قوعام • 09 قىركۇيەك، 2019

حات قورجىن (09.09.2019)

6608 رەتكورسەتىلدى

...ءوتىنىش بىلدىرەدى

بەينەتتىڭ زەينەتىن كورسەك دەپ ەدىك...

ءبىر كەزدەرى تىل ەڭبەككەرلەرىنە جاعداي جاساپ، ولاردى سوعىس ارداگەرلەرىمەن تەڭەستىرسە دەگەن پىكىرلەر ايتىلعان بولاتىن. ءارتۇرلى كوممۋنالدىق قىزمەت، ءجۇرىپ-تۇرۋداعى جولاقىسى، دەمالىس ۇيلەرىنە جولداما بەرۋ سياقتى ىستەردە جەڭىلدىكتەر قاجەت دەگەن ەدى. وكىنىشكە قاراي، ول اڭگىمەلەر ءسوز جۇزىندە قالىپ، قازىر بۇل ماسەلە ءسوز بولمايتىن بولدى.

ەكىنشى دۇنيەجۇزىلىك سوعىس جىلدارىندا تىل ەڭبەككەرلەرىنىڭ ءومىرى جەڭىل بولعان جوق. سول كەزدەگى قيىنشىلىقتى باستان وتكىزگەننىڭ ءبىرى مەنمىن. ءبىزدىڭ بالالىق شاعىمىز سوعىس جىلدارىنداعى قيىنشىلىقتارعا تاپ بولدى.

«كورمەسەك تە سوعىستى، توبەمىزدەن وق ۇشتى» دەپ اقىن جىرلاعانداي، قاندى قىرعىندى باستان كەشپەسەك تە ماساق تەرگەن، شارۋاشىلىقتىڭ اۋىر جۇمىسىنان ازاپ شەككەن انالاردىڭ كوز جاسىنا شومىلىپ، قۇشاعىندا بۋلىقتىق. قاپتاعان «قارا قاعازدار»، اڭىراعان انالاردىڭ قاسىرەتىن كورىپ ەرتە ەر جەتتىك. ءبىز دە دۇشپاننان كەك الامىز دەپ تەزىرەك ەر جەتۋگە اسىقتىق.

3-سىنىپتان باستاپ بىزدەردى ەگىننىڭ ارام ءشوبىن جۇلۋعا اپارسا، 6-7 سىنىپتا سوقانىڭ وگىزىن جەتەلەدىك. ەرەسەكتەرىمىز ءشوپ شابۋ، كومباينشىنىڭ كومەكشىسى بولدى. ءسويتىپ بار جۇمىس تۇرىنە ارالاستىق.

باۋىرجان مومىش ۇلىنىڭ: «تىل مىقتى بولماي مايدان دالاسىندا جەڭىسكە جەتۋ مۇمكىن ەمەس»، دەگەن ءسوزى بار. سول تىلدىڭ مىقتى بولۋىنا شامامىز كەلگەنشە ۇلەس قوستىق. ءسويتىپ جەڭىستى جاقىنداتۋدا ءبىزدىڭ دە، تىل ەڭبەككەرلەرىنىڭ دە ەڭبەگى بار ەمەس پە؟!

قازىر سولاردىڭ ەڭ جاسى 82-گە كەلدى. ءتىپتى اۋدانداردا، وبلىستاردا، رەسپۋبليكا بويىنشا دا ساناۋلى-اق ادامدار قالعانى انىق. بۇل كۇندە ەلىمىز دامىعان 50 ەلدىڭ قاتارىندا، ەكونوميكامىز كۇشەيدى. ءبىزدىڭ تىل ەڭبەككەرلەرىنىڭ قيىن كەزەڭدەگى ەڭبەگى ەسكەرىلىپ، ءتيىستى قۇرمەت كورسەتىلىپ، جەڭىلدىك-كومەك كورسەتۋگە ەلىمىزدىڭ تولىق مۇمكىندىگى بار دەپ ويلايمىن.

