اتاپ ايتقاندا, ەڭ الدىمەن, اۋىل تۇرعىندارىنا تۇراقتى جۇمىس بەرەدى, جۇمىسسىزدىقتى ازايتادى. سونىمەن قاتار سالىق بازاسىن قۇرىپ, جەرگىلىكتى بيۋدجەتتى نىعايتادى. سونداي-اق جاپپاي كاسىپكەرلىكتى دامىتۋ ساناعا سىڭگەن پاتەرناليستىك پيعىل مەن ماسىلدىقتان ارىلۋعا مۇمكىندىك بەرەدى, دەگەن بولاتىن. بۇگىنگى تاڭدا مەملەكەت شاعىن جانە ورتا بيزنەسكە ءتيىستى قولداۋ كورسەتىپ كەلەدى. اسىرەسە اۋىلدى جەرلەردە مەملەكەت تاراپىنان قايتارىمسىز نەسيە الىپ, تىرلىگىن تىكتەپ وتىرعان ازاماتتار كوپ. مۇنداي ازاماتتار ءوزىن ءوزى جۇمىسپەن قامتىپ قانا قويماي, ەكونوميكالىق وسىمگە دە ۇلەس قوساتىن بولادى.
تەڭىزباي قورعانوۆ جۋالى اۋدانى, نۇرلىكەنت اۋىلىنىڭ تۇرعىنى. 51 جاستاعى ازامات 11 بالانىڭ اكەسى ەكەن. ءوزىنىڭ ادال ەڭبەگىمەن وتباسىن اسىراپ جۇرگەن ول كەيىننەن ءۇش اي بويى اۋدان ورتالىعىنداعى جۇمىسشى ماماندىعىن دايىندايتىن كوللەدجدە وقىپ, دانەكەرلەۋشى ماماندىعىن الىپتى. ەندىگى جەردە وتباسىنا تابىس كوزى رەتىندە جەكە تاپسىرىستار الىپ, جۇمىس ىستەۋدى قولعا الىپ وتىر. اۋداندىق حالىقتى جۇمىسپەن قامتۋ ورتالىعىنا قايتارىمسىز نەسيە الۋ ءۇشىن قۇجاتتارىن وتكىزىپ, ناتيجەسىندە 505 مىڭ تەڭگە العان. «قازىرگى كەزدە مەملەكەتتىڭ قولداۋىنىڭ ناتيجەسىندە اۋىل تۇرعىندارى جەكە كاسىپكەرلىكپەن اينالىسۋعا مۇمكىندىك الىپ وتىر. مەن دە ەندى مەملەكەتتەن العان قايتارىمسىز نەسيەگە دانەكەرلەۋشى قۇرال-جابدىقتار ساتىپ الىپ, يگەرگەن ماماندىعىم بويىنشا جۇمىس ىستەسەم دەيمىن. بالالارىمدى دا ادال ەڭبەكپەن نان تاۋىپ, قوعامنىڭ دامۋىنا ۇلەس قوسۋعا باۋلىپ كەلەمىن», دەيدى ول.
تەڭىزباي قورعانوۆ جاستايىنان ەڭبەك مايدانىندا شىنىعىپ وسكەن ازامات ەكەن. ول اۋىلدان دانەكەرلەيتىن تسەح اشىپ, ءناسىبىن كاسىبىنەن تاپقىسى كەلەتىنىن دە جاسىرمادى. جۋىردا عانا ارىس قالاسىن قالپىنا كەلتىرۋ جۇمىستارىنا بارىپ, سونداعى قۇرىلىس جۇمىستارىنا ارالاسىپ, ناپاقا تاۋىپ كەلىپتى. «بالا-شاعانى جەتكىزۋ دە وڭاي ەمەس. ول ءۇشىن ءاربىر ادام جۇمىس ىستەپ, تابىس تابۋى كەرەك. بالالارىمدى دا ەڭبەككە باۋلىپ كەلەمىن», دەيدى ول.
تەڭىزباي قورعانوۆ سياقتى تالاي ازامات بۇگىندە ءوز كاسىبىن اشىپ, جۇمىسىن جۇرگىزىپ كەلەدى. جۋالى اۋداندىق حالىقتى جۇمىسپەن قامتۋ ورتالىعىنىڭ مامانى ەرىك سۇرامىسوۆتىڭ ايتۋىنشا, اۋدان بويىنشا 52 ادامعا 200 ايلىق ەسەپتىك كورسەتكىش مولشەرىندە جانە نىسانالى توپقا جاتپايتىن 7 ازاماتقا 100 ايلىق ەسەپتىك كورسەتكىش مولشەرىندە قايتارىمسىز نەسيە بەرىلىپتى. ونىڭ ىشىندە از قامتىلعان جانە كوپ بالالى وتباسىلار دا بار ەكەن. بۇگىنگى تاڭدا مەملەكەتتىڭ كومەگىن العان ازاماتتار كونديتەرلىك ورتالىق, شاشتاراز, دوڭگەلەك جەلىمدەۋ ورتالىعى سياقتى كاسىپ تۇرلەرىن اشىپ, جۇمىستارىن جۇرگىزۋدە. ءسويتىپ ءاردايىم ادال ەڭبەك ابىرويعا كەنەلتەتىنىن ۇمىتپاعان ازاماتتار تۇراقتى كاسىپپەن اينالىسۋدا.
جامبىل وبلىسى
