قۇجات تۋرالى قارجى ءمينيسترىنىڭ ءبىرىنشى ورىنباسارى بەرىك شولپانقۇلوۆ باياندادى.
زاڭ جوباسى «استانا» حالىقارالىق قارجى ورتالىعىنىڭ قىزمەتىن ودان ءارى دامىتۋ ماقساتىندا ازىرلەندى. قازاقستاندا ينۆەستيتسيالىق سالىقتىق رەزيدەنتتىك باعدارلاماسىن قولدانۋ ۇسىنىلادى.
ينۆەستيتسيالىق رەزيدەنتتىك باعدارلاماسى – قازىرگى الەمدە ايتارلىقتاي كەڭ تارالعان قۇبىلىس جانە بۇگىندە رەزيدەنتتىك باعدارلاماسىنىڭ ەكى ءتۇرىن ۇسىناتىن 80-نەن استام وسىنداي باعدارلاما جۇمىس ىستەيدى. ءبىرىنشى ءتۇرى – اقش, كانادا, يسپانيا سياقتى ەلدەردە, سونداي-اق لاتۆيا مەن گرەتسيادا ىسكە اسىرىلىپ جاتقان باعدارلامالار, ولار ينۆەستيتسيالاردىڭ ورنىنا تۇرۋعا ىقتيارحات بەرەدى. باعدارلامانىڭ ەكىنشى ءتۇرى ينۆەستيتسيالىق ۆيزانى جانە ەلدىڭ سالىق رەزيدەنتتىگىن الۋدى (ياعني, ينۆەستيتسيالىق سالىق رەزيدەنتتىگى باعدارلاماسى) قامتيدى.
مۇنداي ەلدەردىڭ قاتارىندا يتاليا, شۆەيتساريا, كيپر مەن ۇلىبريتانيا بار.
«قازاقستاندا باعدارلامانىڭ ەكىنشى ءتۇرىن – ينۆەستيتسيالىق سالىق رەزيدەنتتىگىن قولدانۋ ۇسىنىلادى. وسىلايشا, زاڭ جوباسىندا «ينۆەستيتسيالىق رەزيدەنت» ۇعىمى مەن ينۆەستيتسيالىق سالىقتىق رەزيدەنتتىك باعدارلاماسى ەنگىزۋ قاراستىرىلعان», دەپ اتاپ ءوتتى بەرىك شولپانقۇلوۆ.
ونىڭ ايتۋىنشا, ينۆەستيتسيالىق سالىقتىق رەزيدەنتتىك باعدارلاماسى احقو اكتىسىمەن بەكىتىلەدى, بىراق مىندەتتى تۇردە ۋاكىلەتتى مەملەكەتتىك ورگاندارمەن, اتاپ ايتقاندا, ۇلتتىق ەكونوميكا, سىرتقى جانە ىشكى ىستەر مينيسترلىكتەرى, سونداي-اق ۇلتتىق قاۋىپسىزدىك كوميتەتىمەن كەلىسىلەتىن بولادى. باعدارلامادا ينۆەستيتسيالاۋدىڭ كولەمدەرى مەن قۇرالدارى, ينۆەستيتسيالىق سالىقتىق رەزيدەنتتىكتى الۋ راسىمدەرى انىقتالاتىن بولادى.
«ينۆەستيتسيالىق سالىقتىق رەزيدەنتتىك باعدارلاماسىنىڭ نەگىزگى تۇجىرىمداماسى – ينۆەستورلار مەن ولاردىڭ وتباسى مۇشەلەرىنىڭ قازاقستان رەسپۋبليكاسىنا كوپرەتتىك كىرۋ ۆيزاسىن الۋعا ايىرباستاپ, ينۆەستيتسيالار تارتۋ. الەۋەتتى ينۆەستورلار احقو بيرجاسىندا اينالاتىن قارجى قۇرالدارى مەن باعالى قاعازدارعا ءوز قاراجاتتارىن ينۆەستيتسيالايتىن بولادى», دەپ ب. شولپانقۇلوۆ تۇسىنىك بەردى.
سونداي-اق زاڭ جوباسى ينۆەستيتسيالىق سالىق رەزيدەنتتەرىنە قازاقستان رەسپۋبليكاسىنان تىس كوزدەردەن تۇسكەن كىرىستەر بويىنشا جەكە تابىس سالىعىن تولەۋدەن بوساتۋدى ۇسىنادى. بۇل رەتتە, قازاقستان رەسپۋبليكاسىنىڭ ىشىندە پايدا بولعان كىرىستەرگە سالىق كودەكسىنە سايكەس سالىق سالىنادى, ال شەتەلدەن تۇسكەن كىرىستەرگە سالىق سالىنبايدى.
بۇل ءوز سالىق شىعىستارىن وڭتايلاندىرۋعا تالپىناتىن ينۆەستورلاردىڭ مۇددەلەرى ءۇشىن جاسالۋدا, وسىلايشا ول ەلدىڭ ينۆەستيتسيالىق تارتىمدىلىعىن ارتتىرادى.
تۇزەتۋلەردىڭ ەكىنشى بلوگى ورتالىقتىڭ قىزمەتىنە بايلانىستى نورمالاردى ناقتىلايدى. سالىق كودەكسىندە احقو («استانا» حالىقارالىق قارجى ورتالىعى) قاتىسۋشىلارىنىڭ قىزمەتتەرى كىرمەيتىن ققس-تان (قوسىلعان قۇنعا سالىناتىن سالىق) بوساتىلعان قارجى قىزمەتتەرىن ىسكە اسىرۋ بويىنشا اينالىمدار ءتىزىمى انىقتالعان. سوندىقتان زاڭ جوباسىندا احقو قاتىسۋشىلارىنىڭ قىزمەتتەرىنە ققس تولەۋدەن بوساتۋ قاراستىرىلعان.
سونىمەن قاتار, «استانا» حالىقارالىق قارجى ورتالىعىنىڭ ورگاندارى ساتىپ الۋ راسىمدەرىن رەتتەيتىن اكتىلەردى قابىلداۋعا قۇقىلى بولادى. تانىستىرىلىمعا ءماجىلىس دەپۋتاتتارى, ۇلتتىق بانك, ۇلتتىق قاۋىپسىزدىك كوميتەتىنىڭ, قارجى, ىشكى ىستەر, ۇلتتىق ەكونوميكا, سىرتقى ىستەر مينيسترلىكتەرىنىڭ, «استانا» حالىقارالىق قارجى ورتالىعىنىڭ اكىمشىلىگى» اق وكىلدەرى قاتىستى.
زاڭ جوباسى ودان ءارى قارجى جانە بيۋدجەت كوميتەتىنىڭ مۇشەسى دانيا ەسپاەۆا جەتەكشىلىك ەتەتىن جۇمىس توبىندا تالقىلاناتىن بولادى.
