25 تامىزدا قازاقستاننىڭ تۇكپىر-تۇكپىرىنەن جينالعان جاستار جانە شەتەلدەن كەلگەن قوناقتار «دوستىق ءۇيى – قوعامدىق كەلىسىم ورتالىعىندا» باس قوسىپ, «دارىن» ورتالىعىنىڭ جازعى ساۋىقتىرۋ لاگەرىنە جول تارتتى. قاتىسۋشىلار تىركەۋدەن وتكەن سوڭ, جەرەبە تارتىپ توپقا ءبولىندى. كەيىن لاگەر اۋماعىندا «Tەام-building», بي كەشىن ۇيىمداستىرىپ كوڭىل كوتەردى.
كەلەسى كۇنى «بىرلىك» لاگەرىنىڭ سالتاناتتى اشىلۋ ءراسىمى ءوتتى. ءىس-شاراعا قحا توراعاسىنىڭ ورىنباسارى شەرزود پۋلاتوۆ, «مى – روسسيانە» رەسەي حالىقتارىنىڭ جاستار اسسامبلەياسى» جالپىرەسەيلىك قوعامدىق قوزعالىسىنىڭ ومبى ايماقتىق بولىمشەسىنىڭ توراعاسى ەرمەك حاپيزوۆ جانە مۇشەلەرى يا.ۋليانوۆ, د.ليپوۆيك, «جاڭعىرۋ جولى» قحا رەسپۋبليكالىق جاستار قوزعالىسىنىڭ ۇزدىگى تيمۋر جۇمىرباەۆ قاتىستى. ءىس-شارانىڭ ماقساتى – مەملەكەتتىك جاستار ساياساتىن دامىتۋ جانە قوعامدىق كەلىسىم مەن جالپىۇلتتىق بىرلىكتىڭ قازاقستاندىق ۇلگىسىن ناسيحاتتاۋ.
لاگەر اياسىندا «قازاقستان حالقى اسسامبلەياسىنىڭ جاستار ساياساتىن دامىتۋ باسىمدىقتارى» اتتى فورۋم, «جاستار ۇيىمدارىنىڭ حالىقارالىق جۇمىس تاجىريبەسى» جانە «قازاقستان حالقى اسسامبلەياسىنىڭ «جاڭعىرۋ جولى» رەسپۋبليكالىق جاستار قوزعالىسىنىڭ مىندەتتەرىن پراكتيكالىق ىسكە اسىرۋ» تۋرالى دوڭگەلەك ۇستەل ءوتتى. سونداي-اق جاستار اراسىندا پىكىرتالاس, سەمينار-ترەنينگتەر ۇيىمداستىرىلدى. سوڭىندا جاستار «قازاقستان ۇيعىر جاستارى وداعىنىڭ» شىعارماشىلىق كەشىن تاماشالاپ, بي جارىسىمەن العاشقى كۇندى ءتامامدادى.
«بىرلىك» حالىقارالىق جاستار لاگەرى بۇگىن مارەسىنە جەتەدى.
