«ماعان سەنىم ءبىلدىرىپ قولداۋ كورسەتكەندەرىڭىز ءۇشىن راحمەت. بۇل مەن ءۇشىن زور مارتەبە جانە ۇلكەن جاۋاپكەرشىلىك. قازاقستان رەسپۋبليكاسى پارلامەنتىنىڭ جوعارعى پالاتاسىنىڭ باسشىسى رەتىندە مەن سۇيىكتى وتانىمىزدىڭ گۇلدەنۋى ءۇشىن بار كۇش-جىگەرىمدى, ءبىلىمىم مەن تاجىريبەمدى جۇمسايمىن», - دەدى د.نازارباەۆا.
پارلامەنتتىڭ جوعارى پالاتاسى توراعاسىنىڭ ورىنباسارى لاۋازىمىنا اعىمداعى جىلدىڭ 13 تامىزىندا پرەزيدەنت جارلىعىمەن پارلامەنت سەناتىنىڭ دەپۋتاتتىعىنا تاعايىندالعان اسقار شاكىروۆ سايلاندى. سەناتورلار ادام جونىندەگى ۋاكىل قىزمەتىنە ەلۆيرا ءازىموۆانى سايلادى.
سونداي-اق وتىرىس بارىسىندا تۇراقتى كوميتەتتەردىڭ توراعالارى سايلاندى.
كونستيتۋتسيالىق زاڭناما, سوت جۇيەسى جانە قۇقىق قورعاۋ ورگاندارى كوميتەتىنىڭ توراعاسى لاۋازىمىنا ۆلاديمير ۆولكوۆ سايلاندى.
حالىقارالىق قاتىناستار, قورعانىس جانە قاۋىپسىزدىك كوميتەتىنىڭ توراعاسى لاۋازىمىنا مۇحتار قۇل-مۇحاممەد سايلاندى.
ەكونوميكالىق ساياسات, يننوۆاتسيالىق دامۋ جانە كاسىپكەرلىك كوميتەتىنىڭ توراعاسى لاۋازىمىنا سەرىك جاقسىبەكوۆ سايلاندى.
الەۋمەتتىك-مادەني دامۋ جانە عىلىم كوميتەتىنە مۇرات باقتيار ۇلى جەتەكشىلىك ەتەدى.
ءالي بەكتاەۆ اگرارلىق ماسەلەلەر, تابيعاتتى پايدالانۋ جانە اۋىلدىق اۋماقتاردى دامىتۋ كوميتەتىنىڭ توراعاسى بولدى.
قارجى جانە بيۋدجەت كوميتەتىن ولگا پەرەپەچينا باسقارادى.
جاقىندا پرەزيدەنت جارلىعىمەن تاعايىندالعان سەنات دەپۋتاتتارى نۇرتورە ءجۇسىپ, اندرەي لۋكين, دانا نۇرجىگىتوۆا, قاناتبەك سافينوۆ جانە لاززات سۇلەيمەن انت قابىلداپ, سەناتتىڭ تۇراقتى كوميتەتتەرىنىڭ قۇرامىنا سايلاندى.
سەنات توراعاسى قازاقستان رەسپۋبليكاسى پرەزيدەنتىنىڭ جارلىعىمەن وكىلەتتىكتەرى توقتاتىلعان سەناتورلار - سەرگەي گروموۆ, بىرعانىم ءايتىموۆا, اسقار بەيسەنباەۆ, گەورگي كيم, دۋلات قۇسداۋلەتوۆ, راشيد تۇسىپبەكوۆتەرگە العىس ءبىلدىرىپ, ارقايسىسىنىڭ جەكە قاسيەتتەرىنە توقتالىپ, پارلامەنتاريزمدى دامىتۋعا, سونداي-اق زاڭ شىعارۋ ۇدەرىسىن جەتىلدىرۋگە قوسقان ۇلەستەرىن اتاپ ءوتتى.
ەسكە سالساق, د.نازارباەۆانىڭ كانديداتۋراسىن قازاقستاننىڭ پرەزيدەنتى قاسىم-جومارت توقاەۆ ۇسىندى. پرەزيدەنت اكىمشىلىگىنىڭ باسشىسى قىرىمبەك كوشەرباەۆ مەملەكەت باسشىسىنىڭ اتىنان ءسوز سويلەدى. «قازاقستان رەسپۋبليكاسى كونستيتۋتسياسىنىڭ 58-بابىنا سايكەس قازاقستان رەسپۋبليكاسى پارلامەنتى سەناتىنىڭ توراعاسى لاۋازىمىنا داريعا نۇرسۇلتانقىزى نازارباەۆانى سايلاۋدى سۇرايمىن», - دەلىنگەن پرەزيدەنتتىڭ سوزىندە.
