ەسكەرتكىشتىڭ اشىلۋ سالتاناتىندا وبلىس اكىمى نۇرلان نوعاەۆ: «ەل باسىنا كۇن تۋعان قيىن ساتتەردە قازاقتىڭ قايسار قىزدارى دا ەرلەرمەن بىرگە اتقا قوندى. سولاردىڭ قاتارىندا حيۋاز دوسپانوۆانىڭ ەسىمى ايرىقشا ىقىلاسپەن اتالادى. كەسكىلەسكەن شايقاستىڭ اراسىنان امان ورالعان باتىر وتاندى ءسۇيۋدىڭ ەرەن ۇلگىسىن كورسەتتى. ەلىنە ەسكەرتكىش بولىپ ورالعان حيۋاز دوسپانوۆانىڭ ەسىمى ماڭگى جاساي بەرەدى», دەدى.
اتىراۋ وبلىسىنىڭ قۇرمانعازى اۋدانىنداعى شاعىن عانا اۋىلدان «ۇشقىش بولامىن» دەگەن بالا ارمانىمەن ماسكەۋگە اتتانعان قازاقتىڭ قارشاداي قىزىن العان بەتىنەن قايتپايتىن قايسارلىعى مايدان دالاسىنا اپاردى. ەكىنشى دۇنيەجۇزىلىك سوعىستا ول 300 رەت اۋەگە كوتەرىلدى. قۇلادى, قاتتى جاراقاتتاندى, ءتىپتى اۋىر جاراقاتىنان دارىگەرلەر ەكى اياعىن كەسىپ تاستاي جازدادى. سوندا دا بەرىلمەدى. جازىلار-جازىلماستان ۇشاعىنا وتىرىپ, جاۋدىڭ بەتىن قايتارۋعا بەل شەشە كىرىستى. جەڭىستى بەرلين جەرىندە قارسى العان حيۋاز دوسپانوۆا الماتىعا ورالىپ, ءومىرىنىڭ سوڭىنا دەيىن سول قالادا تۇردى. ەسكەرتكىشتىڭ اشىلۋ سالتاناتىنا قاتىسقان تۋعان باۋىرى ەرتارعىن دوسپانوۆ: «مەنىڭ اپام حيۋازدىڭ قۇرمەتىنە قويىلعان بۇل بەلگىنى ەل شەتىنە جاۋ تيگەندە قاسقايىپ قارسى تۇرعان بارشا باتىر قىزدارعا جاسالعان تاعزىم دەپ قابىلدايمىن», دەدى.
سالتاناتتى راسىمدە حالىق قاھارمانىنىڭ ەرلىگىن ناسيحاتتاپ جۇرگەن باستاماشى توپ جەتەكشىسى, جۋرناليست تۇرسىن قاليموۆا, «پاراسات» وردەنىنىڭ يەگەرى, اقىن ءحانبيبى ەسەنقاراقىزى, جازۋشى سارا لاتيەۆا, ەسكەرتكىش اۆتورى باقىتبەك مۇحامەدجانوۆ, باستاماشىل توپ مۇشەسى ءاليا بەكقوجيەۆا, «قازاقستان» ۇلتتىق ارناسىنىڭ پروديۋسەرى جاڭىلحان اسىلبەكوۆا حيۋاز دوسپانوۆا اتىنداعى مەدالمەن ماراپاتتالدى.
حيۋاز دوسپانوۆانىڭ سوعىسقا اتتانار الدىنداعى بويجەتكەن كەزى بەينەلەنگەن ەسكەرتكىشتىڭ بيىكتىگى – 2 م 30 سم. جۇمىستىڭ اۆتورى, قازاقستاننىڭ مادەنيەت قايراتكەرى, قازاق ۇلتتىق ونەر ۋنيۆەرسيتەتىنىڭ پروفەسسورى, ءمۇسىنشى باقىتبەك مۇحامەدجانوۆ: «حالقى «قىران قىز», «قاناتتى قىز» دەپ اتاعان باتىر حيۋازدىڭ ۇشاقتان ءتۇسىپ كەلە جاتقان شاعىن قولادان قۇيۋعا تالاپتاندىق», دەيدى.
كورەر كوزگە كەلىستى دۇنيە بولىپ شىققان ەسكەرتكىش قاھارمان قىزدىڭ تۋعان جەرىمەن قايتا قاۋىشۋىن بەينەلەپ تۇرعانداي. «ەرلىك ەسكەرۋسىز قالمايدى» دەگەن وسى بولسا كەرەك.
اتىراۋ
