وسىعان بايلانىستى قوعامدىق دەنساۋلىق ساقتاۋ ۇلتتىق ورتالىعى دۇرىس تاماقتانۋ ساياساتىن قامتاماسىز ەتۋ بويىنشا شارالار كەشەنىن ازىرلەگەن. قۇجاتتاردىڭ بىرىنە نان جانە نان-توقاش ونىمدەرىندەگى تۇزدى كەزەڭ-كەزەڭمەن تومەندەتۋ جونىندەگى ءىس-شارالار جوسپارى ەنگىزىلگەن. ورتالىق بۇل باستامانى باسقا دا نان-توقاش ونىمدەرىن وندىرۋشىلەر قولدايدى دەپ جوسپارلاپ وتىر.
«تۇزدى جوعارى تۇتىنۋ سەمىزدىك, ءىى ءتيپتى قانت ديابەتى جانە ونكولوگيالىق اۋرۋلاردىڭ كەيبىر تۇرلەرى, ارتەريالىق گيپەرتەنزيا, ينفاركت جانە جۇرەك-قان تامىرلارى اۋرۋلارى سياقتى سوزىلمالى ينفەكتسيالىق ەمەس اۋرۋلاردىڭ دامۋىنا اكەپ سوعادى. دۇنيەجۇزىلىك دەنساۋلىق ساقتاۋ ۇيىمى جۇرگىزگەن سوڭعى زەرتتەۋلەردىڭ ناتيجەلەرى بويىنشا قازاقستاندا تۇزدى تۇتىنۋ الەمدەگى ەڭ جوعارى دەڭگەيدە جانە ددۇ ۇسىنعان تاۋلىكتىك دوزادان 3 ەسەدەن ارتىق, ياعني تاۋلىگىنە 17 گرامم, نورما بولسا 5 گرامدى قۇرايدى», دەيدى قازاتۋ «تاماق جانە قايتا وڭدەۋ وندىرىستەرىنىڭ تەحنولوگياسى» كافەدراسىنىڭ اعا وقىتۋشىسى, تەحنيكا عىلىمدارىنىڭ دوكتورى ءنۇربيبى سوۆەتقىزى.
ەكونوميكالىق ۇلگىلەۋدىڭ دەرەكتەرى بويىنشا, تۇزدى تۇتىنۋدى تومەندەتۋ جونىندەگى ءىس-شارالار كەشەنى قازاقستانداعى ينفەكتسيالىق ەمەس اۋرۋلاردىڭ الدىن الۋدىڭ نەعۇرلىم ءتيىمدى شاراسى. تۇزدى تۇتىنۋدى قىسقارتۋعا باعىتتالعان ءىس-شارالارعا سالىنعان قارجى, بەس جىلدىق كەزەڭدە سالىنعان قاراجاتتان 11 ەسە ارتىق ەكونوميكالىق ناتيجە بەرەدى.
«تۇزدى تۇتىنۋدى قىسقارتۋ ينفەكتسيالىق ەمەس اۋرۋعا بايلانىستى قاۋىپتى جانە قان قىسىمىن تومەندەتۋى مۇمكىن. ددۇ ۇسىنىمدارىنا سايكەس تاعام ونىمدەرىندەگى تۇزدىڭ سانىن ازايتۋدى جاپپاي تۇتىنۋ ءونىمى رەتىندە ناننان باستاۋ نەعۇرلىم ءتيىمدى. جالپى ءبىزدىڭ ەكسپەريمەنتالدىق-وندىرىستىك تسەحتا ۋنيۆەرسيتەت پلاتفورماسى اياسىندا ازىق-ت ۇلىك ءوندىرىسى باعدارلامالىق توبىنا قاراي ماماندىقتار دايىندالادى. سوعان وراي ستۋدەنتتەردىڭ تەوريالىق ساباقتارمەن قاتار تاجىريبەلىك ساباقتاردى دا وتەدى. وسى ەكسپەريمەنتالدىق-وندىرىستىك تسەحتا نان جانە نان-توقاش ونىمدەرى وندىرىلەدى. ستۋدەنتتەرگە 2-كۋرستان 4-كۋرسقا دەيىن تاجىريبەلىك ساباقتار جۇرگىزىلەدى. ولار نان تەحنولوگياسىن, ناننىڭ تۇرلەرىن, وعان قوسىلاتىن شيكىزاتتار جانە وندىرىسكە قويىلاتىن تالاپتاردىڭ بارلىعىن وسى جەردەن ۇيرەنىپ شىعادى. باكالاۆردا وقيتىن ستۋدەنتتەر, ماگيسترانتتار نەمەسە دوكتارانتتار وزدەرىنىڭ نان ونىمدەرىنە بايلانىستى ديپلومدىق, ديسسەرتاتسيالىق جۇمىستارىن كوزبەن كورىپ, كوڭىلگە توقىپ جازادى», دەيدى ەكسپەريمەنتالدىق-وندىرىستىك تسەحىنىڭ تەحنولوگى, وقۋ شەبەرى گاۋحار دۇيسەنعاليقىزى.
