پرەمەر-مينيستر الدىمەن وبلىس ورتالىعىنداعى «ەنكي» كىرپىش زاۋىتىندا بولدى. كىرپىش زاۋىتى 2010 جىلدىڭ جەلتوقسان ايىندا يندۋستريالاندىرۋ كارتاسى شەڭبەرىندە ىسكە قوسىلعان بولاتىن. 2015 جىلدىڭ ءۇشىنشى توقسانىندا تولىق جوبالىق قۋاتىندا جۇمىس ىستەي باستادى. كاسىپورىن جىل سايىن 60 ميلليون داناعا جۋىق كىرپىش شىعارادى.
بۇدان سوڭ پرەمەر-مينيستر وبلىس ورتالىعىنىڭ ىرگەسىنەن 2013 جىلدان باستاپ بوي كوتەرگەن سارىارقا شاعىن اۋدانىندا بولدى. العاشقى جىلى جالپى كولەمى 62 386,7 شارشى مەتردى قۇرايتىن 1295 پاتەرلىك 33 كوپقاباتتى تۇرعىن ءۇي سالىندى. ودان بولەك 240 ورىندىق بالالار باقشاسى پايدالانۋعا بەرىلسە, قۇنى 1 ميلليارد 134 ميلليون تەڭگە تۇراتىن ءورت ءسوندىرۋ ستانتسياسى ىسكە قوسىلدى. 900 ورىندىق ءىت مەكتەپ-ليتسەيى دە وسىندا. سارىارقا شاعىن اۋدانى از عانا جىلدىڭ ىشىندە كوزتارتارلىق بولىپ قاۋلاپ ءوسىپ كەلەدى. 2014 جىلى 30 پاتەرلىك 5 ءۇي بوي كوتەردى. قۇرىلىس الاڭىن ارالاپ كورگەن پرەمەر-مينيستر الدىمەن تۇرعىن ۇيلەردىڭ ساپاسىنا نازار اۋداردى. بولاشاقتا تاعى دا 14 كوپقاباتتى تۇرعىن ءۇي سالىنباق.
كوكشەتاۋ حالقىن ەلەڭ ەتكىزەتىن جاعىمدى جاڭالىقتىڭ ءبىرى – بالالار مەن جاسوسپىرىمدەرگە ارنالعان «بولاشاق» سارايى. جوبانىڭ قۇنى 6,5 ميلليارد تەڭگە. جالپى كولەمى جەتى مىڭ شارشى مەتردى قۇرايدى. عيمارات ەكى بولىكتەن تۇرادى. ءبىرىنشىسى ينتەللەكتۋالدىق دامۋدى قالىپتاستىراتىن ايماق بولسا, ەكىنشىسى سپورت الاڭدارى.
وبلىس اكىمى ەرمەك مارجىقپاەۆ پرەمەر-ءمينيستردى «بولاشاق» سارايىنىڭ جوباسىمەن ەگجەي-تەگجەيلى تانىستىردى. ۇكىمەت باسشىسى قۇرىلىس جۇمىسىن ساپالى جۇرگىزۋمەن قاتار, عيماراتتىڭ توڭىرەگىن اباتتاندىرۋعا كوڭىل ءبولدى.
كوكشەتاۋ قالاسىنىڭ ورتالىعىنداعى «دوستىق» جانە «كوكشەتاۋ» قوناق ۇيلەرىندە بولعان ۇكىمەت باسشىسى مۇنداعى قىزمەت كورسەتۋ ساپاسىن جاقسارتۋ جانە جاڭا زامانعى جيھازدارمەن جابدىقتاۋ قاجەت ەكەندىگىن ەسكە سالدى. سونداي-اق پرەمەر-مينيستر وبلىس ورتالىعىنداعى «GreenWhich Hotel» قوناق ۇيىندە دە بولدى. بۇل قوناق ۇيدە ستاندارت, جارتىلاي ليۋكس, ليۋكس ساناتىنداعى 26 بولمە بار. ارتىقشىلىعى اكىمشىلىك مەكەمەلەر مەن مادەني نىساندارعا جاقىندىعى. قوناق ءۇيدىڭ بولمەلەرى كونديتسيونەرمەن, سپۋتنيكتىك تەلەارنالارمەن, سەيفپەن جانە باسقا دا قاجەتتى جابدىقتارمەن جاراقتاندىرىلعان.
پرەمەر-ءمينيستردىڭ ەندىگى ءبىر نازار اۋدارعان جايى – جول ماسەلەسى. بۇرناعى جىلدارى رەسپۋبليكالىق ماڭىزداعى استانا-پەتروپاۆلوۆسك باعىتىنداعى تاس جولدىڭ كوكشەتاۋدان پەتروپاۆلعا دەيىنگى بولىگىنىڭ جايى سىن كوتەرمەيتىن. قازىرگى كۇنى كۇردەلى جوندەۋدەن وتكىزىلدى. كۇرە جولدى كۇردەلى جوندەۋدەن وتكىزۋگە 3 606,4 ميلليون تەڭگە قارجى بولىنگەن بولاتىن. اۋقىمدى جۇمىستى «قازاقدورستروي» جاۋاپكەرشىلىگى شەكتەۋلى سەرىكتەستىگى جۇرگىزدى.
بۇلاندى اۋدانىنداعى «ماكينكا قۇس فابريكاسى» جاۋاپكەرشىلىگى شەكتەۋلى سەرىكتەستىگى ەلىمىزدەگى بىرەگەي جوبا. مۇندا 2018 جىلى قۇنى 1,974 ميلليارد تەڭگەنى قۇرايتىن 3189,65 توننا قۇس ەتى ءوندىرىلدى. 2019 جىلى 14396 توننا ەت ءوندىرۋدى جوسپارلاپ وتىر. تولىق قۋاتىندا جۇمىس ىستەگەن كەزىندە 900-گە تاياۋ ادام جۇمىس ىستەيتىن بولادى. جۇمىسشىلاردىڭ ورتاشا ايلىق ەڭبەكاقىسى 200 000 تەڭگە كولەمىندە.
اقمولانىڭ ىرىزدىعى – اقىق دانىندە. قازىر وبلىس ديقاندارى كۇزگى ەگىن وراعىنىڭ قامىندا. ەرتە پىسەتىن ارپانى ىرىكتەپ ورىپ تا جاتىر. ۇكىمەت باسشىسى بۇلاندى اۋدانىنداعى «جۋراۆلەۆكا-1» جاۋاپكەرشىلىگى شەكتەۋلى سەرىكتەستىگىندە بولىپ, كۇزگى دالا جۇمىستارىنىڭ بارىسىمەن تانىستى.
اقمولا وبلىسى
