ەل پرەزيدەنتى جولداۋدىڭ باسقى بولىگىندە نازارباەۆ مودەلىن تەگىننەن-تەگىن اتاپ وتىرعان جوق. جولداۋدا پرەزيدەنت ەلباسى ۇسىنعان بەس باستاما مەن ۇلت جوسپارى باستى الەۋمەتتىك باعىت بولىپ قالا بەرەتىنىن اتاپ ءوتتى. سونىمەن بىرگە زامان تالابىنا ساي ءتيىمدى مەملەكەت قانداي باعىتتا داميتىنىن, بۇل جولدا نە ىستەۋ كەرەكتىگىن, قازاقتىڭ جالپاق تىلىمەن جەتكىزگەندە, جىلىكتەپ كورسەتىپ بەردى. اسىرەسە, حالىق ۇنىنە قۇلاق تۇرەتىن بيلىك, كەرى بايلانىس, تۇرعىنداردىڭ ءوتىنىش-تىلەكتەرىنە جىلدام جاۋاپ قاتىپ, ءتيىمدى شەشىم ۇسىنۋ تۋرالى باستامالار دەر كەزىندە كوتەرىلگەن, ەڭ ماڭىزدى ماسەلەلەردىڭ ءبىرى دەر ەدىم.
وسى ورايدا مەملەكەت باسشىسى «حالىق ۇنىنە قۇلاق اساتىن مەملەكەت» تۇجىرىمداماسى تۋرالى جاڭا مىندەت قويدى. بۇل ءىس – تەك اتقارۋشى ورگاندارعا عانا ەمەس, بارشا قازاقستاندىقتارعا ورتاق. ويتكەنى بەيبىتشىلىكتى باستى ۇستانىمى ەتكەن قازاقستان ءبارىمىزدىڭ ورتاق قارا شاڭىراعىمىز. ال ونداعى ءاربىر رەفورما ەل مۇددەسىنە, جارقىن بولاشاققا ارنالعان. وكىنىشكە قاراي, مەملەكەت ۇستانعان كوپۆەكتورلى ساياساتتى سىنايتىندار, نەگىزسىز سويلەپ, حالىقتى ارانداتۋعا دەيىن اپاراتىن, تىنىشتىعىمىز بەن تۇتاستىعىمىزعا سىزات تۇسىرگىسى كەلەتىن جاندار جوق ەمەس. سوندىقتان ەلدەگى تۇراقتىلىقتى ساقتاپ, ەڭ باستى قۇندىلىعىمىز – تاۋەلسىزدىگىمىزدى كوزدىڭ قاراشىعىنداي قورعايمىز دەسەك, ءوزارا ديالوگ پەن كەلىسىمنىڭ ماڭىزى زور.
«كەڭەستى ەل – كەمىمەس» دەيدى حالىق دانالىعى. مەملەكەت باسشىسى ازاماتتىق قوعام جۇمىسىن جانداندىرىپ, حالىق پەن بيلىك اراسىندا تىعىز بايلانىس ورناتۋ ءۇشىن ۇلتتىق قوعامدىق سەنىم كەڭەسىن قۇردى. مۇنداعى ماقسات – ماڭىزدى مەملەكەتتىك ماسەلەلەردى تالقىلاۋعا ازاماتتىق قوعام وكىلدەرىن تارتىپ, ورتاق شەشىم شىعارۋ. ناتيجەسىندە, مەملەكەتكە دەگەن سەنىم نىعايادى, حالىق ارانداتۋشى ءتۇرلى توپتاردىڭ ىزىنە ەرمەي, تۇراقتىلىق پەن تىنىشتىقتا ءومىر سۇرەدى. ءبىز جولداۋدىڭ ءار سويلەمىندە ايتىلعان نەگىزگى ويدى حالىققا ءتۇسىندىرىپ, اقپارات قۇرالدارى مەن الەۋمەتتىك جەلىلەر ارقىلى پىكىر ءبىلدىرىپ, ءۇن قوسۋىمىز قاجەت. جولداۋ اياسىندا بەرىلگەن تاپسىرمانىڭ ارقايسىسى ماڭىزدى جانە ءوز شەڭبەرىندە شەشىمىن تاپپاعان تۇيتكىلدەرى دە بار. مۇندايدا ءتيىمدى ۇسىنىس پەن ۇتقىر يدەيا, ءارالۋان پىكىر مەن اشىق تالقىلاۋ, مامىلە مەن ورتاق كەلىسىم باستى ورىنعا شىعادى. پرەزيدەنتىمىز سەنىم كەڭەسىمەن بىرگە كەرى بايلانىس جۇمىسىن كۇشەيتۋدى تاپسىردى.
