پارلامەنت • 19 قىركۇيەك، 2019

ماجىلىستە «پەداگوگ مارتەبەسى تۋرالى» زاڭ جوباسى تانىستىرىلدى

142 رەتكورسەتىلدى

بۇگىن ماجىلىستە «پەداگوگ مارتەبەسى تۋرالى» زاڭ جوباسى تانىستىرىلدى. بۇل تۋرالى ءماجىلىستىڭ ءباسپاسوز قىزمەتى حابارلادى.  

زاڭ جوباسى ءبىلىم بەرۋدىڭ بارلىق دەڭگەيلەرىندەگى ۇيىمداردىڭ سالاسىندا تۋىندايتىن قاتىناستاردى رەتتەۋدى قامتاماسىز ەتەتىن قۇقىقتىق تەتىكتى جەتىلدىرۋ، سونداي-اق ۇلتتىق جانە حالىقارالىق تاجىريبەنى ەسكەرە وتىرىپ، ءبىلىم بەرۋ سالاسىنىڭ زاڭناماسىنداعى قۇقىقتىق ولقىلىقتاردى جويۋ ارقىلى پەداگوگ قىزمەتىنىڭ وزەكتى الەۋمەتتىك جانە كاسىبي ماسەلەلەرىن ءتيىمدى شەشۋ ماقساتتارىندا ازىرلەندى.

زاڭ جوبالارىنىڭ نەگىزگى نورمالارى مەن وعان ىلەسپە تۇزەتۋلەر تۋرالى ءبىلىم جانە عىلىم ءمينيسترى اسحات ايماعامبەتوۆ باياندادى. جاڭا زاڭ جوباسى پەداگوگيكالىق قاۋىمداستىقتىڭ ءار وكىلىنە ءوز ويلارىمەن بولىسۋگە مۇمكىندىك بەرەدى.

زاڭ جوباسىن ازىرلەۋ كەزىندە جۇمىس توبى قۇرىلدى، ونىڭ قۇرامىنا جەتپىستەن استام مامان: پراكتيكامەن اينالىساتىن پەداگوگتەر، زاڭگەرلەر، عالىمدار، مەكتەپ باسشىلارى، قالالىق كاسىپوداق وكىلدەرى كىردى. سونىمەن قاتار، ء«بىلىمدى ەل» سايتىندا زاڭ جوباسىنىڭ جاڭالىقتارىن تالقىلاۋ ماقساتىندا پەداگوگيكالىق قوعامداستىقپەن كەرى بايلانىس ورناتۋ ءۇشىن bilimdiel.project@mail.ru ارنايى ەلەكتروندى جاشىگى اشىلدى. ناتيجەسىندە جۇمىس توبىنا 18 مىڭنان استام ءتۇرلى ۇسىنىس كەلىپ ءتۇستى.

كەلىپ تۇسكەن ۇسىنىستار ۇلكەن ءتورت بولىمگە بولىنگەن: مۇعالىمنىڭ قۇقىقتارىن كەڭەيتۋ جانە وقۋ جۇكتەمەسىن ازايتۋ، ماتەريالدىق ەمەس ىنتالاندىرۋ، ماتەريالدىق ستيمۋل جانە ءبىلىم جۇيەسىن جەتىلدىرۋ بويىنشا ءىس-شارالار.

ءوز بايانداماسىندا، مينيستر ماتەريالدىق ەمەس ستيمۋلدارعا ەرەكشە توقتالدى. اتاپ ايتقاندا، ءبىرىنشى كەزەكتە بالاباقشالاردان ورىن بەرۋ، «قازاقستاننىڭ ەڭبەك سىڭىرگەن ۇستازى» مەملەكەتتىك ماراپاتتىڭ جاڭا ءتۇرىن ەنگىزۋ. سونداي-اق اسكەري قىزمەتكە شاقىرۋدى كەيىنگە قالدىرۋ، اۋىلدىق جەردە جۇمىس ىستەيتىن مۇعالىمدەردىڭ ەڭبەكاقىسىن ارتتىرۋ، دەنساۋلىق ساقتاۋ، «ۇزدىك پەداگوگ»، «جوعارى وقۋ ورنىنىڭ ۇزدىك وقىتۋشىسى» گرانتتارى سياقتى قولدانىستاعى بارلىق الەۋمەتتىك كەپىلدىكتەر ساقتالادى.

تانىستىرىلىم بارىسىندا دەپۋتاتتار قاراۋىنا پەداگوگ مارتەبەسى، وقۋشى مەن مۇگالىمگە جۇكتەمەنى تومەندەتۋ ماسەلەلەرى بويىنشا تۇزەتۋلەر دە ەنگىزىلدى. ىلەسپە زاڭ جوباسىندا بىرقاتار ۇعىمداردى اشۋعا جانە بەكىتۋگە، قايتالاناتىن جانە ەسكىرگەن نورمالاردى الىپ تاستاۋعا، قوعامداعى پەداگوگ مارتەبەسىن ارتتىرۋ سالاسىنداعى زاڭناما نورمالارىنىڭ ولقىلىقتارى مەن قايشىلىقتارىن جويۋعا، وقۋشى مەن مۇعالىمگە جۇكتەمەنى تومەندەتۋگە باعىتتالعان وزگەرىستەر مەن تولىقتىرۋلار كوزدەلگەن.

تانىستىرىلىمعا ءماجىلىس دەپۋتاتتارى، ءبىلىم جانە عىلىم مينيسترلىگى، ۋاكىلەتتى مەملەكەتتىك ورگانداردىڭ، جوعارى جانە ورتا ءبىلىم بەرۋ ۇيىمدارىنىڭ وكىلدەرى قاتىستى.

تانىستىرىلىمدى قورىتىندىلاي كەلە، ءماجىلىستىڭ الەۋمەتتىك-مادەني دامۋ كوميتەتىنىڭ ءتورايىمى گۇلشارا ابدىقالىقوۆا زاڭ جوبالارىن قاراۋ، ەسكەرتۋلەر مەن ۇسىنىستاردى ەسكەرە وتىرىپ، جۇمىس توبىندا جالعاساتىنىن اتاپ كەتتى. زاڭ جوبالارى ودان ءارى دەپۋتات ءابدىماناپ بەكتۇرعانوۆ باسقاراتىن جۇمىس توبىندا تالقىلاناتىن بولادى.

سوڭعى جاڭالىقتار

ارىماس ابىروي

رۋحانيات • كەشە

كونەدەن كەلگەن كونەك

رۋحانيات • كەشە

شىمبۇلاق شاڭعى ماۋسىمىن اشتى

قىسقى سپورت • كەشە

اتباسار

رۋحانيات • كەشە

ۇقساس جاڭالىقتار