 

تىل ەڭبەككەرلەرى اتىنان

ءىلياس سادىقوۆ

الماتى وبلىسى

 

...پىكىرىن جولدايدى

اباي – قازاقتىڭ تەمىرقازىعى

كەيىنگى ۋاقىتتا حاكىم ابايدىڭ ايتقان ءسوزىن، جازعان ناقىلىن بۇرمالاپ، ءبىر عانا وسيەتىنە باعا بەرىپ، سول ارقىلى ابايدىڭ ەڭبەگىنە تيىسەتىن دانىشپانسىماقتار كەزدەسۋدە. ابايدىڭ ءسوزىن تۋرا ماعىناسىندا ءتۇسىنۋ ۇلكەن قاتەلىك. ونى ءتۇسىنۋ ءۇشىن تۇيسىككە ءتۇيىپ، ۇعىنۋ ءۇشىن تەرەڭ ءبىلىم مەن سانا كەرەك. اباي ءداۋىرىنىڭ تاريحى مەن ماسەلەلەرىن جەتىك بىلەتىن قابىلەت قاجەت.

اباي قازاقتىڭ كەمشىل تۇسىن ايتسا – جەك كورگەندىكتەن ەمەس، ۇلى ۇلت بولسىن دەپ ايتتى ەمەس پە؟! بىراق ونى تۇسىنبەيتىن، ساناسى تايازدار دا بار ەكەن. سوندىقتان دا «قايران ءسوزىم قور بولدى» دەپ اقىن كەزىندە ءبىر كۇرسىنگەن-اۋ. اباي – قازاقتىڭ تەمىرقازىعى. ءوزىم سويتەمىن. اعىلشىندار نەگە شەكسپيردى سوكپەيدى؟ ورىستار نەگە پۋشكيندى ءپىر تۇتادى؟ ال قازاق نەگە ءوز ۇلىسىن جامان جاقتان تالقىلاۋعا ءتيىس. ۇلىبريتانيا شەكسپيردىڭ «وتەللو»، «ماكبەت»، «گاملەت» پەن «رومەو مەن دجۋلەتتاسىنا» ارناپ سان فيلم ءتۇسىردى. قازاق ابايدىڭ قاي قارا سوزىنە، پوەماسىنا نەشە فيلم ءتۇسىردى؟ ەندەشە نەگە وسى جاعىن تالقىلامايمىز؟ ابايدى جامانداعانىڭ – ءوزىڭدى جامانداعانىڭ عوي!

 

اسحات قاسەنعالي

 

...ۇلگى تۇتادى

اشىق اسپان استىنداعى كينو

شەتپەدە العاش رەت «اشىق اسپان استىنداعى كينو» جاستار شاراسى ءوتتى. الەمدىك كينونىڭ ەڭ ۇزدىكتەرى مەن وتاندىق كينونى ناسيحاتتاپ، جاستارعا كينو ونەرىن كورسەتۋگە ارنالعان ءىس-شارانىڭ بۇل بيىلعى وتكىزگەن ءبىرىنشى كەشى ەمەس. وسىناۋ يگى باستاما ەلباسىنىڭ «رۋحاني جاڭعىرۋ» ماقالاسىنىڭ اياسىندا وتكىزىلىپ وتىر. سونداي-اق اۋداندىق شارا بيىلعى جاستار جىلىنا ورايلاستىرىلدى. اتالمىش يگى شاراعا كورەرمەن رەتىندە اۋداننىڭ ءار تۇكپىرىنەن جاستار مەن ستۋدەنتتەر اعىلىپ كەلۋدە.

 اشىق اسپان استىنداعى كينو شەتپەدەگى جاستار، اسىرەسە حالىق كوپ شوعىرلاناتىن جاستار ورتالىعى جانىندا، ياعني اشىق اسپان استىندا ۇيىمداستىرىلدى. شارادا العاشقى كۇنى «تراسنفورمەر»، ء«ۇي قويانى پيتەر»، قازاق كينوسى «شابدالى» كوركەم فيلدەرى جاستار نازارىنا ۇسىنىلدى.

