بريفينگتە حالىقارالىق كوشى-قوڭ ۇيىمى (حكۇ) – بۇۇ اگەنتتىگى جوباسىنىڭ ۇيلەستىرۋشىسى انيسا قۋانوۆا جوبانىڭ ءمان-ماڭىزى, قازاقستانعا كەلگەن ميگرانتتاردىڭ قۇقىعى مەن مىندەتتەرى تۋرالى ايتىپ بەردى. قازاقستانعا كەلگەن ميگرانتتاردىڭ قيىن جاعدايعا ۇشىراۋى ادامداردىڭ قۇجاتتارىن جوعالتىپ الۋىنا, جۇمىس بەرۋشىلەردىڭ ەڭبەك اقىسىن تولەمەۋىنە, ەڭبەك كەلىسىمىن جاساماۋىنا جانە ادامداردىڭ قۇقىعىن اياققا باسۋىنا بايلانستى بولادى. وسى ورايدا قۇقىقتىق, ەڭبەك قاتىناستاردى رەتتەۋدى اتالعان حالىقارالىق ۇيىم جەرگىلىكتى پوليتسيا دەپارتامەنتى جانە جۇمىسپەن قامتۋ جانە الەۋمەتتىك باعدارلامالاردى ۇيلەستىرۋ سەكىلدى مەملەكەتتىك ورگاندارمەن بىرلەسىپ شەشەدى.
قوستاناي وبلىسىنداعى كوشى-قوڭ قوزعالىسىنىڭ كۇشەيۋى وبلىستىڭ ەتنيكالىق كارتاسىنىڭ وزگەرۋىمەن, ادامداردىڭ تمد ەلدەرىنە كوشۋى سەكىلدى ۇدەرىستەرمەن جانە ىشكى كوشى-قوڭنىڭ توقتاماۋىمەن دە تىعىز بايلانىستى. ادام ساۋداسىنا بايلانىستى قىلمىستارعا دا وسى كوشى-قوڭ نەگىزگى سەبەپ بولادى ەكەن. مىسالى, «دامىتۋ» قوعامدىق قورىنىڭ ءتورايىمى نينا كوسيۋك قازىر ادام ساۋداسىنىڭ قۇربانىنىڭ ولىمىنە قاتىستى قىلمىستىق ءىس سوتتا قارالىپ جاتقانىن ايتتى.
«ەر كىسى مەڭدىعارا اۋدانىندا قۇلدىقتا بولعان. ونى بايلاپ ۇستاعان, ونىڭ قازاننان كىر قولىمەن تاماق الىپ جەۋى ولىگىنە سەبەپ بولعان. ال شيەدەي اش بولعان. 2016 جىلى ولگەن, ال قىلمىس بيىل عانا اشىلىپ وتىر» دەيدى نينا كوسيۋك. جالپى وسى قوردىڭ پانالاتاتىن ورنىندا ادام ساۋداسىنىڭ قۇربانى بولعان ەكى ادامنىڭ تاعدىرى ولىممەن اياقتالعان.
قوستاناي وبلىسىندا ادام ساۋداسىنىڭ قۇربانىنا اينالاتىندار از ەمەس. ولاردىڭ باسىم كوپشىلىگى شەتەل ازاماتتارى. مىسالى, 2017 جىلى وبلىس وڭىرىندە 40 ادام قيىن جاعدايعا ۇشىراسا, سونىڭ 20-سى وزبەكستان ازاماتتارى بولاتىن. وتكەن جىلى قازاقستان ارقىلى وتكەن 13 شەتەلدىك قۇلدىققا سالىنسا, بيىل 4 ادامنىڭ تاعدىرى ساۋداعا سالىنعان.
قوستاناي
