«مايلى قيان» ماڭعىستاۋدىڭ ءدۇر ەرلەرىنىڭ – كوك سۇڭگىلى باتىرلارىنىڭ, «تۋرا بيدە تۋعان جوق» دەپ ءادىلىن ايتىپ قاسقايىپ وتكەن بي-شەشەندەردىڭ, ماڭدايىنا بىتكەن مال-مۇلكىنىڭ بەرەكەسىن ەل-جۇرتىمەن بولىسكەن ساقيمىرزالار مەن ەل باسقارعان رۋباسىلاردىڭ, سونداي-اق رۋحاني كوسەمدەردىڭ ماڭگىلىك مەكەنى. بۇگىنگى تىلمەن ايتساق, ەلدىڭ ماقتان تۇتار تۇلعالارى تاڭداپ تۇرىپ جەرلەنەتىن پانتەون. ماڭعىستاۋداعى كاسىپكەر, ەلدىك ماسەلەلەرگە بەيجاي قاراي المايتىن ازاماتتاردىڭ ۇيىمداستىرۋىمەن سيسەم اتاعا جانە سول قاۋىمداعى اتا-بابالار رۋحىنا ارنالىپ بەرىلگەن اس حالىقتىڭ زور قولداۋىنا يە بولدى. 130 كيىز ءۇي تىگىلىپ, 5000-نان اسا ادام جيىلعان اس ەكى كۇنگە سوزىلدى. استا ماڭعىستاۋ وبلىسىنىڭ اكىمى س.ترۇموۆ, بەلگىلى اقىن س.نۇرجان, ۇيىمداستىرۋشىلار اتىنان بەلگىلى كاسىپكەر س.مۇساباەۆ سويلەپ, استىڭ مانىنە, ونىڭ سيسەم اتا باسىندا بەرىلۋىنىڭ ماڭىزدىلىعىنا توقتالدى.
اس باعدارلاماسىندا ارۋاقتارعا قۇران باعىشتالىپ, اتا شاپان تاراتىلدى, وشاق بايگە, الامان بايگە, قازاق كۇرەسى, اقىندار ءمۇشايراسى مەن جىرشى-جىراۋلار بايقاۋى ۇيىمداستىرىلدى. استىڭ العاشقى كۇنىندە وتكەن وشاق بايگەگە قاتىسقان 30-عا جۋىق جۇيرىك 21 شاقىرىم, 6 اينالىمدى باعىندىردى. ناتيجەسىندە اقتاۋلىق ا.ابدۋلدانوۆتىڭ «حانشايىمى» 1-ورىندى يەلەنىپ, 1 ميلليون تەڭگەنى جەڭىپ الدى. شەبىر اۋىلىنان ا.ەرجىگىتوۆتىڭ «ايجيرەنى» ەكىنشى, تاۋشىق اۋىلىنان كەلگەن ح.بيمىرزاەۆتىڭ «كوكباستاۋى» ءۇشىنشى ورىننان كورىندى. اسقا كەلگەن اعايىننىڭ اڭسارىن اۋدارعان 36 شاقىرىمدى ون اينالىمدا شاۋىپ ءوتۋ مەجەلەنگەن الامان بايگەدە الماتى قالاسىنان كەلگەن قايرات ماحانوۆتىڭ «قويانقاسقاسى» مارە سىزىعىن ءبىرىنشى بولىپ كەسىپ ءوتىپ, اقتاۋ قالاسىنان ەكى بولمەلى پاتەردىڭ كىلتىن قانجىعاسىنا بايلادى. ەكىنشى ورىننان استانالىق بازارباي نۇريسلامنىڭ «دارابوزى» كورىنسە, ءۇشىنشى ورىننىڭ جۇلدەسىن قۇلسارىلىق «باحاي» كورپوراتسياسىنىڭ «جەتى قازىنا» اتتى جۇيرىگى ەنشىلەدى. وشاق جانە الامان بايگەلەردە جۇلدە تەك ءۇش ورىنمەن شەكتەلىپ قالماي, ءتورتىنشى, بەسىنشى ورىندا كەلگەن جۇيرىكتەر دە سىي-سياپاتتارعا يە بولدى.
