ۆەدومستۆودان حابارلاعانداي, 16 تامىزدا اتالمىش اۋىلدان الىنعان سىنامالاردىڭ ناتيجەسىندە الدىن الا ء«سىبىر جاراسى» دياگنوزى قويىلىپ, 17 تامىزدان باستاپ اۋىلدا كارانتين جاريالاندى. دەگەنمەن, زەرتتەۋلەر ءالى دە جالعاسۋدا. تولىق ناتيجە 19-20 تامىزدا بەلگىلى بولۋى ءتيىس.
اقمولا وبلىسىنىڭ دەنساۋلىق ساقتاۋ باسقارماسىنىڭ اقپاراتى بويىنشا, ولگنيكا اۋىلىنىڭ 5 تۇرعىنى اۋرۋحاناعا جاتقىزىلعان. قازىر سىنامالارعا زەرتتەۋ جۇرگىزىلىپ جاتىر. ناۋقاستاردىڭ جاعدايى تۇراقتى.
«16 تامىزدا ارشالى اۋدانىنىڭ باس مەملەكەتتىك ۆەتەريناريالىق ينسپەكتورى ولگينكا اۋىلىنىڭ اكىمىنە كارانتين ەنگىزۋ تۋرالى ۇسىنىس جولدادى. سەنبى كۇنى اقمولا وبلىسى ارشالى اۋدانىنىڭ اۋماعىندا ءسىبىر جاراسى اۋرۋلارىنىڭ وشاقتارىن جويۋ بويىنشا شتاب وتىرىسى ءوتتى. قۇرامىندا 14 ادام كىرەتىن شتاب ۆەتەرينارلىق جانە سانيتارلىق-ەپيدەميولوگيالىق قىزمەتتىڭ, دەنساۋلىق ساقتاۋ باسقارماسىنىڭ, جەرگىلىكتى پوليتسيا قىزمەتىنىڭ ءىس-قيمىل جوسپارى قابىلداندى. ولگينكا اۋىلىنداعى مالدار اراسىندا ء«سىبىر جاراسى» جوق. كۇن سايىن جانۋارلاردى كوميسسيالىق تەكسەرۋ جۇرگىزىلەدى», - دەلىنگەن حابارلامادا.
مينيسترلىكتىڭ مالىمەتى بويىنشا, ولگينكا اۋىلىنىڭ بارلىق مالى ءساۋىر ايىندا ءسىبىر جاراسىنا قارسى ەگىلگەن. «ۆەتەريناريالىق قاعيدالاردى بەكىتۋ تۋرالى» قر اشم 2015 جىلعى 29 ماۋسىمداعى №7-1/587 بۇيرىعىمەن بەكىتىلگەن ۆەتەريناريالىق-سانيتاريالىق قاعيدالاردىڭ 1 پاراگرافىنىڭ 145-22 تارماعىنا سايكەس, ءسىبىر جاراسى بويىنشا كارانتين ينفەكتسيا جويىلعاننان جانە قورىتىندى دەزينفەكتسيا جۇرگىزىلگەننەن كەيىن 15 كۇنتىزبەلىك كۇن وتكەننەن كەيىن الىنادى.
