مەملەكەت باسشىسىنىڭ جۇمىس ۇستەلىندە تانىمال ساياساتكەر الەك روسستىڭ «بولاشاقتىڭ يندۋسترياسى», يزرايلدىك تاريحشى يۋۆال ءحاراريدىڭ ء«ححى عاسىرعا 21 ساباق», امەريكالىق ساياساتكەر پاراگ حاننانىڭ «كەلەشەكتەگى ازيالىقتار», ءجۇسىپ بالاساعۇننىڭ «قۇتتى بىلىك» سياقتى كىتاپتارى تۇر. ەلىمىزدەگى ەڭ جوعارى لاۋازىمعا سايلانعانىنا 100 كۇن تولعان پرەزيدەنتتىڭ وقۋ قاعيداسى تۋرالى اڭگىمەلەگەن اقوردانىڭ ءباسپاسوز حاتشىسى بەرىك ءۋاليدىڭ ايتۋىنشا, مەملەكەت باسشىسى جۇمىس كەستەسىنىڭ تىعىزدىعىنا قاراماستان ساياسي ادەبيەت, كوركەم شىعارمالار مەن جاڭا عىلىمي باسىلىمدارمەن تانىسۋعا ۋاقىت تابادى. ونى وقىرمانداردىڭ كوبىنىڭ ءتىسى باتا بەرمەيتىن جوعارىداعى كەسەك تۋىندىلاردان دا اڭعارۋعا بولادى. «قايتالاۋ – وقۋ اناسى» دەگەندەي, پرەزيدەنت كەلەر جىلى وتەتىن ۇلى ابايدىڭ 175 جىلدىق مەرەيتويى الدىندا ۇيىمداستىرىلعان اقىن شىعارمالارىنىڭ چەلەندجىنە قاتىسپاس بۇرىن حاكىمنىڭ قارا سوزدەرىن تاعى ءبىر مۇقيات وقىپ شىققان كورىنەدى. بۇل دا تامىرىڭا, تەگىڭە ءۇڭىلىپ وتىرۋدىڭ ۇزدىك ۇلگىسى بولسا كەرەك.
ول الەمدىك كلاسسيكانى, اسىرەسە, بۇل ساناتتا كەزدەيسوق ايتىلمايتىن ورىس ادەبيەتىن بۇگە-شىگەسىنە دەيىن بىلەدى دەۋگە بولادى. سونداي-اق كۇندەلىكتى مەرزىمدى باسىلىمداردى دا قالت جىبەرمەيتىن پرەزيدەنت Time, Economist, Le Monde جانە جەنمين جيباو جۋرنالدارىن دا ۇزبەي وقىپ تۇرادى. جانە ءار كىتاپ, گازەت نەمەسە جۋرنالداعى ماقالانى وقىعاننان كەيىن ءتيىستى تاپسىرمالار بەرەدى. ياعني, پرەزيدەنتكە اقپاراتتى العاشقى كوزدەن الۋ, كوپ وقۋ ءتان. بۇل رەتتە تانىمال سايتتار, ازاماتتاردىڭ جەكە حاتتارى دا نازاردان تىس قالمايدى. قىسقاسى, ەلدەگى جاعدايدان, حالىقتىڭ ءار توبىنداعى ازاماتتاردىڭ كوڭىل كۇيىنەن جاقسى حاباردار.
جالپى, بۇل – پرەزيدەنتكە دە, قالىڭ بۇقاراعا دا پايدالى قاسيەت. ايتالىق, ازيانىڭ كوپتەگەن ەلدەرىنە ءتان بولمىس دەۋگە بولا ما, ويلى وقىرمان ءوزى شەشەر, باسشىعا قاراپ بوي تۇزەيتىن ءۇردىس بار. ياعني, باسشىسىنا قاراپ حالقىن تانۋعا بولادى. بۇل جازىلماعان پوستۋلاتتى ءومىردىڭ وزىمەن دايەكتەيتىن مىسال جەتەرلىك. سوندىقتان «حاندا قىرىق كىسىنىڭ اقىلى بار» دەيتىن حالىقتىق ءتامسىلدى تاپسىرلەي تۇسسەك, پوليگلوت پرەزيدەنتتىڭ ەل باسقارۋ ىسىندە پاراساتتى پايىم تۇزۋىنە تولىق نەگىز بار. بۇل ەلەكتوراتتىڭ سەنىمىن بەكىتە تۇسەدى ءارى جالپى جۇرتقا جاقسى جول نۇسقايدى.
