جاس قالامگەرلەر ماقالالارىندا اعا گازەتتىڭ عاسىر جىلناماسى بولۋىمەن قاتار, حالقىمىزدىڭ ۇلتتىق قۇندىلىقتارىن ساقتاۋعا, انا ءتىلىمىزدىڭ – مەملەكەتتىك ءتىلىمىزدىڭ قولدانىس اياسىن كەڭەيتۋگە اتسالىسقان, قازاق مەكتەپتەرى ازايىپ, قازاق ءتىلى ەسىكتەن قاراپ قالعان جىلدارى ونىڭ مۇڭىن مۇڭداعان كۇرەسكەرلىگىن كوركەم تىلمەن جەتكىزۋگە تىرىسقان. گازەتتىڭ ەسكى تىگىندىسىنەن ءتىل تۋرالى ءار جىلدارى جازىلعان ماقالالاردى مىسالعا الىپ, شىعارمالارىن جانداندىرا ءتۇسىپتى.
بايقاۋ جەڭىمپازدارىنا جۇلدە تاپسىرۋ سالتاناتىنا وبلىستاعى بۇقارالىق اقپارات قۇرالدارى وكىلدەرى مەن وقىرماندار قاتىستى. وبلىستىق تىلدەردى دامىتۋ باسقارماسىنىڭ باسشىسى گۇلجان مەڭدەكەنوۆا قازاق جۋرناليستيكاسىنىڭ قارا شاڭىراعى – «ەگەمەن قازاقستان» گازەتىنىڭ مەرەي تويىمەن قۇتتىقتادى.
«مەملەكەتتىك ءتىلدىڭ دامۋىنا «ەگەمەن قازاقستان» گازەتىنىڭ قوسقان ولشەۋسىز ۇلەسىن ناسيحاتتاۋ ماقساتىندا ء«تىل تاريحى: ءجۇز جىلدىق جىلناما» بايقاۋىن وتكىزۋدى ءجون دەپ تاپتىق. «ەگەمەن» قازاق ءتىلىنىڭ دامۋىنا اتسالىسۋىمەن دە ەرەكشەلەنەدى. ول قازاق ءتىلى توتە جازۋ, لاتىن, كيريلل قارىپتەرىنە كوشۋ كەزىندە جاڭا ءالىپبيدى ناسيحاتتاۋ, وقىرمانداردى وعان بەيىمدەۋ جۇمىستارىنىڭ كوشباسىندا بولدى. قازىر ەلىمىزدە قازاق ءالىپبيىن لاتىن قارپىنە كوشىرۋ جۇمىسى قانات جايىپ وتىر. مۇندا دا اعا باسىلىم الدىمەن گازەتتىڭ اتىن, تاقىرىپتارىن, ودان كەيىن ماقالالاردى لاتىن قارپىمەن بەرۋدى باستاپ, ۇلگى كورسەتتى», دەدى گۇلجان ەرماشقىزى.
بايقاۋدا «ەگەمەن» كەيىپكەرىنىڭ ىزىمەن» نوميناتسياسى بويىنشا امانگەلدى اۋداندىق «امانگەلدى ارايى» گازەتىنىڭ ءتىلشىسى انەت جۇمابەكوۆ جانە «جاس قالام» نوميناتسياسى بويىنشا ليساكوۆ قالالىق «ليساكوۆسكايا نوۆ» گازەتىنىڭ ءتىلشىسى ايمان قادىرحانوۆا ديپلوممەن جانە اقشالاي سىيلىقپەن ماراپاتتالدى. ءۇشىنشى ورىندى العان قوستاناي قالالىق «ناش كوستاناي» گازەتىنىڭ ءتىلشىسى اياگوز كاكىمجانوۆاعا ديپلوم مەن 50 مىڭ تەڭگە سىيلىق تاپسىرىلدى. ەكىنشى ورىندى «QOSTANAI» تەلەارناسىنىڭ جۇرگىزۋشى-رەداكتورى نۇرقانات بۇقاباەۆ يەلەندى, وعان ديپلوم مەن 70 مىڭ تەڭگە تابىس ەتىلدى. ءبىرىنشى ورىندى وبلىستىق قوستاناي تاڭى گازەتىنىڭ ءتىلشىسى قاسقىرباي قويشىمانوۆ جەڭىپ الىپ, ديپلوم جانە 100 مىڭ تەڭگە سىيلىقپەن ماراپاتتالدى.
قوستاناي
