«ۇكىمەت باستاعان بارشا قازاقستاندىق تازالىق اكتسياسىنا قوش كەلدىڭىزدەر! بۇل شارا قازىر رەسپۋبليكالىق دارەجەدە ءوتىپ جاتىر. سول سياقتى بۇل اكتسيانى پرەزيدەنت قاسىم-جومارت توقاەۆ جەكە ءوزى قولداپ, ءبارىمىزدى قازاقستاندى تازا ءارى جاسىل ەل ەتۋگە شاقىردى. وتكەن اپتا ۇكىمەت باستاعان اكتسيانى ءبىز دە قولداپ, وسى اپتا ودان ءارى جالعاستىرۋدامىز. بۇگىنگى شاراعا بەلسەندى قاتىسىپ جاتىرعان بارشا استانالىقتارعا العىس بىلدىرەمىز» - دەدى قالا اكىمى التاي كولگىنوۆ.
ايتۋلى تازالىق شاراسىنا باس قالاداعى مينيسترلىك, قالالىق اكىمدىك جانە باسقارمالاردىڭ 1 500-دەن استام وكىلى اتسالىسۋدا. ودان بولەك, ەرىكتىلەر دە قاتىسۋدا. سونداي-اق, ەكولوگيالىق اكتسيانى قولداپ ۇكىمەت باسشىسى اسقار مامين, پرەمەر-ءمينيستردىڭ ورىنباسارى گۇلشارا ابدىقالىقوۆا, قر ەكولوگيا, گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ, قر ەڭبەك جانە حالىقتى الەۋمەتتىك قورعاۋ ءمينيسترى بەردىبەك ساپارباەۆ, قر دەنساۋلىق ساقتاۋ ءمينيسترى ەلجان ءبىرتانوۆ, قر ءبىلىم جانە عىلىم ءمينيسترى اسحات ايتماعامبەتوۆ, قر اقپارات جانە قوعامدىق دامۋ ءمينيسترى داۋرەن اباەۆ قاتىسۋدا.
ەسكە سالا كەتسەك, مەملەكەت باسشىسى ەكولوگيا, گەولوگيا جانە تابيعي رەسۋرستار ءمينيسترى ماعزۇم مىرزاعاليەۆتى قابىلداپ, حالىقتىڭ ەكولوگيالىق مادەنيەتتىلىگىن ارتتىرۋعا جانە قورشاعان ورتانى قورعاۋ جۇمىستارىنا ەرىكتىلەردى تارتۋ جونىندە تاپسىرما بەرگەن ەدى.
ارتىنشا مينيسترلىكتىڭ باستاماسىمەن #Birge #TazaQazaqstan ەكولوگيالىق اكتسياسى جاريالانىپ, اتالمىش اكتسيا اياسىنداعى شارالارعا ۇكىمەت باسشىسى اسقار مامين دە قاتىسقان بولاتىن.
