بۇل الماتىداعى سەيفۋللين داڭعىلى بويىندا اشىلعان ەڭ العاشقى پوليتسيا ءمودۋلى. تاۋلىك بويى تىنباي جۇمىس ىستەيتىن نىسان اشىلعان ءۇش كۇن ىشىندە حالىقتان 21 شاعىم مەن ارىز كەلىپ ءتۇسىپتى. جالپى ءار اۋداندا ءتورت وسىنداي نىسان پايدا بولادى. قالا بيلىگى مەن پوليتسەيلەر ساراپتاما جۇرگىزىپ, مەكەنجايلاردى انىقتاپ جاتىر.
نىسان جىلجىمالى جانە جىلدىڭ ءتورت مەزگىلىندە دە جۇمىس ىستەي بەرەدى. قالالىق پوليتسيا دەپارتامەنتى الماتىدا كريمينوگەندىك احۋال ۇنەمى باقىلاۋدا بولادى دەيدى. قىلمىس كورسەتكىشى ارتقان مەكەنجايلار انىقتالىپ, كەيىن پۋنكتتى سوندا كوشىرۋگە مۇمكىندىك بار. الماتى قالاسى پد رەسمي وكىلى سالتانات ازىربەك كەز كەلگەن كەلەڭسىز وقيعاعا تاپ بولعان ازامات پوليتسيا پۋنكتىنە كومەككە جۇگىنىپ, ءتيىستى قۇقىقتىق كومەك الا الاتىنىن ايتتى. ەگەر جەدەل توپتىڭ قوسىلۋى كەرەك بولسا, وندا ۋاقىت جوعالتپاستان ءتارتىپ ساقشىلارى جۇمىلادى. «اينەكتەن جاسالعان نىساندى ارنايى ماماندار كەلىپ, بۇزىپ, ءتيىستى جەرگە قويىپ بەرەدى. بىراق بۇل پۋنكت ءجيى ورىن اۋىستىرادى دەگەندى بىلدىرمەيدى. جاعداي سارالانعان سوڭ عانا قاجەتتى جەرگە قويامىز», – دەدى دەدى ول جۋرناليستەرمەن كەزدەسكەن كەزدە.
قالا كوشەلەرىندەگى قوعامدىق ءتارتىپ كۇندىز ءتۇنى باقىلانادى. كۇندىز وندا ءبىر ۋچاسكەلىك ينسپەكتور, ال تۇندە قىزمەتكە قوس پاترۋلدىك پوليتسيا قىزمەتكە كىرىسەدى.
ەگەر پوليتسيا تىرەك پۋنكتتەرى جۇيەلى جۇمىس ىستەسە, وندا قالاداعى قىلمىستىق جاعداي تۇراقتالىپ, جاسالعان زاڭبۇزۋشىلىقتار ءىزىن سۋىتپاي اشىلادى دەپ سەنەدى ءتارتىپ ساقشىلارى. جىلجىمالى مودۋلگە ۇرى-قارى, بۇزاقىدان زارداپ شەككەن كەز كەلگەن تۇرعىن كەلىپ ارىز-شاعىم, تالاپ تىلەگىن ايتسا بولادى. الماتى قالاسى تۇركسىب اۋداندىق پوليتسيا ءبولىمى جەرگىلىكتى پوليتسيا قىزمەتى باسشىسىنىڭ مىندەتىن اتقارۋشى داۋرەن مايلىقباەۆتىڭ ايتۋىنشا, بۇل جەردە حالىق سانى وتە كوپ. سول سەبەپتەن ءبىز ءدال قىلمىس كوپ بولعان جەردىڭ ورتاسىنا ءمودۋلدى قويۋعا شەشىم قابىلدانعان.
سونداي-اق, الماتى قالاسىنىڭ اكىمى باقىتجان ساعىنتاەۆتىڭ تاپسىرماسىمەن پوليتسيا دەپارتامەنتى كريمينوگەندىك جەرلەردىڭ كارتاسىن ازىرلەدى. ءتارتىپ ساقشىلارى, تىزىمگە قاس قارايعاندا كوشە جارىعى جانبايتىن 83 كوشە مەن 65 اۋلا كىرگىزگەن. اسا قاۋىپتى دەگەن 148 ۋچاسكەدە ەندى كەزەڭ-كەزەڭىمەن جاعداي تۇزەلەدى. جىل سوڭىنا دەيىن 22 كوشەگە جارىق ورناتىلسا, قالعان 61 مەكەنجاي بويىنشا جۇمىستار كەلەسى جىلى باستالادى.
گۇلبارشىن ايتجانبايقىزى,
«ەqemen Qazaqstan»
الماتى
