنا دا ۇلكەن مەكتەپ سالىپ تاستادى. قازىر ونداعى وقۋشى سانى 100-گە تولمايدى-اۋ دەيمىن. اۋىلدارعا قامقورلىق جاسالعاندا ونىڭ ناقتى قاجەتتىلىگى سول جەردىڭ تۇرعىندارىمەن اقىلداسا وتىرىپ شەشىلسە مەملەكەتكە دە, تۇرعىندارعا دا ءتيىمدى بولارى انىق.
الىبەك قاڭتارباەۆ,
قازاقستان جازۋشىلار وداعى شىعىس قازاقستان وبلىستىق فيليالى ديرەكتورى, اقىن
وسكەمەن
