پەنسيلۆانياداعى جۇمىسشىلار الدىندا سويلەگەن سوزىندە د.ترامپ دسۇ ەرەجەلەرى باسقا ەلدەردىڭ مۇددەسى ءۇشىن جۇمىس ىستەپ تۇرعانىن, اقش-قا كەسىرىن تيگىزىپ جاتقانىن ايتتى.
«قاجەت بولسا, ۇيىمنان شىعىپ كەتەمىز. ولار جىلدار بويى ءبىزدىڭ ەسەبىمىزدەن پايدا كورىپ كەلگەن ەدى. ەندى بۇل قايتالانبايدى», دەدى د.ترامپ.
اقش پرەزيدەنتىنىڭ سوزىنە سۇيەنسەك, دسۇ قۇرامىنان شىعۋ تۋرالى ايتقانعا دەيىن ۆاشينگتون بيلىگى ۇيىمعا تۇسكەن ارىز-شاعىمنىڭ بارىندە جەڭىلىپ كەلگەن. ەندى شاعىمداردا اق ءۇيدىڭ اسىعى الشىسىنان تۇسە باستاعان سىڭايلى. الايدا Forbes-تىڭ مالىمەتىنە سۇيەنسەك, دسۇ ادەتتە ارىز تۇسىرگەن ەلدىڭ شاعىمىنىڭ 90 پايىزىن قاناعاتتاندىرادى ەكەن.
ۆاشينگتونداعى Cato ينستيتۋتىنىڭ ساۋدا ساراپشىسى سيمون لەستەر مۇنىڭ شىندىققا ساي كەلمەيتىنىن العا تارتادى. Bloomberg ارناسىنا بەرگەن پىكىرىندە ول دسۇ دەرەكتەرى شاعىم بەرۋشىنىڭ تاراپى باسىمدىققا يە ەكەنىن ايتادى.
ماسەلەن, دسۇ-عا اقش تۇسىرگەن 54 شاعىمنىڭ 49-ىندا ۆاشينگتون تاراپى جەڭىسكە جەتكەن. ال اقش-قا اشىلعان 69 ءىستىڭ 86 پايىزىندا قارسى تاراپ قاناعاتتاندىرىلعان.
سونداي-اق د.ترامپ وسى كۇنگە دەيىن اقش-تى الەم ەلدەرى پايدالانىپ كەلگەنىن, ۇيىم ەندى دۇرىس جۇمىس ىستەۋ قاجەتتىگىن تۇسىنگەنىن جەتكىزگەن. اق ءۇي باسشىسىنىڭ پايىمداۋىنشا, دامۋشى ەل مارتەبەسى بار قىتاي مەن ۇندىستانعا كوپ جەڭىلدىك جاسالعان. الايدا د.ترامپ ەكى ەلدى دە الدەقاشان دامىعان ەلدەر قاتارىنا ەنگەن دەپ ەسەپتەيدى.
اق ءۇي باسشىسىنىڭ بۇلاي دەپ مالىمدەمە جاساۋىنىڭ ءوز سەبەبى بار. قازىرگى تاڭدا اقش پەن قىتاي اراسىندا ساۋدا سوعىسى قىزۋ ءجۇرىپ جاتىر. ماسەلەن, ۆاشينگتون بيلىگى 1 قىركۇيەكتەن باستاپ قىتايدان كەلەتىن قۇنى 300 ميلليارد دوللارلىق تاۋارعا 10 پايىزدىق سالىق قوياتىنىن حابارلاعان ەدى.
كەيىنىرەك اقش تاراپى مۇحيت اسىپ كەلەتىن تاۋارلارعا قويىلاتىن ءتاريفتى ۋاقىتشا توقتاتا تۇراتىنىن مالىمدەدى. Wall Street Journal-دىڭ حابارلاۋىنشا, قۇنى 156 ميلليارد بولاتىن تاۋاردىڭ سالىعىن ءوسىرۋ 15 جەلتوقسانعا دەيىن شەگەرىلمەك. مۇنىڭ باستى سەبەبى – روجدەستۆو الدىنداعى مەرەكەدە تاۋار قۇنىنىڭ كەنەتتەن كوتەرىلىپ كەتپەۋىنىڭ الدىن الۋ.
BBC د.ترامپتىڭ كوزدەگەنى قىتايمەن اراداعى ساۋدا سوعىسىن توقتاتۋ ەمەس دەپ ەسەپتەيدى. ارنانىڭ پايىمداۋىنشا, ول الدا كەلە جاتقان پرەزيدەنتتىك سايلاۋدا جەڭىسكە جەتۋ ءۇشىن حالىقتىڭ قولداۋىنا يە بولعىسى كەلەدى. سول ءۇشىن كەلىسىمنەن گورى, قىتايمەن قارىم-قاتىناستى شيەلەنىستىرىپ وتىرۋدى ءجون كورەتىنىن كەلتىرگەن.
قىتاي تاراپى ءوز كەزەگىندە ۇلتتىق ۆاليۋتاسى يۋاننىڭ دوللارعا شاققانداعى قۇنىن تومەندەتىپ جىبەردى. اقش-تىڭ قارجى مينيسترلىگى دە, د.ترامپ تا مۇنداي قادامدى ۆاليۋتامەن ويناۋ دەپ ەسەپتەيتىنىن جەتكىزدى.
جالپى, ترامپ دسۇ-دان شىعۋ تۋرالى العاش رەت ايتىپ وتىرعان جوق. شىلدەدە ول ۇيىمعا رەفورما جاساۋ قاجەتتىگىن مالىمدەگەن ەدى. ساراپشىلاردىڭ پىكىرىنشە, مۇنداي قادام اقش-تىڭ باسقا ەلدەرمەن اراسىنداعى 600 ميلليارد دوللارلىق ساۋدا تاپشىلىعىن قىسقارتۋعا باعىتتالعان.
سونداي-اق بىلتىر Bloomberg ارناسىنا بەرگەن سۇحباتىندا ترامپ كەز كەلگەن ۋاقىتتا اقش-تىڭ دۇنيەجۇزىلىك ساۋدا ۇيىمىنىڭ قۇرامىنان شىعۋعا ءازىر ەكەنىن ايتقان بولاتىن. ول كەزدە اق ءۇي باسشىسى ۇيىمنىڭ امەريكالىقتارعا قاتاڭ قارايتىنىن سىناعان-تۇعىن.
ازىرگە دۇنيەجۇزىلىك ساۋدا ۇيىمى د.ترامپتىڭ سوزىنە قاتىستى پىكىر بىلدىرگەن جوق. جالپى, ۇيىم قۇرامىنان شىعۋ XV ماراكەش كەلىسىمىندە قاراستىرىلعان. سوعان سايكەس, مۇشە مەملەكەتتەردىڭ كەز كەلگەنى قالاعان ۋاقىتتا ءوز ەركىمەن باس تارتا الادى. الايدا سول مەملەكەت التى اي بۇرىن دسۇ باسشىلىعىن رەسمي حات تۇرىندە حاباردار ەتۋى قاجەت.
