وسىدان ءبىرشاما بۇرىن ارىپتەسىمنىڭ قولىنان باس باسىلىمدى كوزىم شالدى. وسى جىلدىڭ 24 ناۋرىزىنداعى نومىرىندە جاريالانعان «ەلەۋلى ەڭبەكپەن ەلەۋسىز جۇرگەندەر» اتتى ماقالانى وقىعاننان كەيىن سىزدەرگە حابارلاسىپ وتىرمىن. سول ماقالاداعى كوپ كەيىپكەردىڭ ءبىرى بولامىن. مەن الەۋمەتتىك قىزمەت كورسەتۋ ورتالىعىندا بالا كۇتۋشى بولىپ جۇمىس ىستەيمىن. ماقالانىڭ ءبىر سويلەمدىك تاقىرىبىنا ءبىزدىڭ تۇتاس قىزمەتتىك ءومىرىمىز سىيىپ كەتىپتى. شىنىندا ءدال سولاي, ەلەۋلى ەڭبەكپەن ەلەۋسىز ءجۇرمىز. قاعاز, ءسوز جۇزىندە لوگوپەد, دەفەكتولوگ, پسيحولوگتار ەرەكشە بالالارمەن تىعىز قارىم-قاتىناستا ەڭبەك ەتەدى, الايدا ەرەكشە بالالارمەن ۇدايى بىرگە بولاتىندار – ءبىز سەكىلدى بالا كۇتۋشىلەر. ولار اقىل-وي, دەنە بىتىمىندە قانداي دا ءبىر كەمىستىگى بار جانداردىڭ جانىندا 24 ساعات بويى جۇرەدى, ۇلكەن-كىشى دارەتىن, توگىپ-شاشقانىن جۋادى, تاماقتاندىرادى. وكىنىشكە قاراي, ماقالادا كۇتۋشىنىڭ قىزمەتى نازاردان تىس قالىپتى. دەسە دە, ءبىز تۋرالى ارنايى ماتەريال دايىنداۋدى وتىنەيىن دەگەن ويىم جوق, وسىنداي ورتالىق قىزمەتكەرلەرىنىڭ ادال ەڭبەگى ءسوز ەتىلگەندىكتەن, ىشىندە بار ەكەنىمىزدى بىلەمىز. مەن بار بولعانى, سول ماقالادا كوتەرىلگەن پايىمدى ۇسىنىس جوعارىعا جەتكەن-جەتپەگەنىن ءبىلۋ ءۇشىن حابارلاستىم.
اتالعان ماقالانىڭ ءتۇيىنى: «ەلەۋلى بولسىن دەسەك... جۇيكەگە سالماق تۇسىرەتىن مۇنداي جۇمىسپەن 60-63 جاستا زەينەتكە شىعۋ, كەشىرىڭىز, وعان جەتۋدىڭ ءوزى ەكىتالاي. الەۋمەتتىك سالادا ەڭبەك ەتەتىن, اسىرەسە مۇمكىندىگى شەكتەۋلى جاندارعا قىزمەت كورسەتەتىن مامانداردىڭ زەينەتكە شىعۋ جاسىن قۇقىق قورعاۋ ورگاندارى قىزمەتكەرلەرىمەن تەڭەستىرۋ قاجەت. ويتكەنى ولار «پوگوندىلاردان» كوپ بولماسا, از جۇمىس ىستەمەيتىنىنە ەكى بارعاندا-اق كوزىمىز جەتتى», دەپ اياقتالعان. وسى ءبىر قاجەتتىلىك پەن ەڭبەكتى ەسكەرۋدەن تۋىنداعان ۇسىنىس قولداۋ تابا ما؟ ناۋرىزدان بەرى ءتيىستى ۆەدومستۆولاردان جاۋاپ بولدى ما؟ وسىنى بىلگىمىز كەلەدى. سەبەبى قازىر ورتامىزدا دەنساۋلىعىن مۇگەدەك بالالاردى باعىپ-قاعۋعا بەرىپ, زەينەت جاسىنا موينىن سوزىپ, سۇيرەتىلىپ جۇرگەندەر جەتەرلىك. ارزىمايتىن ايلىققا الدانىپ ءجۇرمىز. جالاقى مولشەرىن شىلدەدە كوتەردى, سونىڭ وزىندە 57 مىڭ تەڭگە الامىز. اتالعان ماقالادا جاقسى زەرتتەۋ جۇرگىزىلىپ, «اقش كلينيكالارىنداعى الەۋمەتتىك قىزمەتكەرلەردىڭ جىلدىق جالاقىسى 42-54 مىڭ دوللار ارالىعىندا. سوندا ايىنا 1 ملن 300 – 1 ملن 700 مىڭنىڭ اراسىندا الادى. ونى بىزدەگىلەر جىلىنا دا الا المايدى», دەگەن قورىتىندى شىعارىلعان عوي. ونداي تۇسىمىزگە دە كىرمەيتىن جالاقىنى بەرمەيتىنىن بىلەمىز, سوندىقتان سۇرامايمىز دا. بار بولعانى زەينەت جاسىن قىسقارتۋ تۋرالى جوعارىداعى ءسوز – ەلدەگى مەن سەكىلدى بارشا قىزمەتكەرلەردىڭ كۇندىز-ءتۇنى ويىنان كەتپەيتىن ءۇمىت-تىلەگى ەكەنىن ەسكەرسە دەيمىز.
باعيلا بايىمبەتوۆا,
الەۋمەتتىك قىزمەت كورسەتۋ ورتالىعىنىڭ بالا كۇتۋشىسى
شىمكەنت
