ولاي دەيتىنىمىز, تاۋفيك وماروۆ اقساقال وزىنە ءوتىنىش-تىلەگىن ايتىپ, ىنتا-ىقىلاس بىلدىرە كەلگەن اۋىلداستارىن ەرەكشە توزىمدىلىك مەن شىدامدىلىقتى قاجەت ەتەتىن باعباندىقتىڭ قۇپيالارىنا ۇيرەتكەن. وسى سەبەپتى ازان شاقىرىپ قويعان ەسىمى ۇمىتىلىپ, ءبارى دە «باعبان باباي» اتاپ كەتكەن. ءبىر جاعىنان زامان اعىمىنا بەيىمدەلە وتىرىپ وتباسىلىق جىلىجاي بيزنەسىنىڭ نەگىزىن قالاپ, تاجىريبەسىن بالالارىنا قالدىرۋعا تىرىسقان. قاشان كوزى جۇمىلعانشا قولىنان كەتپەنىن تاستاماي جەر وڭدەۋدەن بەل جازباعان. باۋ-باقشا باپتاۋ سىرىنا جاستايىنان قانىعىپ وسكەن ول تابيعاتى تامىلجىعان, قوسالقى شارۋاشىلىقتى دامىتۋعا قولايلى وڭىرگە كوشىپ كەلگەنىنە ەش وكىنگەن ەمەس. قايتا سۇيىكتى ىسىنە ءبىرجولا دەن قويىپ, جىل ون ەكى اي جىلىجايدان شىقپايتىن ادەت تاپقان. ءارى تابىستى, ءارى حوش ءيىسى اڭقىپ, ەرەكشە لاززاتقا بولەيتىن گۇلدەردىڭ نەبىر ءتۇرىن الىس-جاقىننان الدىرتىپ, ارتىنا قالدىرعان ولمەس مۇراسىن بالا-شاعاسىنا ميراس ەتىپ كەتكەن.
«اكەم جان تىنىشتىعىن ءوزى وسىرگەن گۇلدەردىڭ ورتاسىنان تابۋشى ەدى. ونىڭ ءوز كاسىبىنە بەرىلگەن ادالدىعى مەن كونبىستىگى قايران قالدىراتىن. ادامدار گۇلدىڭ تۇقىمدارىن الۋ ءۇشىن الىستان ارنايى ىزدەپ كەلەتىن. ءۇي ماڭايىنىڭ وسىنداي جاسىل جەلەككە مالىنىپ تۇرعانى – اكەمنىڭ ارقاسى. كوكونىس وسىرۋمەن دە, ومارتاشىلىقپەن دە شۇعىلداندى. دامدىلىگى ءتىل ۇيىرەتىن ونىمدەرىن اۋىلداستارى تالاسىپ-تارماسىپ الاتىن. يمانتاۋ ەلدى مەكەنىن جاسىل جەلەككە كومكەرىپ, فلورا مەن فاۋناعا اينالدىرعان اسقار تاۋىمىز قانداي قۇرمەتكە بولسىن ابدەن لايىق», دەيدى قىزى گۇلفيا.
اكە جولىن جالعاستىرۋ ماقساتىمەن كوكشەتاۋدان وسىندا قونىس اۋدارعان كاسىپكەر قىزدىڭ دا باۋ-باقشاسى جايقالا ءوسىپ تۇر. يننوۆاتسيالىق جاڭالىقتاردى جاتسىنبايتىن ونىڭ جىلىجايىندا پەتۋنيا, تسينيا, گازانيا,تۋنبەرگي, پورتۋلاك, فيالكا, شىرايگۇل, بارقىتگۇل, گايلارديا دەيسىز بە... اق, سارى قىزىل, كوك, اشىق قىزعىلت ءتۇستى, حوش ءيىسى مۇرىن جاراتىن گۇلدەردى مولىنان كەزدەستىرۋگە بولادى. ونىڭ سوزىنە قاراعاندا گۇل ءوسىرۋدىڭ ماشاقاتى كوپ. جىل بويى تىزە بۇكپەستەن ەڭبەك ەتىپ, وسكىندەر اقپان ايىندا وتىرعىزىلا باستايدى. ۋاقتىلى سۋارۋ مەن دۇرىس باپتاۋدىڭ ارقاسىندا بيىل 12 سوتىق جەرگە گۇلدىڭ جۇزدەن استام ءتۇرى وتىرعىزىلىپ, پىشاق ءۇستى ساتىلىپ كەتكەن. ەشقانداي مينەرالدىق تىڭايتقىش پايدالانبايتىندىقتان, نارىقتاعى سۇرانىس جوعارى. ىرگەلەس كوكشەتاۋ, نۇر-سۇلتاندى ايتپاعاندا, الىس قالالاردان, ءتىپتى رەسەيدەن دە تاپسىرىس ءتۇسىپ جاتاتىنى سوندىقتان. مۇنىڭ ءوزى جالاڭ پايدانى عانا ماقسات ەتپەي, بيزنەس سالاسىندا دۇرىس باعىت-باعدار ۇستانا بىلگەنىن دە اڭعارتسا كەرەك.
«اۋىل شارۋاشىلىعىن قولداۋ قورى» اق ارقىلى جەڭىلدەتىلگەن نەسيە رەسىمدەپ, ماتەريالدىق جاعىنان وڭالىپ العان سوڭ بەس اۋىلداسىنا تۇراقتى جۇمىس تاۋىپ بەرگەن. ال گۇلدەردى ەگۋ, باپتاۋ, ساتۋ سەكىلدى قاربالاس ساتتەردە جۇمىس كۇشىنە دەگەن سۇرانىس ءتىپتى ارتىپ كەتەدى. ءبىر ماۋسىمدا جارتى ميلليونعا دەيىن كوشەت وتىرعىزىلسا, بەينەت پەن زەينەتتىڭ ارا سالماعىن كوزى قاراقتى وقىرمان بىردەن اڭعارار.
گۇل ءوسىرۋشى گۇلفيا تروپيكالىق گۇل تۇرلەرىن ءوسىرۋ ارقىلى سىرتقى نارىققا شىعۋدىڭ كوزدەرىن دە ويلاستىرىپ قويىپتى. نەسى بار, جۇپار ءيىسى اڭقىعان, ماحابباتتىڭ, سۇيىسپەنشىلىكتىڭ سيمۆولى ىسپەتتەس كوز جاۋىن الاتىن گۇلدەردى جۇرتشىلىققا سىيلاپ, العىسقا بولەنىپ جاتسا, نەسى ايىپ؟
يمانتاۋ – كىرسە شىققىسىز اۋىل. 50 وتباسى «جاسىل ەل» كەلىسىمى بويىنشا تاپسىرىس قابىلداپ, نۇر-سۇلتان, الماتى قالالارىن كوركەيتۋگە بەلسەنە اتسالىسىپ كەلەدى. ولاردىڭ اراسىندا وماروۆتار وتباسىنىڭ شوقتىعى بيىك.
سولتۇستىك قازاقستان وبلىسى
