كوڭىلدى شاراعا الماتى, تالدىقورعان قالالارى مەن الاكول, سارقان اۋداندارىنان كەلگەن جاس وتباسىلار قاتىستى. ءۇش كۇنگە سوزىلعان شارانىڭ ءار تاۋلىگى تاڭعى جاتتىعۋمەن باستالدى. جۇپتار اراسىنداعى جارىس ەكى كەزەڭگە ءبولىنىپ, قاتىسۋشىلار الدىمەن دەمالىس ورنىنىڭ اۋماعىندا سايىسقا ءتۇستى. بۇل جەردەگى دودالار «جۇپتار جاراسىمى», ء«تاتتى داۋرەن», «تەرەڭ تىنىس», «كىم مەرگەن؟», «ويلان تاپ», «تاپسىرما حات» سىندى ارنايى بولىمدەردەن تۇردى.
- بۇل شارا «جاستار جىلى» اياسىندا كەيىنگى تولقىن وكىلدەرىنىڭ اراسىنداعى دوستىق قارىم-قاتىناستى بەكىتۋ, ولاردىڭ باسەكەگە قابىلەتتىلىگىن ارتتىرۋ, جازدىڭ جايما-شۋاق كۇندەرىن كوڭىلدى وتكىزۋ ماقساتىندا ۇيىمداستىرىلدى. وسىدان ءبىراز ۋاقىت بۇرىن «Alakol TV» اقپاراتتىق-تانىمدىق تەلەستۋدياسىن اشقان بولاتىنبىز. ءوڭىردىڭ, ولكەنىڭ جاڭالىعىن ينتەرنەت ارقىلى جاريالايمىز. ەندى قوعامدىق شارالار وتكىزۋدى قولعا الدىق. الدىمىزعا الاكول ءتۋريزمىنىڭ دامۋىنا ۇلەس قوسساق دەگەن ماقسات قويدىق. «Alakol Life» رەاليتي-شوۋى وسىلاي باستالدى. ءارى وتە قىزىقتى ءوتتى. ماسەلەن, «جۇپتار جاراسىمى» بولىمىنە قاتىسۋشىلارعا سەرىگى جايىندا سۇراقتار قويىلىپ, ولاردىڭ ءوز جۇپتارىن ءجىتى تانۋلارى تارازى باسىنا ءتۇستى. كەلەسى ءتورت ءبولىم ۇمىتكەرلەردىڭ كوڭىلىن كوتەرۋ مەن جۇپتىق جۇمىستىڭ ماڭىزىلىعىن كورسەتۋگە باعىتتالدى. ال سوڭعى «تاپسىرما حات» سىنىندا قاتىسۋشىلار قارسىلاستارىنا ارنايى تاپسىرما بەرىپ, ولاردىڭ سول مىندەتتى ورىنداۋ شەبەرلىكتەرى سارالاندى. ەكىنشى كەزەڭ كول بويىنداعى كوڭىلدى سايىستارمەن جالعاسىن تاپتى. بۇندا جاس جۇپتار الدىمەن «كىم ءبىرىنشى؟» اتتى سىندا كولدەن سۋ تاسىپ, ارنايى ىدىستى تولتىرسا, «كىم جۇيرىك؟» كەزەڭىندە كاتامارانداردى تىزگىندەگەن جاستار بەلگىلەنگەن مەجەگە دەيىن جارىسىپ, مارەدەن ءبىرىنشى كورىنۋ ءۇشىن بارلارىن سالدى. سونىمەن قاتار «سەلفي» كەزەڭىندە قاتىسۋشىلار ارنايى ۋاقىت ىشىندە دەمالۋشىلارمە ەڭ كوپ سەلفي جاساۋ بويىنشا تارتىسقا ءتۇستى. ال بۇل دودالاردىڭ ەڭ قىزىقتىسى جۇپتار اراسىنداعى ارقان تارتىس بولدى. ارتىنشا جاس جۇپتار سۋ كولىكتەرىنە وتىرىپ, كۇننىڭ قالعان بولىگىن كول بەتىندە وتكىزدى, - دەيدى جاس جۋرناليست, «Alakol TV» اقپاراتتىق-تانىمدىق تەلەستۋدياسىنىڭ جەتەكشىسى المات ەسەنبەكوۆ.
سايىس جەڭىمپازدارىن الماتى وبلىستىق جاستار رەسۋرستىق ورتالىعىنىڭ ديرەكتورى جايىق تازابەك ۇلى قۇتتىقتاپ, باعالى سىيلىق تاپسىردى.
الماتى وبلىسى
