سونىڭ ىشىندە 2017 جىلى 426,4 مىڭ شارشى مەتر تۇرعىن ءۇي الاڭى پايدالانۋعا بەرىلىپ, جوسپار 2016 جىلمەن سالىستىرعاندا 116,9 پايىزعا ورىندالدى. 2018 جىلى بۇل كورسەتكىش 478 مىڭ شارشى مەتردى قۇراپ, جوسپاردىڭ 112,1 پايىزعا ورىندالۋىنا قول جەتكىزىلدى. ال, بيىلعى جىلدىڭ 7 ايىندا كورسەتكىش 323 مىڭ شارشى مەتر نەمەسە 103,5 پايىزعا تەڭ بولدى.
قۇرىلىس جۇمىستارىمەن وبلىس اۋداندارى مەن قالالارى دا كەڭىنەن قامتىلعان. بيىل جالعا بەرىلەتىن تۇرعىن ءۇي قۇرىلىسى بويىنشا رەسپۋبليكالىق بيۋدجەتتىڭ ەسەبىنەن 3,5 ميلليارد تەڭگەنىڭ 23 تۇرعىن ءۇيىن پايدالانۋعا بەرۋ قاراستىرىلىپ وتىر. وبلىستىق بيۋدجەت ەسەبىنەن تاعى 8 جوبا ىسكە اسىرىلماقشى. قازىردىڭ وزىندە وسى كوزدەلگەن تۇرعىن ۇيلەردىڭ 9,5 مىڭ شارشى مەترى پايدالانۋعا بەرىلىپ, تۇرعىندار يگىلىگىنە تاپسىرىلدى.
سوڭعى ۋاقىتتا تۇرعىن ۇيلەردىڭ كوپتەپ سالىنۋىنان كوپبالالى وتباسىلارىنا جانە الەۋمەتتىك جاعىنان از قامتىلعان وتباسىلاردى پاتەرمەن قامتاماسىز ەتۋ كورسەتكىشى اناعۇرلىم ارتتى. جالعا بەرىلەتىن تۇرعىن ءۇي قۇرىلىسىن ورىستەتۋدىڭ ەسەبىنەن جىل اياعىنا دەيىن وبلىس بويىنشا تاعى دا قوسىمشا 148 كوپبالالى وتباسىنىڭ باسپانالى بولۋىنا جاعداي تۋعىزىلعالى وتىر.
وبلىسىمىزدا تۇرىن ءۇي قۇرىلىسى قارقىنىن ارتتىرۋ ءۇشىن 2014 جىلى كوكشەتاۋ قالاسىندا تۇرعىن ءۇي قۇرىلىسى كومبيناتى اشىلدى. بۇگىنگى كۇنگە دەيىن كومبينات كوپقاباتتى بەس تۇرعىن ءۇي قۇرىلىسىن جۇرگىزىپ, پايدالانۋعا بەردى. كاسىپورىن قۋاتىن ارتتىرۋ ءۇشىن قۇرىلىس باسقارماسى وسى كومبينات تەحنولوگيالارىن كەڭىنەن پايدالانا وتىرىپ, ءۇي سالۋدىڭ بەس جىلدىق جوسپارىن جاساۋدا. «اقمولا جاستارى» باعدارلاماسى بويىنشا وبلىس بيۋدجەتىنەن كوپ قاباتتى ەكى ءۇيدىڭ قۇرىلىسىن جۇرگىزۋگە دە ءتيىستى قارجى بولىنگەن.
بۇگىنگى تاڭدا قوپا كولىنە جاقىن ماڭدا جوبالىق قۇنى 6,5 ميلليارد تەڭگەنىڭ «بولاشاق» بالالار مەن جاسوسپىرىمدەر سارايىنىڭ قۇرىلىسى باستالدى. سونداي-اق, بيىل كۇزدە قوپا كولىنىڭ جاعاسىمەن وتەتىن جول قۇرىلىسى قولعا الىنباق. قازىرگى ۋاقىتتا وبلىستىق ونكولوگيالىق ەمحانانىڭ قۇرىلىسى, وبلىس ورتالىعىنداعى №1 ورتا مەكتەپتىڭ 600 وقۋشىعا ارنالعان قوسىمشا عيماراتىنىڭ قۇرىلىس جۇمىستارى, باسقا دا وسى تەكتەس جۇمىستار قىزۋ قارقىن العان.
اقمولا وبلىسى
