الماتى تەحنولوگيالىق ۋنيۆەرسيتەتى ۇستىمىزدەگى جىلعى تاۋەلسىز اككرەديتتەۋ جانە رەيتينگ اگەنتتىگىنىڭ ساراپتاماسى بويىنشا – ەلىمىزدەگى الدىڭعى قاتارلى تەحنيكالىق ۋنيۆەرسيتەتتەردىڭ ۇزدىك بەستىگىنە كىرگەن. ال ءبىلىم بەرۋ باعدارلامالارىنىڭ رەيتينگىسى بويىنشا رەيتينگكە قاتىسقان 46 ماماندىعىمىزدىڭ 32 جۇلدەلى 1,2,3 ورىندارعا يە بولدى, ونىڭ ىشىندە 17 ماماندىق 1 ورىنداردى يەلەندى. ال بۇگىنگى ۋنيۆەرسيتەت رەبرەندينگىنىڭ باستى ماقساتى – ءبىلىم بەرۋ نارىعىندا جاڭا ءارى ەستە قالارلىق ستيل قۇرۋ, الەمنىڭ جەتەكشى ۋنيۆەرسيتەتتەرىمەن ىنتىماقتاستىق بايلانىستى دامىتۋ, – دەدى باۋىرجان نۇراحمەتوۆ. ۋنيۆەرسيتەت پرورەكتورىنىڭ ايتۋىنشا, اتۋ حالىقارالىق QS اگەنتتىگىنىڭ شىعىس ەۋروپا جانە ورتالىق ازيا ەلدەرى ۋنيۆەرسيتەتتەرىنىڭ رەيتينگىسى بويىنشا ۇزدىك 200 ۋنيۆەرسيتەتتەر قاتارىنا بيىل بەسىنشى رەت كىرىپ وتىر.
1957 جىلى نەگىزى قالانعان ۋنيۆەرسيتەت قۇرىلعان كەزەڭنەن باستاپ باعا جەتپەس قىزمەتكەرلەر مەن عىلىمي الەۋەتىن جاساقتاعان. قازاقستان جانە شەتەل ەكونوميكاسى ءۇشىن 60 مىڭنان اسا جوعارى ءبىلىمى بار مامان دايىنداپ شىعاردى.
«سوڭعى جالدارى جوعارى ءبىلىم سالاسىندا كوپتەگەن وڭتايلى وزگەرىستەر بولىپ جاتىر. جوعارى وقۋ ورىندارىنا اكادەميالىق جانە باسقارۋشىلىق ەركىندىكتەر بەرىلدى. بۇل وزگەرىستەر ءبىلىم بەرۋ جۇيەسىن جاڭعىرتۋعا مۇمكىندىك بەرەدى. ءار زاماندا جوعارى وقۋ ورىندارىنىڭ نەگىزگى مىندەتى – بىلىكتى مامانداردى دايىنداپ نارىقتىڭ سۇرانىسىن قاناعاتتاندىرۋ», – دەيدى ATU ۋنيۆەرسيتەتىنىڭ ءبىرىنشى پرورەكتورى باۋىرجان نۇراحمەتوۆ.
ATU – 1957 جىلى نەگىزى قالانعان قازاقستاننىڭ ەڭ العاشقى وقۋ ورىندارىنىڭ ءبىرى. وقۋ ورداسى تاعام جانە جەڭىل ونەركاسىپ, بيزنەس, قىزمەت كورسەتۋ جانە قوناقجايلىلىق سالاسىنا ماماندار دايارلايدى. اتۋ-دا ستۋدەنتتەرگە تۋريزم جانە قوناق ءۇي مەنەدجمەنتى ينستيتۋتىمەن (شۆەيتساريا), ەۋروپالىق ديزاين ينستيتۋتىمەن (يتاليا), گ.پلەحانوۆ اتىنداعى رەسەي ەكونوميكالىق ۋنيۆەرسيتەتى (رەسەي) جانە پلوۆديۆ قالاسىنىڭ تاعام تەحنولوگياسى ۋنيۆەرسيتەتىمەن (بولگاريا) بىرلەسىپ قوس ديپلومدىق باعدارلاماسىمەن ءبىلىم الۋعا مۇمكىندىك بار.
ۋنيۆەرسيتەت قابىرعاسىندا ستۋدەنتتەر نان ءپىسىرىپ, شۇجىق ونىمدەرىن جاساپ, ماكاروننىڭ جاڭا تۇرلەرىن ويلاپ تابا الادى, سىرا قايناتىپ, وقۋ ورداسىنىڭ مەيرامحانسىندا قىزمەت كورسەتىپ, شاعىن وتەلدە قوناق ءۇي بيزنەسىنىڭ قىر-سىرىمەن تانىسادى, سونداي-اق توقىما يندۋسترياسىنىڭ جاڭا مودەلدەرىن ازىرلەپ, حالىقارالىق فەشن-جوبالارعا قاتىسا الادى.
ۋنيۆەرسيتەتتە تاعام جانە جەڭىل ونەركاسىپ, مەيرامحانا مەن قوناق ءۇي بيزنەسىنە ارنالعان 3 تەحنوپارك جۇمىس ىستەيدى. ولار شيكىزاتتان ءونىمدى دايىنداپ شىعارۋعا دەيىنگى تولىق تەحنولوگيالىق تسيكلدى قامتاماسىز ەتەتىن زاماناۋي وندىرىستىك قوندىرعىلارمەن جابدىقتالعان.
الماتى
