وبلىستىق ءبىلىم باسقارماسىنىڭ مالىمەتىنشە, وڭىردەگى ءبىلىم نىساندارىنىڭ ماتەريالدىق-تەحنيكالىق بازاسى بارلىق تالاپقا ساي. بالالاردىڭ الاڭسىز ءبىلىم الۋى ءۇشىن بارلىق جاعداي جاسالعان. ماسەلەن, اعىمداعى جىلى وبلىس بويىنشا 12 ءبىلىم نىسانىنىڭ قۇرىلىسىن جۇرگىزۋگە 3,6 ميلليارد تەڭگە قاراستىرىلعان. ونىڭ ىشىندە 1,2 ميلليارد تەڭگە رەسپۋبليكالىق بيۋدجەت ەسەبىنەن بولسا, جەرگىلىكتى بيۋدجەتتەن 2,4 ميلليارد تەڭگە بولىنگەن. اتالعان قاراجات ەسەبىنەن شۋ اۋدانى شۋ قالاسىنداعى 300 ورىندىق ورتا مەكتەپ, بايزاق اۋدانى اقشولاق اۋىلىنداعى 120 ورىندىق ورتا مەكتەپ, جامبىل اۋدانىنداعى بىرلەسۋ-ەڭبەك اۋىلىنداعى 140 ورىندىق ورتا مەكتەپ, مەركى اۋدانى قازاق-ديحان اۋىلىنداعى 120 ورىندىق ورتا مەكتەپ, ت.رىسقۇلوۆ اۋدانى جالپاقساز اۋىلىنداعى 48 ورىندىق ءبىلىم مەكەمەسى جانە جامبىل اۋدانى تۇركسىب اۋىلىنداعى 300 ورىندىق ورتا مەكتەپتىڭ قۇرىلىسى جۇرگىزىلەدى. اتالعان 6 مەكتەپ تە زامان تالابىنا ساي سالىنىپ, وقۋشىلاردىڭ يگىلىگىنە بەرىلەتىن بولادى.
سونىمەن قاتار اقىل-ويىندا كەمىستىگى بار بالالارعا ارنالعان مەكتەپ-ينتەرناتىنىڭ سپورت زالى, شەبەرحاناسى, قويماسى, مونشاسى, بايزاق اۋداندىق №3 كوللەدجىنىڭ سپورت زالى, اسحاناسى, جۋالى اۋدانى قاراباستاۋ اۋىلىنداعى قوشمامبەتوۆ اتىنداعى ورتا مەكتەپكە جاپسارلاس سپورت زالى, سارىسۋ اۋدانى ۇيىم اۋىلىنداعى سۇلەيمەنوۆ اتىنداعى ورتا مەكتەپتىڭ سپورت زالى جانە شۋ اۋدانى دالاقاينار اۋىلىنداعى ت.اشىمباەۆ اتىنداعى مەكتەپتىڭ سپورت زالى, اسحاناسى, تەحنولوگيا كابينەتى جانە شەبەرحاناسىنىڭ قۇرىلىسى سالىناتىن بولادى. سونداي-اق ء«ۇمىت» تىرەك-قيمىل اپپاراتى بۇزىلعان بالالارعا ارنالعان مەكتەپ-ينتەرناتىنا جەدەلساتى ورناتۋ جۇمىستارى جۇرگىزىلەدى.
