قازاقستان • 18 قىركۇيەك، 2019

الماتىنىڭ جاس عالىمدارى ونەرتابىس پاتەنتىنە يە بولدى

76 رەت كورسەتىلدى

قازاق ۇلتتىق قىزدار پەداگوگيكالىق ۋنيۆەرسيتەتىنىڭ جاس عالىمدارى «Bi0،1Dy0،9MnO3 قۇرامدى ۆيسمۋتپەن دوپيرلەنگەن ديسپروزي مانگانيتىن الۋ جولى» اتتى پاتەنتكە يە بولدى، دەپ حابارلايدى وقۋ ورنىنىڭ ءباسپاسوز قىزمەتى.

يننوۆاتسيالىق ونەرتابىس نانوقۇرىلىمدى بەيورگانيكالىق ماتەريال سينتەزدەپ العانى ءۇشىن بەرىلىپ وتىر.

حيميا عىلىمدارىنىڭ دوكتورى، پروفەسسور مۇحامەتقالي ماتاەۆتىڭ جەتەكشىلىگىمەن جاراتىلىستانۋ فاكۋلتەتىنىڭ وقىتۋشىلارى جانار تۇرسىنوۆا، ءمولدىر ابدرايموۆا مەن اسەل كەزدىكباەۆا بىرنەشە جىلدان بەرى وقۋ ورنىنداعى كەشەندى حيميا-بيولوگيالىق عىلىمي-زەرتتەۋ ورتالىعىندا تاجىريبە جۇرگىزىپ كەلەدى. تاباندى ەڭبەك پەن ىزدەنىس بوسقا كەتكەن جوق. عىلىمي ورتادا مويىندالدى، ايتارلىقتاي ناتيجەگە قول جەتكىزدى.

عالىمدار الداعى ۋاقىتتا دا وسى تاراپتاعى زەرتتەۋلەرىن جالعاستىراتىندىعىن ايتادى. وعان ۋنيۆەرسيتەتتىڭ ماتەريالدىق-تەحنيكالىق بازاسى تولىق مۇمكىندىك بەرەدى.

– ونەرتابىس پەروۆسكيت قۇرىلىمى بار جاڭا قاتتى ەرىتىندىلەردى الۋ تەحنولوگياسىنا جاتادى جانە حيميالىق ونەركاسىپتە قولدانىس تابادى. سونىمەن قاتار ول سپينترونيكا ەلەمەنتتەرىن جاساۋ كەزىندە جانە اقپاراتتى جازاتىن ماگنيتتىك تاسىمالداعىشتاردىڭ تىعىزدىعىن ارتتىرۋ ءۇشىن پايدالانىلادى، – دەيدى عالىمدار.

ۋنيۆەرسيتەتتىڭ ءباسپاسوز قىزمەتىنىڭ جەتەكشىسى جاندار اساننىڭ اقپاراتىنا سۇيەنەر بولساق، بۇل عىلىمي توپ  يەلەنگەن ەكىنشى پاتەنت. عالىمدار بۇعان دەيىن «YbBiNaFeO5 قۇرامدى ۆيسمۋتتى – فەرريتتى الۋ جولى» اتتى ونەرتابىسقا يە بولعان ەدى. ول نانوقۇرىلىمدى بەيورگانيكالىق ماتەريالدى سينتەزدەپ العانى ءۇشىن بەرىلگەن.

سوڭعى جاڭالىقتار

شىرقاۋ شىڭى شوقاننىڭ

رۋحانيات • كەشە

ۇقساس جاڭالىقتار