قازىرگى تاڭدا س.سەيفۋللين اتىنداعى قازاق اگروتەحنيكالىق ۋنيۆەرسيتەتىنىڭ نان جانە نان-توقاش ونىمدەرىن ءوندىرۋ جونىندەگى ەكسپەريمەنتالدىق-وندىرىستىك تسەحىندا ەۋرازيالىق ەكونوميكالىق وداقتىڭ ءنورماتيۆتى-قۇقىقتىق قۇجاتتارىنىڭ تالاپتارىنا ساي كەلەتىن نان-توقاش ونىمدەرىنىڭ 15-تەن استام ءتۇرى وندىرىلۋدە. ينفەكتسيالىق ەمەس اۋرۋلاردىڭ الدىن الۋعا باعىتتالعان مەموراندۋم اياسىندا جوو ستۋدەنتتەرى مەن وقىتۋشىلارى ءۇشىن تۇزى از مولشەردەگى نان ءوندىرۋ باستالعان. ەكىجاقتى ىنتىماقتاستىق شەڭبەرىندە حالىقارالىق ساراپشىلاردى تارتا وتىرىپ, تاماق ءونىمى تۇرلەرىندە تۇزدى تومەندەتۋ ماسەلەلەرى بويىنشا كونسۋلتاتسيالار, سەمينارلار, سونداي-اق دۇرىس تاماقتانۋ مادەنيەتىن قالىپتاستىرۋ بويىنشا بىرلەسكەن اكتسيالار ۇيىمداستىرۋ جوسپارلانۋدا.
«اتالعان ۋنيۆەرسيتەت نان-توقاش ونىمدەرىندەگى تۇز مولشەرىن ازايتۋ ونىڭ دامدىك قاسيەتىنە, ءوندىرۋ تەحنولوگياسى مەن ساقتاۋ مەرزىمىنە ەشقانداي تەرىس اسەر بەرمەيتىنىن پراكتيكالىق زەرتتەۋلەر جۇرگىزۋ نەگىزىندە دالەلدەدى. جۇمىستىڭ وڭ تاجىريبەسى ونى جوعارى اۋقىمدى نان وندىرۋشىلەرىنە كورسەتۋگە مۇمكىندىك بەرەدى. بۇدان بولەك, قازىرگى ۋاقىتتا قدسۇو Nur Otan پارتياسىنىڭ نۇر-سۇلتان قالاسىنداعى فيليالىمەن بىرگە نانداعى تۇز مولشەرىن ازايتۋ بويىنشا ءىرى نان-توقاش وندىرۋشىلەرىمەن جۇمىستى باستادى. ءىرى وندىرۋشىلەردەن بولەك, اكتسياعا كىشىگىرىم ناۋبايحانالار دا قوسىلۋعا نيەت بىلدىرۋدە» دەيدى قوعامدىق دەنساۋلىق ساقتاۋ ۇلتتىق ورتالىعى ديرەكتورىنىڭ ورىنباسارى رۋسلان قۇسايىن ۇلى.
