«ەڭبەك جولى» كونكۋرسىنىڭ وڭىرلىك جەڭىمپازدارىن ىرىكتەۋ اياقتالدى

ونلاين-داۋىس بەرۋدىڭ ناتيجەلەرى بويىنشا ەڭ كوپ داۋىس جيناعان كوشباسشىلاردىڭ ۇشتىگى «ەڭبەك جولى» كونكۋرسىنىڭ رەسپۋبليكالىق كەزەڭىنە قاتىسادى.

جەرگىلىكتى اتقارۋشى ورگانداردىڭ مالىمەتتەرىنە سايكەس كونكۋرستىڭ وڭىرلىك كەزەڭىنە قاتىسۋعا 388 ءوتىنىم بەرىلگەن, ونىڭ ىشىندە نوميناتسيالار بويىنشا: «ۇزدىك ەڭبەك اۋلەتى» - 90 ءوتىنىم; ء«وندىرىستىڭ ۇزدىك جاس مامانى» - 154 ءوتىنىم; «جۇمىس ىستەيتىن جاستاردىڭ ۇزدىك تالىمگەرى» - 144 ءوتىنىم.

كونكۋرسقا قاتىسۋعا ۇمىتكەرلەردىڭ وتىنىمدەر سانى وتكەن جىلمەن سالىستىرعاندا 58,4 %-عا وسكەنى بايقالادى (2018 ج. – 245 ءوتىنىم).

كونكۋرستى وتكىزۋدىڭ  نەگىزگى ماقساتى ەڭبەك ادامدارى جونىندە جاعىمدى قوعامدىق پىكىر قالىپتاستىرۋ جانە كاسىپورىندار مەن ۇيىمداردا جاڭا ەڭبەك اۋلەتتەرىنىڭ قۇرىلۋىنا جاعدايلار جاساۋ بولىپ تابىلادى.

كونكۋرس جەڭىمپازدارىن سالتاناتتى تۇردە ماراپاتتاۋ ءراسىمى اعىمداعى جىلدىڭ قاراشا ايىندا  قازاقستاندا ەڭبەك كۇنىن مەرەكەلەۋگە  ارنالعان «حالىقتىڭ ءال-اۋقاتىن الەۋمەتتىك ارىپتەستىك ارقىلى جاقسارتۋ» رەسپۋبليكالىق فورۋمى اياسىندا وتكىزىلەتىن بولادى.

29 قىركۇيەكتە قازاقستاندا ەڭبەك كۇنى مەرەكەسى تويلانعانىن ەسكە سالامىز. مەرەكەنىڭ باستى ماقساتى ەڭبەك ونىمدىلىگىن ارتتىرۋدى  ىنتالاندىرۋ, جاستار اراسىندا جۇمىسشى ماماندىقتارىن ناسيحاتتاۋ جانە جۇمىسشى اۋلەتتەرىنىڭ كوپجىلدىق ءداستۇرىن نىعايتۋ بولىپ تابىلادى.

قازاقستان رەسپۋبليكاسىنىڭ ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ قازاقستاندىقتاردى مەرەكەمەن قۇتتىقتادى.

«بارشا قازاقستاندىقتاردى ءار قىركۇيەكتىڭ سوڭعى جەكسەنبىسى تويلاناتىن «ەڭبەك جولى» مەرەكەسىمەن قۇتتىقتايمىن. بۇل مەرەكە حالقىمىزدىڭ الەۋمەتتىك جانە ەكونوميكالىق جەتىستىكتەرىنە ارنالعان. بارشامىزدىڭ  سۇيىكتى ءىسىمىز وزىمىزگە ۇنايتىن, ارىپتەستەرىمىزدىڭ قۇرمەتىنە يە بولىپ, ەڭبەگىمىزدىڭ ۇزدىك ناتيجەلەرىمەن قاناعاتتاناتىنداي جۇمىسىمىز بولسىن. ەلىمىزدىڭ بارلىق ازاماتتارىنا اماندىق جانە تاۋەلسىز قازاقستاننىڭ يگىلىگى ءۇشىن تابىستى ەڭبەك تىلەيمىن», - دەدى ءبىرجان نۇرىمبەتوۆ.

ەلىمىزدىڭ بارلىق وڭىرلەرىندە قازاقستاننىڭ ەكونوميكاسىن دامىتۋ مەن نىعايتۋعا جەكە ۇلەسىن قوسقان ەڭبەك ارداگەرلەرىن, ەڭبەك اۋلەتتەرىنىڭ وكىلدەرى مەن كاسىپقويلارىنا قۇرمەت كورسەتۋ بويىنشا ءىس-شارالار وتكىزىلدى.