جاقىندا ءوڭىر باسشىسى وڭداسىن ءورازاليننىڭ توراعالىعىمەن وبلىستىق توتەنشە جاعدايلاردىڭ الدىن-الۋ جانە جويۋ جونىندەگى كوميسسيا وتىرىسى ءوتتى. قىسقا دايىندىق بارىسى نەگىزگى تاقىرىپ بولعان جيىنعا وبلىس اكىمىنىڭ ورىنباسارلارى, وڭىرلىك دەپارتامەنتتەر مەن باسقارمالاردىڭ باسشىلارى, ءوڭىردى قۋات كوزىمەن قامتيتىن باستى مەكەمەلەردىڭ ءبىرى «ەنەرگوسيستەما» جشس-نىڭ وكىلدەرى, «قازترانسگازايماق» ءاوف, «قازاقستان تەمىر جولى» ۇك «ماگيسترالدىق جەلىنىڭ اقتوبە بولىمشەسى» اق فيليالىنىڭ وكىلدەرى قاتىستى. بەينەبايلانىس رەجىمىندە قوسىلعان اۋدان اكىمدەرى دە ماڭىزدى جيىننان تىس قالعان جوق.
اقتوبە وبلىسى بويىنشا 2019-2020 جىلدارداعى جىلىتۋ ماۋسىمىنا دايىندىق بارىسى تۋرالى ەنەرگەتيكا جانە تۇرعىن-ءۇي كوممۋنالدىق شارۋاشىلىعى باسقارماسى باسشىسىنىڭ مىندەتىن اتقارۋشى قارجاۋباي ىبرايىم ۇلى باياندادى.
– جىلىتۋ ماۋسىمىنا قازاندىقتار, 274,5 شاقىرىم جىلۋ جەلىلەرى 100% جوندەۋدەن ءوتتى. بۇگىنگى تاڭدا جىلىتۋ ماۋسىمىنىڭ ۇزدىكسىز ءوتۋى ءۇشىن الەۋمەتتىك سالالارعا 33 237,1 توننا كومىر مەن 1 750 توننا سۇيىق وتىن جەتكىزىلگەن. جىلۋ الدىمەن الەۋمەتتىك ماڭىزى بار مەكەمەلەرگە بەرىلەدى, – دەدى ول. قارجاۋباي ىبرايىم ۇلىنىڭ ايتۋىنشا, قازان ايىنىڭ العاشقى كۇنىنەن باستاپ وبلىستاعى الەۋمەتتىك نىساندارعا جىلۋ بەرىلە باستايدى.
جالپى, كوكتەم كەلىپ, كۇن جىلىنعانعا دەيىن جەكەمەنشىك ۇيلەردە تۇراتىن جەرگىلىكتى حالىققا 37 مىڭ توننا كومىر قاجەت ەكەن. قازىر 88 ۆاگون نەمەسە 6 160 توننا كومىر جەتكىزىلگەن. سونىمەن قاتار اپتا سايىن 500-700 توننا كولەمىندە قاتتى وتىن ۇزدىكسىز تاسىلىپ, ساتىلىپ جاتىر. وبلىس تۇرعىندارى ءۇشىن كومىر وتىنى شۇباركول, مايكوبەن, ەكىباستۇز, قاراجىرا كومىر الاپتارىنان جەتكىزىلەتىنىن ايتا كەتەيىك. حالىق ساپالى كومىردىڭ تونناسىن 15 200-16 500 تەڭگە ارالىعىنداعى باعا بويىنشا الۋدا. كۇندەلىكتى ساتۋ كولەمى 40-50 توننا بولىپ وتىر.
وبلىس اكىمى جىلۋ ماۋسىمىنا ازىرلىك بارىسىن تىكەلەي باقىلاپ وتىر.
– 15 قازانعا دەيىن جىلىتۋ ماۋسىمىنا دايىندىقتى تولىق اياقتاۋ قاجەت. اۋدان اكىمدەرى جەرگىلىكتى كومىر تاسۋشى كومپانيالارمەن جۇمىس ىستەۋى ءتيىس. قاجەتتى وتىندى ۋاقتىلى تاسىمالداۋدى باستاپ, تۇرعىندارعا قاۋىپسىزدىكتىڭ الدىن الۋ بويىنشا ءتۇسىندىرۋ جۇمىستارى ءتيىستى دەڭگەيدە جۇرگىزىلۋى كەرەك, – دەدى وبلىس اكىمى.
سونداي-اق جيىندا قوسىمشا ءورت ءسوندىرۋ بەكەتتەرىن سالۋ, ونەركاسىپ نىساندارىنىڭ تەحنولوگيالىق جابدىقتارىنىڭ جاعدايى, ەسكىرگەن جابدىقتاردى الماستىرۋ جانە جاڭارتۋ تۋرالى ماسەلەلەر قارالدى. وڭداسىن ورازالين جىلىتۋ ماۋسىمىنا قاتىستى ورىنباسارى راحات سىدىقوۆقا اۋدان اكىمدەرىمەن بىرىگە كوتەرىلگەن ماسەلەلەردى جۇيەلى تۇردە شەشۋدى تاپسىردى.
