قر پرەمەر-ءمينيسترى اسقار مامين قر تۇڭعىش پرەزيدەنتى – ەلباسى ن. نازارباەۆتىڭ تاپسىرماسى بويىنشا سالىنىپ جاتقان نۇر-سۇلتان قالاسىنداعى ۇلتتىق عىلىمي ونكولوگيالىق ورتالىققا باردى.
قر ۇكىمەتىنىڭ باسشىسىنا جاڭا عىلىمي ونكولوگيالىق ورتالىقتى سالۋ بويىنشا جول كارتاسىن ىسكە اسىرۋ بارىسى تۋرالى باياندالىپ, عيماراتتى جوبالاۋ سىزباسىمەن تانىستىرىلدى. عىلىمي ونكولوگيالىق ورتالىق استىڭعى قاباتىن قوسا العاندا 6 قاباتتان تۇرادى. عيماراتتىڭ جالپى اۋدانى — 49 شارشى مەتردەن استامدى قۇرايدى. قۇرىلىس اۋماعى — 16 مىڭ شارشى مەتردەن استام. قۇرىلىستى 2021 جىلعى ناۋرىزدا اياقتاۋ جوسپارلانعان.
جاڭا ورتالىقتا قاتەرلى ىسىك اۋرۋلارىن انىقتاۋ مەن ەمدەۋدىڭ الدىڭعى قاتارلى تەحنولوگيالارى پايدالانىلعان, سونىمەن قاتار, وسىعان دەيىن قۇرىلعان كارديولوگيالىق جانە نەيروحيرۋرگيالىق كلاستەرلەردىڭ تاجىريبەسىن پايدالانا وتىرىپ, لازەرلىك, ساۋلەلىك جانە جاسۋشالىق-يممۋندىق تەراپيا قولدانىلادى.
بۇگىندە ۋاقىتشا عيماراتتار مەن قۇرىلىستاردى سالۋ, وسىعان دەيىن بولعان اكىمشىلىك-تۇرمىستىق نىسانداردى بۇزۋ, شۇڭقىر قازۋ, سۋ دەڭگەيىن تومەندەتۋ, باعانانى قاعۋ جۇمىستارى ورىندالدى, سونداي-اق, ىرگەلى جۇمىستار باستالدى.
2018 جىلى ۇكىمەت مەديتسينالىق قىزمەتتەردى ۇسىنۋ ساپاسىن جاقسارتۋدى جانە ونكولوگيالىق ديسپانسەرلەردەگى جابدىقتاردى جاڭارتۋدى كوزدەيتىن, 2018–2022 جىلدارعا ارنالعان قاتەرلى ىسىك اۋرۋلارىمەن كۇرەس جونىندەگى كەشەندى جوسپاردى قابىلدادى.
بۇعان قوسا, نىساندى ارالاۋ بارىسىندا جاڭا عىلىمي ونكولوگيالىق ورتالىق سالۋ ءۇشىن جەر تەلىمىن نازارباەۆ ۋنيۆەرسيتەتىنەن رەسپۋبليكالىق مەنشىككە بەرۋ ماسەلەسى دە قارالدى.