قازاق كۇرەسىنە الدىن الا بەكىتىلگەن ەرەجەگە ساي سالماعى 90 كگ-نان, جاسى 18-دەن اسقان 21 بالۋان قاتىستى. ارالارىندا حالقىمىزدىڭ ايتۋلى بالۋان ۇلدارى – «الەم بارىسىنىڭ» ەكى دۇركىن, «قازاقستان بارىسىنىڭ» ەكى دۇركىن جەڭىمپازى, قازاقستاننىڭ بىرنەشە دۇركىن «تۇيە پالۋانى» ا.نۇعىماروۆ, «قازاقستان بارىسىنىڭ» كۇمىس, ەكى رەت قولا جۇلدەگەرى ر.ابدىرازاقوۆ, تۇركىستان وبلىسىنان كەلگەن «الەم بارىسىنىڭ» كۇمىس جۇلدەگەرى, قازاقستاننىڭ بىرنەشە دۇركىن جەڭىمپازى ە.مۇزاپاروۆ, سونداي-اق نەبىر دودالاردا ولجا سالعان قاراعاندىلىق ب.احمەتبەكوۆ, قوس قىزىلوردالىق م.يساعابىلوۆ پەن ن.سالىمگەرەەۆ, دزيۋدودان بىرنەشە دۇركىن رەسەي فەدەراتسياسىنىڭ جەڭىمپازى, سامبودان ەۋروپا چەمپيونى ا.حانبيەۆ, حالىق ىقىلاسىمەن «قارا بۋرا» اتانعان ماڭعىستاۋلىق پالۋان ن.جارىلعاپوۆ سىندى «سەن تۇر, مەن اتايىن» ايتۋلى پالۋاندار قاتىسقان كۇرەستە ن.جارىلعاپوۆ باس جۇلدە – اقتاۋ قالاسىنان ءبىر بولمەلى پاتەردى يەلەندى. ەكىنشى ورىندى رەسەيلىك ا.حانبيەۆ, ءۇشىنشى ورىندى ە.مۇزاپاروۆ يەلەندى.
جىرشىلار مەن اقىنداردىڭ جىرلارى دا كورەرمەننىڭ قوشەمەتىنە يە بولىپ, ارالارىنان ءوز جۇيرىكتەرىن انىقتاپ بەردى.
سيسەم اتاداعى اس تەك قىزۋ تارتىسپەن وتكەن سپورتتىق شارالارىمەن قىزىقتى بولعان جوق, بابالار رۋحىن قاستەرلەپ, ۇرپاق ساناسىن جاڭعىرتار تاعىلىمدىلىعىمەن تارتىمدى بولدى. ء«ولى رازى بولماي, ءتىرى بايىمايدى» دەيتىن حالقىمىز, ماڭعىستاۋداعى «مەن» دەگەن ەرلەردىڭ «سۇيەگىم سيسەمدە قالسا» دەگەن ارمانىنا اينالعان قاسيەتتى ورىندا بەرىلگەن اس – ولىلەر رۋحىن شاتتاندىرىپ, تىرىلەر ءۇشىن ساۋاپ بولار شارا دەپ ەسەپتەيمىز. وقىلعان قۇران سۇرەلەرىنىڭ, بەرىلگەن اس-ساداقانىڭ شاپاعاتى تەك ءبىر قاۋىم ەمەس, «تىرشىلىك ساپارىن اياقتاعاندا كەلىپ جاتار ماڭگىلىك مەكەنىنىڭ ءبىر ۋىس توپىراعى پەندە تۋىلعان ساتتە-اق بۇرق ەتە قالادى» دەيتىن حالىق نانىمىنا سايكەس, توپىراعى سيسەم اتا قاۋىمىنان تىسقارى بۇيىرعان كۇللى اۋليە-انبيەلەردىڭ ارۋاعىنا باعىشتالعان اۋقىمدى اس – ماڭعىستاۋ تاريحىندا قالار ءىرى ءارى ىزگى شارا بولدى.
ماڭعىستاۋ وبلىسى