بايلانىس قۇرالدارى قارىشتاپ دامىعان ءححى عاسىردا جەرگىلىكتى اتقارۋشى بيلىك تە ۇتقىر جۇمىس ىستەۋى كەرەك. تەحنولوگيا عاسىرىندا تۇرعىنداردىڭ تالاپ-تىلەگىنە, ارىز-شاعىمىنا ءۇن قاتپاۋ, وتىنىشتەرىنە جاۋاپ بەرمەي, ءارى-بەرى سابىلتىپ قويۋ دەگەنىمىز – ناعىز كەرتارتپالىقتىڭ كورىنىسى. بۇل بۇكىل مەملەكەتتىك قىزمەتكە نۇقسان كەلتىرەتىن, ەلىمىزدىڭ ستراتەگيالىق دامۋ جوسپارىن تەجەيتىن جاۋاپسىزدىق دەپ ەسەپتەيمىن. پرەزيدەنت وسىنداي تۇيتكىلدەردى نازارعا الا وتىرىپ, تۇرعىنداردىڭ مۇقتاجدىعىنا كوڭىل بولەتىن ارنايى ءبولىم قۇرىلعانىن ايتتى. بۇل بولاشاقتا كەرى بايلانىستىڭ ساپالى كورسەتكىشى بولادى دەگەن ويدامىن. ءبولىمنىڭ باستى ەسكەرەتىن دۇنيەسى – جەدەلدىك. قىسقاسى, بولىمدە ازاماتتاردىڭ وتىنىشتەرى قانشالىقتى تەز قارالاتىنى قاداعالانادى.
پرەزيدەنت قوعامدىق ديالوگتى, اشىقتىقتى, ادامداردىڭ مۇقتاجدىعىنا جەدەل نازار اۋدارۋدى نەگىزگى باسىمدىق رەتىندە كورسەتتى. قازىرگى تاڭدا كەرى بايلانىستىڭ تاعى ءبىر ۇلكەن جانە اۋقىمدى قۇرالى رەتىندە عالامتور مۇمكىندىگىن ايتار ەدىم. حالىق بۇرىنعىداي ەمەس, بۇگىندە بايلانىسى سىن كوتەرمەيدى دەيتىن اۋىلدىق ايماقتاردىڭ وزىندە الەۋمەتتىك جەلىدە وتە بەلسەندى. بەينەۇزىكتەرگە, پوست جازبالارىنا شالعاي جەرلەردەن پىكىر جازىپ, قىزۋ تالقىلاپ وتىرادى. سوندىقتان قاسىم-جومارت توقاەۆتىڭ باستاماسىمەن جۇزەگە اسقان الەۋمەتتىك جەلىلەرگە تىركەلۋ جۇمىسى بىردەن-ءبىر قۇپتارلىق ءىس. سونداي-اق بۇل از ۋاقىتتا ءوز ناتيجەسىن بەرىپ ۇلگەردى دە. الەۋمەتتىك جەلىدە پاراقشا اشقان وبلىس, قالا, اۋدان جانە اۋىلدىق وكرۋگ اكىمدەرى, ءتۇرلى مەكەمە باسشىلارى تۇرعىندارمەن ۇنەمى بايلانىستا بولىپ, جۇمىلا جۇمىس جۇرگىزۋگە بەيىمدەلدى. بۇگىندە ءار اكىمنىڭ كۇندەلىكتى جۇمىسىمەن كەز كەلگەن تۇرعىن تانىسىپ, ءبىلىپ وتىرادى. ول از دەسەڭىز, پىكىر جازىپ, اكىمگە ۇسىنىس-كەڭەس ايتا الادى, ءوزىنىڭ ءوڭىرى جايلى باستامالار كوتەرۋگە مۇمكىندىگى بار. مەنىڭشە, جولداۋدا كوتەرىلگەن كەرى بايلانىستىڭ جارقىن مىسالى الەۋمەتتىك جەلىدەگى بەلسەندىلىك دەپ ايتۋعا بولادى.
مەملەكەت باسشىسى جولداۋدا ازاماتتىق قوعامنىڭ بەلسەندىلىگىن ارتتىرۋ تۋرالى ايتتى. بۇل رەتتە ۇكىمەتتىك ەمەس ۇيىمداردىڭ بەدەلىن كۇشەيتۋ قاجەت. ۇكىمەتتىك ەمەس ۇيىمدار دامىعان دەموكراتيالى ەلدەردە ماڭىزدى رولگە يە. ءتىپتى اۋقىمدى ماسەلەلەردىڭ تەز شەشىمىن تابۋىنا وسىنداي ۇيىمدار تۇرتكى بولادى. ەل پرەزيدەنتى جولداۋدا ازاماتتىق قوعامدى دامىتۋدىڭ 2025 جىلعا دەيىنگى تۇجىرىمداماسىن ازىرلەۋدى تاپسىردى. تۇجىرىمداما ءاربىر قازاقستان ازاماتىنىڭ قوعامدىق ومىردەگى بەلسەندىلىگىن ارتتىرىپ, جاس ۇرپاقتىڭ وزىندىك وي-پىكىرىن قالىپتاستىرۋىنا, زاماناۋي مەملەكەتتى ماقتانىش ەتەتىن وتانشىلدىق رۋحتا تاربيەلەنۋىنە ۇلكەن سەپتىگىن تيگىزەرى ءسوزسىز.
نۇرلان قىلىشباەۆ,
سەنات دەپۋتاتى