جامبىل وبلىستىق ءبىلىم باسقارماسىنىڭ باسشىسى راحيا تۇرماحانبەتوۆا 2019-2020 وقۋ جىلىندا وڭىردە 5 مەكتەپ پايدالانۋعا بەرىلەتىنىن ايتتى. «ونىڭ ىشىندە بايزاق اۋدانىندا ءۇش اۋىسىمدى
1 مەكتەپ, جامبىل اۋدانىندا ورىن تاپشىلىعى بار 1 مەكتەپ, ت.رىسقۇلوۆ اۋدانىندا اپاتتى جاعدايداعى 1 مەكتەپ جانە مەركى اۋدانىندا ورىن تاپشىلىعى بار 1 مەكتەپ بيىل پايدالانۋعا بەرىلەدى. قالعان 1 مەكتەپ 2020 جىلى پايدالانۋعا بەرىلەدى», دەيدى باسقارما باسشىسى. ايتا كەتەرلىگى, جىل سايىن جامبىل وڭىرىندە ءبىلىم بەرۋ وشاقتارىنىڭ ماسەلەسى بىرتىندەپ شەشىمىن تاۋىپ كەلەدى. بۇل رەتتە وبلىس اكىمى اسقار مىرزاحمەتوۆ ءتيىستى باسشىلارعا ءبىلىم وشاقتارىنا كوڭىل ءبولۋدى مىندەتتەپ, مەكتەپ قۇرىلىسىن جۇرگىزۋ بارىسىندا مەملەكەت قاراجاتىن ءتيىمدى جۇمساۋدى تاپسىرعان بولاتىن.
بۇگىنگى تاڭدا جامبىل وبلىسىندا اپاتتى جاعدايداعى 4 مەكتەپ بار. الايدا, اپاتتى مەكتەپتەر جىل سايىن ازايىپ كەلەدى. بۇل ماسەلە وبلىستىق اكىمدىكتىڭ نازارىندا. وبلىستىق ءبىلىم باسقارماسىنىڭ مالىمەتىنشە, اپاتتى جاعدايداعى 1 مەكتەپتىڭ قۇرىلىسى اعىمداعى جىلى اياقتالىپ, ت.رىسقۇلوۆ اۋدانى, جالپاقساز اۋىلىنداعى 48 ورىندىق ءبىلىم مەكەمەسى پايدالانۋعا بەرىلەتىن بولسا, قالعان 3 مەكتەپتىڭ ماسەلەسى 2020-2021 جىلدارى شەشىمىن تابادى دەپ جوسپارلانۋدا. اتاپ ايتساق, قورداي اۋدانى كۇنباتىس اۋىلىنداعى 152 ورىندىق ءبىلىم وشاعى, شۋ اۋدانى العا اۋىلىنداعى 300 ورىندىق امانگەلدى اتىنداعى ورتا مەكتەپ جانە بىرلىكۇستەم اۋىلىنداعى دومالاق انا اتىنداعى ورتا مەكتەپتەردىڭ قۇرىلىسى جوسپاردا تۇر. ال وڭىردە ءۇش اۋىسىمدا جۇمىس ىستەيتىن 1 مەكتەپتىڭ ماسەلەسى جاڭا مەكتەپ سالۋ ارقىلى شەشىلەدى. جاڭا وقۋ جىلىندا بايزاق اۋدانى اقشولاق اۋىلىنداعى 120 ورىندىق ورتا مەكتەپ پايدالانۋعا بەرىلەدى.
سونىمەن قاتار جامبىل وبلىسىندا ءبىلىم وشاقتارىنا كۇردەلى جوندەۋ جۇمىستارىن جۇرگىزۋگە دە ءتيىستى كوڭىل بولىنۋدە. ماسەلەن, 2019 جىلى وبلىس بويىنشا 10 ءبىلىم نىسانىنا كۇردەلى جوندەۋ جۇمىستارى جۇرگىزىلەدى. ونىڭ ىشىندە 5 مەكتەپ, 1 مەكتەپ-ينتەرنات, 2 بالاباقشا جانە 2 مەكتەپتەن تىس مەكەمە بار. اتالعان مەكەمەلەرگە كۇردەلى جوندەۋ جۇمىستارىن جۇرگىزۋگە 1 402,492 ميلليون تەڭگە قاراستىرىلعان. رەسپۋبليكالىق بيۋدجەتتەن 633,580 ميلليون تەڭگە بولىنسە, وبلىستىق بيۋدجەتتەن 586,324 ميلليون, ال قالالىق بيۋدجەتتەن 182,588 ميلليون تەڭگە بولىنگەن. باسقارمانىڭ مالىمەتىنشە, بۇگىندە ساتىپ الۋلار كونكۋرسى ارقىلى مەردىگەرلەردى انىقتاۋ جۇمىستارى جۇرگىزىلۋدە.
جامبىل وبلىسى