«وقى دا ءبىل, وينا دا كۇل» دەيدى حالقىمىز. ويناپ, كۇلۋ – ياعني ۋايىمسىز, قايعىسىز ءومىر ءسۇرۋ ءۇشىن دە كوپ وقۋ, كوپ دۇنيەنى توقۋ كەرەك. وقىعان, ونى توقىعان جان بار ىستە سۋدا جۇزگەن بالىقتاي, باۋىرىن جازا شاپقان بايگەدەي بولماق. بۇل – عاجاپ ەركىندىك. ويتكەنى تۇمىلدىرىقتىڭ دا, جۇگەن مەن نوقتانىڭ دا, تۇساۋدىڭ دا, كىسەننىڭ دە شەكتەي المايتىن ەركىندىگى بولسا, ول – وي. ويدى وقۋ قالىپتاستىرادى. «وي ويلاساڭ تەڭ ويلا, تەڭ ويلاساڭ كەڭ ويلا» دەگەندەي, قازىرگى sapiens قاناتى – قيال. ادام قيالدىڭ ارقاسىندا ۇشقىش كىلەمدى ۇشاق قىلدى, سامۇرىق قۇستى ەرتتەپ ءمىنىپ ەركىن سامعادى. ونەركاسىپ توڭكەرىسشىلەرىنىڭ ءوز يدەيالارىن ىسكە اسىرۋىنا قانات بىتىرگەن قيال – وقۋ مەن توقۋ ارقىلى كەلدى. سوندىقتان قازىرگى قازاق بالاسىنا وقۋ كەرەك.
كەڭەس كەزەڭىندە قازاق حالقى وقىرمان ۇلتقا اينالدى. ءتىپتى جايلاۋدا جۇرگەن مالشىنىڭ ساپتاما ەتىگىنىڭ قونىشىندا الدەبىر گازەت-جۋرنال قىستىرۋلى تۇراتىن. قالالى جەرلەردە كىتاپحانالاردىڭ وقىرمان زالدارى لىق تولى, رومانتيكالىق مۇيىستەردىڭ ءبىرى ەدى. نارىقپەن ىلەسە كەلگەن جانباعىس قيىندىعى ونىڭ ءبارىن وتكەن كۇننىڭ ەنشىسىندە قالدىردى. كەزىندە ميلليونداعان دانامەن, الدەنەشە تىلدە جارىق كورىپ جاتاتىن قازاق ادەبيەتىنىڭ بۇگىنگى جاس وكىلدەرىنە شىعارما جازۋ ارقىلى كۇن كورۋ مۇمكىن ەمەس. ءتىپتى وقۋ مادەنيەتىنىڭ كەمشىندىگى ادەبيەتتىڭ ءوز وكىلدەرىنەن دە سەزىلىپ قالادى. سودان دا جاداعاي جازبالار وقىرمانىن تاپپايدى, تاپقانى وقىرمانىنىڭ كوڭىلىن قالدىرادى. سونىمەن بىرگە كىتاپ وقۋ قولىنا قالام ۇستاعان قاۋىمنىڭ عانا عادەتى بولماۋى ءتيىس. قازىر قارىم-قاتىناستىڭ, كوممۋنيكاتسيانىڭ زامانى. مەملەكەت باسقارۋ ىسىندە, بيزنەستە, ونەردە بولسىن, اۋديتوريا الدىنداعى بەدەلدى بيىكتەتۋگە بىردەن-ءبىر ىقپال ەتەتىن ەڭ ءبىرىنشى دۇنيە – ترەنينگتەر دە, سەمينارلار دا ەمەس, وقۋ, وقۋ ارقىلى توقۋ. ايتپەسە ويى شولاقتىڭ ءسوزى دە, ءىسى دە ولاق بولىپ قالا بەرمەك.
