شالعايداعى استراحان اۋدانىندا جۇمىس كوزىنىڭ كوپ ەمەستىگى بەلگىلى. حالقى سيرەك قونىستانعان بۇل ولكەدە جۇرت نەگىزىنەن مال سۇمەسىمەن كۇنەلتەدى. اۋىل شارۋاشىلىعىمەن اينالىساتىن سەرىكتەستىكتەردە ەڭبەك ەتىپ, ناپاقاسىن تاۋىپ جۇرگەندەر دە از ەمەس. كوپبالالى انالار مەملەكەت قامقورلىعىن كورۋدە. اتاپ ايتاتىن بولساق, بۇگىنگى تاڭدا اۋداندا 200-گە جۋىق كوپبالالى انا اتاۋلى الەۋمەتتىك كومەككە يە. سول انالاردىڭ ىشىندە ءوز الدىنا ماماندىق يگەرىپ, شاعىن دا بولسا شارۋاسىن دوڭگەلەتۋگە ۇمتىلىپ وتىرعانداردى كورگەندە رازى بولاسىڭ. وتكەن جىلى كوپبالالى ەكى انا ءۇش ايلىق كۋرستى وقىپ, كادەگە جارايتىن كاسىپ يگەرۋدە. بيىلعى جىلى ءۇش بىردەي انا تالپىنىپ وتىر.
– ىلگەرى ۇمتىلعانداردىڭ ءبىرى – زاعيپا ابدۋللاەۆا,–دەيدى اۋداندىق جۇمىسپەن قامتۋ ورتالىعىنىڭ ديرەكتورى جانار مۇحامەدجانوۆا,–سەگىز بالا تاربيەلەپ وتىرعان انا. بۇل وتباسى اي سايىن 140 000 تەڭگە كولەمىندە الەۋمەتتىك كومەك الىپ وتىر.
الدىنان جۇمىس ۇركىپ وتىراتىن انانىڭ ۇيدەگى شارۋاسى دا شاش ەتەكتەن. ايتسە دە قاراپ وتىرعاننان قارەكەت ەتكەن جاقسى. وسى ءبىر وي قىسقا مەرزىمدى كۋرسقا جەتەكتەپ اكەلگەن. ءسويتىپ, ناۋبايحاناشى ماماندىعىن يگەرىپ شىقتى. نارتتاي قىزىل, ءدامى ءتىل ۇيىرەتىن نان ءپىسىرۋ تاڭسىق جۇمىس ەمەس. ونسىز دا سەگىز بالانىڭ اس-سۋىن دايىنداۋعا ابدەن ۇيرەنگەن كوپ بالالى انا ەندى اس اتاسىمەن ءتامام جۇرتتى قامتاماسىز ەتپەك.
–تۇڭعىشىم 23-تە, كەنجەمىز ءبىر جاستان جاڭا استى,–دەيدى زاعيپا ابدۋللاەۆا,–جولداسىم جەرگىلىكتى شارۋاشىلىقتاردىڭ بىرىندە وت جاعۋشى بولىپ جۇمىس ىستەيدى. تابىسىمىز از بولعان سوڭ مەن دە ءبىر جاعىنان شىعىسىپ, قاراپ وتىرعانشا قاراجات تاپقانىم جاقسى ەمەس پە؟ كۇز دە كەلىپ قالدى. ءبىلىم وشاعىنا باراتىن بالالاردى كيىندىرۋىمىز كەرەك. ءوز قولدارى ءوز اۋىزدارىنا جەتكەنشە كومەكتەسپەسە بولمايدى عوي.
انانىڭ ايتۋىنا قاراعاندا, اتاۋلى الەۋمەتتىك كومەك تارىققان جانداردىڭ قوس قولتىعىنان دەمەيتىن پەرىشتەدەي. قازىر ولار بار تاپقاندارىن باسپانا سالىپ الامىز دەپ قۇرىلىسقا جۇمساپ جاتىر ەكەن.
جەتكىنشەكتەرىنىڭ ەرتەڭ-اق ازامات اتانىپ كەتەتىنىنە كۇمان جوق. سەگىز بىردەي پەرزەنتىن وبەكتەپ باعىپ وتىرعان انالارىنىڭ جانىن جالداپ ناۋبايحانادا جۇمىس ىستەگەندىگىن كورىپ وسكەن بالالار دا انا دەگەننىڭ قانداي قۇدىرەت ەكەندىگىن سانالارىنا ءسىڭىرىپ وسپەي مە؟!
