قىتاي دەلەگاتسياسىن دۇنيەجۇزىلىك ء«بىر بەلدەۋ, ءبىر جول» ۇيىمى توراعاسىنىڭ ورىنباسارى جانە حالىقارالىق ينۆەستيتسيالىق قورلاردى باسقارۋ ۇيىمىنىڭ پرەزيدەنتى ۆان سياودۋن باستاپ كەلدى. ول ء«بىر بەلدەۋ, ءبىر جول» باستاماسى قازاقستان مەن قىتايدىڭ اراسىنداعى ىنتىماقتاستىققا وڭ ىقپال ەتىپ, ينتەگراتسيالىق ۇدەرىستەرگە قارقىن بەرەتىنىن ايتتى.
– قازاقستان ەۋرازيا كەڭىستىگىنىڭ ءدال ورتاسىندا ورنالاسقانى بەلگىلى. «استانا» حالىقارالىق قارجى ورتالىعى – بريتاندىق قۇقىق نەگىزىندە جۇمىس ىستەيتىن بىرەگەي اۆتونومدى الاڭ. مۇندا تىركەلگەن قارجى ۇيىمدارىنا بارلىق جاعداي قاراستىرىلعان. قولايلى تسيفرلى ورتادان باستاپ, ءتيىمدى جەڭىلدىكتەرگە دەيىن بار. بيىل ەكى مەملەكەتتىڭ ديپلوماتيالىق قارىم-قاتىناسىنىڭ ورناعانىنا 27 جىل تولىپ وتىر. سونداي-اق قحر توراعاسى سي ءتسزينپيننىڭ نازارباەۆ ۋنيۆەرسيتەتتە ء«بىر بەلدەۋ, ءبىر جول» ستراتەگيالىق يدەياسىن سالتاناتتى تۇردە جاريالاعانىنا دا 6 جىل بولدى. ەكى ەل اراسىنداعى ديپلوماتيالىق بايلانىستىڭ ورناعان كۇنىنەن باستاپ, ءوزارا ىنتىماقتاستىق سان سالانى قارقىندى قامتىپ كەلەدى. كەلەشەكتە مادەنيەت, دەنساۋلىق ساقتاۋ, تۋريزم, ەكونوميكا, تسيفرلى تەحنولوگيالار جانە بيوتەحنولوگيا باعىتىندا ارىپتەستىكتى نىعايتا ءتۇسۋدى جوسپارلاپ وتىرمىز. قازاقستان قىتايدى باتىس ەۋروپامەن جالعاعان كوپىر ىسپەتتەس, – دەدى ۆ.سياودۋن.
بۇدان بولەك, قىتايلىق قارجىگەرلەر بانك قىزمەتى بويىنشا بىرلەسىپ جۇمىس ىستەۋگە ءازىر. اتاپ ايتقاندا ەلىمىزدە ازيا-تىنىق مۇحيتى ۆاليۋتالىق-ينۆەستيتسيالىق بانكى مەن دۇنيەجۇزىلىك بىرلەسكەن بانكتىڭ بولىمشەلەرى اشىلۋى مۇمكىن. بۇگىندە قوس تاراپ ءتيىستى ۋاعدالاستىققا قول جەتكىزۋگە جاقىن. اتالعان قارجى ينستيتۋتتارى ءبىرىنشى كەزەكتە وتاندىق كورپوراتيۆتىك سەكتورعا قىزمەت كورسەتۋدى قولعا الماق.
– قازاقستاندىق ارىپتەستەرىمىزبەن كەلىسسوزدەر جۇرگىزىلىپ جاتىر. ءبارى ءساتتى وتسە, بانك فيليالدارى نۇر-سۇلتاندا اشىلۋى مۇمكىن. ءبىزدىڭ بانك ىسكەر ورتامەن جۇمىس ىستەۋگە مۇددەلى. ايتسە دە تۇرعىندارعا دا قىزمەت كورسەتۋدى ويلاستىرامىز, – دەدى ازيا-تىنىق مۇحيتى ۆاليۋتالىق-ينۆەستيتسيالىق بانكىنىڭ جانە دۇنيەجۇزىلىك بىرلەسكەن بانكتىڭ توراعاسى فەن سيانشان.
فورۋم بارىسىندا ەكى تاراپ تۋريزم سالاسىندا بىرلەسكەن جوبالاردى ىسكە اسىرۋعا ۋاعدالاستى.
