نۇر-سۇلتاندا وتەتىن كۇرەس تۇرلەرىنەن الەم چەمپيوناتىنىڭ ۇيىمداستىرۋشىلارى مەدالداردى ستاندارتتى دوڭگەلەك پىشىندە جاساۋدان باس تارتىپ, ءۇشبۇرىش تۇرىندە جاساپ شىقتى. بۇل – كۇرەستىڭ ءۇش ءتۇرىنىڭ بىرتۇتاستىعىن بىلدىرەدى.
الەم چەمپيوناتى ۇيىمداستىرۋ كوميتەتىنىڭ توراعاسى ەرلان قوجاسبايدىڭ سوزىنشە, مەدالدىڭ الدىڭعى جاعىندا قازاقستان استاناسىنىڭ باستى كورنەكتى جەرى – «بايتەرەك» مونۋمەنتى مەن الەم چەمپيوناتىنىڭ لوگوتيپى بەينەلەنگەن. ال لوگوتيپتىڭ ورتاسىنداعى سىزىقتار كۇرەس ءادىسىن بىلدىرەدى. مەدالدىڭ سىرتىندا كۇرەستەن بيىلعى الەم چەمپيوناتىنىڭ سيمۆولى سانالاتىن قار بارىسى بەينەلەنگەن.
ەسكە سالا كەتەيىك, گرەك-ريم, ەركىن جانە ايەلدەر كۇرەسىنەن الەم چەمپيوناتى 14-22 قىركۇيەك ارالىعىندا نۇر-سۇلتان قالاسىندا وتەدى. ەلوردادا وتەتىن بايراقتى باسەكە كۇرەس تۇرلەرىنەن 2020 جىلى توكيودا وتەتىن وليمپيا ويىندارىنا جولداما بەرۋشى العاشقى تۋرنير بولماق. دۇنيە ءجۇزىنىڭ 100 ەلىنەن كەلەتىن 1002 بالۋان ءبىر اپتا بويى نۇر-سۇلتانداعى «بارىس ارەنا» مۇزسارايىندا بەلدەسەتىن بولادى.