 «كەشكى 21.30-دان 23.00 ارالىعىندا ءار اپتانىڭ سەيسەنبى كۇنى ءوتىپ تۇرعان شارامىزعا اۋىل تۇرعىندارى مەن جاستارى ءاۋ باستان كوپ جينالدى. جاستاردىڭ تالعامى مەن كوڭىلى نەنى قالايدى، سوعان قاراي ىڭعايلاناتىن بولامىز. ەڭ العاش حالىققا، جاستارعا كورسەتكەن ءفيلمىمىز «تراسفورمەر» دەپ اتالادى، ول جاڭا عاسىر تەحنولوگيالارىنان، روبوتتاردىڭ الەمىنەن حاباردار ەتەدى. بۇدان سوڭ ء«ۇي قويانى پيتەر» ەرەسەكتەرگە ارنالعان مۋلتفيلم. ەندىگىسى قازاقستاندىق ءونىم «شابدالى» كينوسى. بۇل كينو قازاقى تاربيە مەن وتباسىلىق ءتالىمدى كەڭىنەن ناسيحاتتايدى. الداعى ۋاقىتتا تاريحي جانرداعى كينولاردى كورسەتۋ جوسپاردا بار»، دەيدى جاس­تار ورتالىعىنىڭ مامانى ءاليا نۇربەرگەنقىزى.

 

قالامپىر تولەگەنقىزى،

جاستار ورتالىعىنىڭ مامانى

ماڭعىستاۋ وبلىسى،

ماڭعىستاۋ اۋدانى

 

...العىسىن جەتكىزەدى

ءوز ءىسىنىڭ مايتالماندارى ەكەن

بۇگىندە «بالداۋرەن-قاپشاعاي» رەسپۋبليكالىق وقۋ-ساۋىقتىرۋ ورتالىعى بالالار مەن جاسوسپىرىمدەر دەمالىسىن ۇيىمداستىراتىن بىرەگەي لاگەرگە اينالدى. اۋىسىمنىڭ ۇزاقتىعى وتە قولايلى، جاز مەزگىلىندە وقۋشىلار 15 كۇننەن تىنىعادى. بالالارعا قازىرگى زامان تالابىنا ساي جابدىقتالعان مەديتسينالىق وڭالتۋ-ساۋىقتىرۋ بولمەلەرى قىزمەت كورسەتەدى. كۇنىنە بەس مەزگىل دارۋمەندەرگە باي جەمىس پەن قۇنارلى تاعام بەرىلەدى.

ساۋىقتىرۋ جانە پروفيلاكتيكالىق ءىس-شارالارى قاتارىندا – ماسساج، سۋ پروتسەدۋرالارى، ەمدەلۋ ۆاننالارىن ايتۋعا بولادى. اتالعان ساۋىقتىرۋ ورتالىعىنىڭ مەديتسينالىق قىزمەت كورسەتۋ جۇمىسى وتە جوعارى دەڭگەيدە، دارىگەر، مەدبيكەلەر ءوز ءىسىنىڭ مايتالماندارى، بىلىكتى مامان ەكەنىن بايقاۋعا بولادى. ولار بالالاردىڭ دەنساۋلىعىن ءجىتى نازاردا ۇستايدى. وسى ورايدا «بالداۋرەن-قاپشاعاي» لاگەرىنىڭ مەديتسينالىق كورپۋسىنىڭ باس دارىگەرى نۇربول تەمىرقۇلوۆ، مەدبيكەلەر تاتيانا فەدوتوۆا، كۇرالاي جۇماحمەتوۆاعا نۇر-سۇلتان قالاسىنىڭ اتا-انالار قاۋىمىنىڭ اتىنان العىس بىلدىرەمىز.

 

ەركە تولباقان،

ج.جاباەۆ اتىنداعى №4 مەكتەپ-گيمنازياسى ديرەكتورىنىڭ ورىنباسارى

 نۇر-سۇلتان

 

 

سوڭعى جاڭالىقتار

تارالىم ءھام قارالىم

100 • بۇگىن، 06:55

تارحان تەكتى رەداكتور

100 • بۇگىن، 06:40

ءجۇز جىل

100 • بۇگىن، 06:27

ۇشقىر ويلار ۇشقىندارى

100 • بۇگىن، 06:11

ۇلكەن جولدىڭ ۇزىكتەرى

100 • بۇگىن، 05:58

ينۆەستيتسيا – دامۋ داڭعىلى

ايماقتار • بۇگىن، 05:49

ارىماس ابىروي

رۋحانيات • كەشە

كونەدەن كەلگەن كونەك

رۋحانيات • كەشە

ۇقساس جاڭالىقتار