كوكجيەكتى كەڭەيتكەن كەڭەس

تاريحي جيىن نوماد سيتي حولل سارايىندا گالا-كونتسەرتپەن ءتامامدالدى. سالتاناتتى شاراعا مادەنيەت جانە سپورت ۆيتسە-ءمينيسترى نۇرعيسا داۋەشوۆ قاتىسىپ, مينيستر اقتوتى رايىم­قۇ­لوۆا­نىڭ قۇتتىقتاۋ حاتىن وقىپ بەردى. «ادامزات وركەنيەتى بۇگىندە رۋحاني ساباق­تاستىقتى, ورتاق قۇندىلىقتاردى ءسىڭىرۋ مەن ناسيحاتتاۋعا ءزارۋ. وسىنداي جاھاندىق ماسەلەنى نەگىزگە الا وتىرىپ, ازيا قالامگەرلەرىنىڭ ءبىرىنشى فورۋمى «ورتاق تامىر. ورتاق دۇنيەتانىم. ورتاق وركەنيەت» دەگەن اتاۋمەن وتكىزىلدى. بۇل ءبىر جاعىنان عالامدىق تاقىرىپ بولسا, ەكىنشى جاعىنان قازاقستاننىڭ بىرلىك پەن بەيبىتشىلىككە باعىتتالعان گەوساياسي ۇستانىمىن كورسەتەدى. فورۋم اياسىندا ايتىلعان سىندارلى پىكىر, تو­لىمدى ويلار ورتاق تامىردان ءنار الىپ, ورتاق دۇنيەتانىمعا تەرەڭ بويلاپ, ورتاق وركەنيەتتى كورسەتەتىن قۇندى شىعار­مالاردى تۋدىرۋعا سەپتىگىن تي­گىزەدى دەپ وي­لايمىن. ەلىمىزدىڭ استاناسى نۇر-سۇل­تان قالاسىندا وتكىزىلگەن فورۋمعا ازيا قۇرلىعىن مەكەن ەتكەن 38 شەت مەملەكەتتەن سەكسەننەن استام قالامگەردىڭ كەلۋى فورۋم­نىڭ عالامدىق سيپاتتا ەكەنىن كور­سەتەدى», دەلىنگەن حاتتا.

سونداي-اق مينيستر قۇتتىقتاۋ حاتىندا اتالعان شارانىڭ تۇڭعىش پرەزيدەنت – ەلباسى ن.ءا.نازارباەۆتىڭ «رۋحا­ني جاڭ­عىرۋ» باعدارلاماسى اياسىندا قولعا الىنعانىن ەرەكشە اتاپ وتكەن. «ازيا وركەنيەتى تۋرالى ءسوز بولعاندا بىردەن ويعا ورالاتىن ۇلى جىبەك جولىنىڭ ەكو­نوميكالىق ماڭىزىن عانا ەمەس, ونىڭ تۇتاس وركەنيەتتەردى توعىستىراتىن كۇش­كە يە بول­عانىن ەسكەرۋ قاجەتتىگىن باسا كورسەتكەن مەم­لەكەت باسشىسى قاسىم-جومارت توقاەۆ ءوز بايانداماسىندا ازيا ادەبيەتىن ودان ءارى دامىتۋ ءۇشىن بىرقاتار ماڭىزدى ماسە­لە­­گە قالام­گەرلەردىڭ نازارىن اۋدارتتى. مەم­لەكەت باسشىسىنىڭ «ازيا الىبى» حا­لىقارالىق ادەبي سىيلىعىن تاعايىن­داۋ جانە ازيا قا­لامگەرلەرى تۋىندىلارىنىڭ ءبىر­تۇتاس ەلەكتروندى كىتاپ­حاناسىن قۇرۋ تۋ­را­لى بىلدىرگەن ۇسى­نىستارى بارشامىزعا وي تاستاپ, سەرپىن بەر­گەنى انىق», دەيدى مينيستر.

قالامگەرلەر قاۋىمىنىڭ بۇل جيىنى شىن مانىندە ازيا ادەبيەتىنىڭ كوكجيەگىن كەڭەيتىپ وتىر. قىرىققا جۋىق مەملەكەتتەن كەلگەن قاتىسۋشىلاردىڭ ءوزارا پىكىر الماسۋى ادەبيەت الەمىندەگى تىڭ جاڭالىقتارعا باستايتىنىن بايقاۋ قيىن ەمەس. مۇنى شەتەلدىك قالامگەرلەردىڭ قازاقستانداعى ادەبي ۇردىستەرگە وڭ باعا بەرىپ, حالىقارالىق دەڭگەيدە ارىپتەستىك ورناتۋعا ۋاعدالاسقاندىعىنان دا انىق اڭعارۋعا بولادى.

قازاقستان جازۋشىلار وداعى باسقار­ماسىنىڭ توراعاسى, اقىن ۇلىقبەك ەس­داۋلەت­تىڭ سوزىنشە, الداعى ۋاقىتتا ورتاق ازيا جازۋشىلار وداعىن قۇرۋ دەگەن دە ۇسىنىستار ايتىلعان. «وسىناۋ ادەبي رەۆوليۋتسيا قازاقستاننان باستالدى دەگەن باعا, ارينە جوسپارلى جۇمىسىمىزدىڭ جارقىن جەمىسى دەۋگە بولادى. ۇلكەن سەڭنىڭ بۇزىلۋى ۇدەرىستەرگە باستايتىنى بەلگىلى. رۋحاني ساباقتاستىققا باستاماشى بولعان قازاق ادەبيەتىنىڭ بولاشاعى زور دەۋىمىز كەرەك», دەدى ۇ.ەسداۋلەت.

