23 قىركۇيەكتە حالىقارالىق ىم –يشارا تىلدەرىنىڭ كۇنى اتاپ وتىلەدى. ارنايى داتانى 2017 جىلى بۇۇ بەلگىلەگەن. كۇن سايىن ەلىمىزدەگى 348 فرونت-وفيسكە مىڭداعان قازاقستاندىق مەملەكەتتىك قىزمەت الۋعا كەلەدى. ولاردىڭ سۇرانىسىن وتەپ, ساپالى قىزمەت كورسەتۋ – حقو قىزمەتكەرلەرىنىڭ مىندەتى. قىزمەت الۋشىلاردىڭ اراسىندا ەرەكشە قاجەتتىلىگى بار تۇلعالار دا بار. ەستۋ قابىلەتى ناشار ادامدار ءۇشىن فرونت-وفيستەردە ىم-يشارا ءتىلىن مەڭگەرگەن ماماندار قىزمەت كورسەتەدى.
ء«ار كۇنىن «تىنىشتىقتا» وتكىزەتىن ازامات حقو سياقتى مەكەمەگە كەلىپ, ءوزىن تۇسىنە الاتىن قىزمەتكەرمەن ىممەن تىلدەسىپ, كەرەك قىزمەتىن الا الادى. ءبىز قاشاندا ەرەكشە قاجەتتىلىگى بار تۇلعالارعا بار جاعدايدى جاساۋعا تىرىسامىز. اربامەن جۇرەتىندەر ءۇشىن پاندۋستار, زاعيپتار ءۇشىن برايل الىپبيىندەگى جازۋلارى بار تاقتايشالار قويىلعان, ناشار ەستيتىندەرگە سۋردواۋدارما ءتىلىن مەڭگەرگەندەر قىزمەت كورسەتەدى», – دەيدى باسقارما ءتورايىمى اسەمگۇل بالتاشەۆا.
ەلىمىز بويىنشا حالىققا قىزمەت كورسەتۋ ورتالىقتارىنىڭ بولىمدەرىندە ەڭبەك ەتەتىن 1 300-دەن استام قىزمەتكەر بيىل ىم-يشارا ءتىلىن مەڭگەرۋ كۋرستارىنان وتكەن. ولاردىڭ 1 100-دەن استامى ارنايى سەرتيفيكات العان.
مەملەكەتتىك كورپوراتسيانىڭ قوستاناي وبلىستىق فيليالىندا قىزمەت ەتەتىن ايجان ماقاتوۆانىڭ ايتۋىنشا, ىم-يشارا ءتىلىن ۇيرەنۋ ۇسىنىلعاندا, ول بىردەن كەلىسىمىن بەرگەن. ادامدارعا كومەكتەسۋ – باستى پارىزىم دەپ بىلگەن ول كۋرستاردان ءوتۋ ارقىلى قىزمەت الۋعا كەلەتىن ەرەكشە تۇلعالارعا پايداسىن تيگىزە الاتىنىن ايتادى.
«از ۋاقىت ىشىندە ءبىز ىم-يشارا تىلىندەگى امانداسۋ, قوشتاسۋ, ارىپتەر, ساندار سياقتى نەگىزگى سوزدەرى مەن تەرميندەرىن مەڭگەردىك. قىزمەت الۋشىلارعا قانداي انىقتاما, قۇجات قاجەت دەپ سۇراي الامىز, مەيلى ول جەكە كۋالىك نە پاسپورت بولسىن», – دەيدى ايجان ماقاتوۆا.
ايتا كەتەيىك, مەملەكەتتىك كورپوراتسيادا I, II, III توپ مۇگەدەكتىگى بار 745 جۇمىسكەر ەڭبەك ەتەدى. جۇمىسپەن قامتۋ ستراتەگيالىق جوسپارىنا سايكەس, مۇگەدەكتىگى بار قىزمەتكەرلەردىڭ جالپى شتات كولەمىندەگى ۇلەسى 4 % كەم بولماۋى ءتيىس. III توپ مۇگەدەكتىگى بار ازاماتتار مەملەكەتتىك كورپوراتسياعا ەش كونكۋرستىق ىرىكتەۋسىز جۇمىسقا ورنالاسا الادى.
