وبلىس ورتالىعى تالدىقورعان قالاسىندا وتكەن تازالىق شاراسىنا 3 مىڭعا جۋىق ادام قاتىستى. جينالعان قوقىستى تاسىپ شىعارۋعا قالا بويىنشا 13 ارنايى تەحنيكا جۇمىلدى. وسىلايشا «Birge.TazaQazaqstan» رەسپۋبليكالىق اكتسياسىنا قاتىسۋشىلار تالدىقورعان قالاسىنىڭ اۋماعىندا ورنالاسقان قاراتال, بالىقتى وزەندەرىنىڭ جاعالاۋىن, ورتالىق باسسەين, جەڭىس, ارداگەرلەر ساياباقتارىن جانە قالا كوشەلەرىن قوقىستان تازارتىپ, جالپى اۋماعى 220 گەكتار جەردە جيناۋ جۇمىستارىن جۇرگىزدى.
- العاش رەت «Birge.TazaQazaqstan» رەسپۋبليكالىق اكتسياسى ەلىمىزدىڭ ەكولوگيا, گەولوگيا جانە تابيعي رەسۋرستار ءمينيسترى ماعزۇم مىرزاعاليەۆتىڭ باستاماسىمەن وتكەنى بەلگىلى. قازىر بۇل اكتسيا ەل كولەمىندە ۇيىمداستىرىلىپ وتىر. وسى ورايدا تالدىقورعان قالاسىنىڭ جۇرتشىلىعى دا بەلسەندىلىك تانىتۋدا. سەنبىلىككە كەلىپ, قولداۋ كورسەتۋ ارقىلى ءبىز تازالىققا ەرەكشە كوڭىل ءبولۋدى وسكەلەڭ ۇرپاققا ۇلگى كورسەتەمىز. سوندىقتان دا بۇل شارا الداعى ۋاقىتتا جالعاسىن تابادى,- دەيدى تالدىقورعان قالاسىنىڭ اكىمى عالىمجان ءابدىرايىموۆ.
الماتى وبلىسى