سونداي-اق جازۋشىلار وداعى باسقار­ما­سىنىڭ توراعاسى پرەزي­دەنت قاسىم-جومارت توقاەۆتىڭ الداعى ۋاقىتتا ازيا ەلدەرى جازۋشىلا­رىنىڭ قالا­مىنان شىققان شوقتىعى بيىك تۋىن­دىلارعا ايرىقشا باعا بەرىلىپ, «ازيا الىبى» اتتى ادەبي سىيلىعىن تاعايىنداۋ ماسە­­لەسى پىسىقتالعاندىعىن تاعى ءبىر مارتە اتاپ ءوتتى.

فورۋمدى قورىتىندىلاعان قالامگەر­لەر الداعى اتقارىلاتىن جۇمىستاردىڭ قاتارىندا ادەبي جۋرنالدار مەن گازەت­تەردىڭ بىرلەسكەن ءنومىرىن شىعارۋعا ۋاع­دا­لاسقاندىقتارىن تىلگە تيەك ەتتى.

تاجىك قالامگەرى نيزوم كوسيمنىڭ ايتۋىنشا, فورۋم بىرلەسكەن جۇمىستاردىڭ ءارى قارايعى جوسپارىن بەلگىلەۋ ءۇشىن وتە ىڭعايلى الاڭ بولدى. ء«بىز ال­دا­عى ۋاقىتتا وقىرماندارىمىزدىڭ وزگە ەلدەردىڭ, ادەبي شى­عار­ما­شىلىعىمەن تانىس بولۋى ءۇشىن بىرلەسكەن ادەبي گازەت-جۋرنالدار شى­عارعىمىز كەلەدى. مە­نىڭشە, بۇل دا حالىق­تارىمىزدى جاقىن­داس­تىرا تۇسۋگە سەپتىگىن تيگىزەدى», دەدى ن.كوسيم.

تاجىك قالامگەرىنىڭ اتاپ وتۋىنشە, اتال­عان باسىلىمداردىڭ فورماتى الداعى ۋا­قى­تتا ەگجەي-تەگجەيلى تالقىلانادى. باسىلىم ءنومىرى جەرگىلىكتى نەمەسە شەتەل­دىك قالامگەردىڭ شىعارمالارىنا نە بولماسا ناقتى ءبىر ەلدىڭ ادەبيەتىنە ارنالۋى مۇمكىن. «بارلىق, اسىرەسە بۇرىنعى كەڭەس­تىك كەڭىستىكتەن شىققان جازۋشىلار وداعىنىڭ نەگىزگى جۇمىس باعىتتارىنىڭ ءبىرى – وزگە ەلدەرمەن, اسىرەسە باۋىرلاس رەسپۋبليكالارمەن ما­دەني بايلانىس­تى جولعا قويىپ, نىعايتۋ بولاتىن. بۇل ورايدا قازاقستان ءبارىمىزدى باسىپ وزدى. بۇل – ەلدەرىڭىزدە ءوتىپ جاتقان وسىمەن ءۇشىنشى حالىق­ارالىق ادەبي شارا بولىپ وتىر. مەن ونىڭ ەكەۋىنە قاتىسقان ەدىم. تاماشا اسەر الدىم», دەدى ول.

شارا قورىتىندىسى بويىنشا ازيا ەل­دەرى قالامگەرلەرىنىڭ ءبىرىنشى فورۋمى دەلەگاتتارىن ماراپاتتاۋ ءرəسىمى ءوتتى. قا­تى­سۋشىلارعا ەستەلىك سىيلىقتار مەن سەرتيفيكاتتار تابىستالدى. گالا-كونتسەرتتە «تۇران» ەتنو-فولكلورلىق توبى, قازاق­ستاننىڭ ەڭبەك سىڭىرگەن قايراتكەرى ءجا­ميلا جارقىمباەۆا جəنە «ماستەر-كلاسس» بي-سپورت كلۋبى, «سەرپەر» دومبىراشىلار ءانسامبلى, «شالقىما» حالىق بي ءانسام­بلى, «مۇزارت» توبى ونەر كورسەتتى.

ءسوزىمىزدىڭ سوڭىندا فورۋمعا موڭ­عو­ليادان كەلگەن قالامگەرلەر شارا قورى­تىندىسى بويىنشا وسىناۋ يگى ءىستى ۇيىم­داستىرۋدا ۇلكەن جۇمىستار ات­قار­عان قازاق­ستان جازۋشىلار وداعى باس­قارما توراعاسىنىڭ ءبىرىنشى ورىنباسارى, اقىن اقبەرەن ەلگەزەكتى موڭعوليا جازۋشىلار وداعىنىڭ ەڭ جوعارى ادەبي سىيلىعىمەن ماراپاتتاعانىن ايتا كەتكەن ءجون.