بۇگىن تاراز قالالىق مادەنيەت ۇيىندە كوپكە كومەگى تيگەن كاسىپكەرلەردى ماراپاتتاۋ ءراسىمى ءوتتى. قالا اكىمى قايرات دوساەۆ مەتسەنات ازاماتتارعا «جومارت جۇرەك» سىيلىعىن تابىس ەتتى. «بۇگىندە ەلباسىنىڭ «تۋعان جەرگە تۋىڭدى تىك» ۇرانىنا قولداۋ ءبىلدىرىپ, قالادا الەۋمەتتىك-مادەني عيماراتتاردى, ساياباقتار مەن مۇراجايلاردى قالپىنا كەلتىرۋ مەن قۇرىلىسىن جۇرگىزۋ باعىتىندا اۋقىمدى جۇمىستار اتقارىلۋدا. «رۋحاني جاڭعىرۋ» باعدارلاماسى اياسىندا قالادا 2 ساياباق قالپىنا كەلتىرىلىپ, قايتا جاڭعىرتىلدى. ءبىر مادەنيەت نىسانى, 4 امبەباپ سپورت الاڭشالارى پايدالانۋعا بەرىلدى. مەتسەناتتارىمىز كوپبالالى وتباسىلارعا ەكى پاتەر كىلتىن تابىستاسا, سپورت چەمپيونى مۇگەدەك بالا اسىراپ وتىرعان وتباسىنا اۆتوكولىك تابىس ەتتى. بيىل دا مۇقتاج جاندارعا قولۇشىن سوزىپ, كومەك كورسەتەتىن ازاماتتار سانى ارتا تۇسەدى دەپ سەنەمىن», دەدى اكىم ءوز سوزىندە.
جيىن بارىسىندا الەۋمەتتىك از قامتىلعان جانە كوپبالالى وتباسىلاردىڭ 50 ميلليون تەڭگە كولەمىندەگى كوممۋنالدىق تولەماقى قارىزدارى مەن ءوسىمپۇلدارىنا قايىرىمدىلىق كومەك كورسەتكەنى ءۇشىن «جىل مەتسەناتى» اتالىمى «تارازەنەرگوورتالىق» اق پرەزيدەنتى باقبەرگەن ماۋلەنوۆكە تابىستالدى. سونىمەن قاتار, «جىل تۇلعاسى» اتالىمى «اگروسپەتسستروي» جشس-ءنىڭ ديرەكتورى مارات راحيمبەرديەۆكە بەرىلدى. كاسىپورىن باسشىسى ءوز قۇرىلىس كومپانياسىمەن كوپتەگەن ءىرى قۇرىلىس نىساندارىن سالىپ, پايدالانۋعا بەرگەن. سەرىكتەستىك جىل سايىن قارتتار ۇيىنە, جەتىم جانە اتا-اناسىنىڭ قامقورلىعىنان ايرىلعان بالالارعا, مۇمكىندىگى شەكتەۋلى جاندارعا قايىرىمدىلىق كومەك كورسەتىپ كەلەدى. اۋعان سوعىسىنىڭ ارداگەرى, قالا تۇرعىنى ا.موجاروۆتىڭ تۇرعىن ءۇيىن كۇردەلى جوندەۋدەن وتكىزىپ بەردى. «تۋعان جەرگە تۋىڭدى تىك!» كەڭ كولەمدى اكتسياسى اياسىندا مەكەمە جۇمىسشىلارىنىڭ باسپانالى بولۋىنا ءوز ىقپالىن تيگىزىپ, «جەڭىس» ساياباعىنىڭ اباتتاندىرىلۋىنا دەمەۋشى رەتىندە ۇلەس قوستى.
سونداي-اق, «تۋعان ولكە» اتالىمىمەن «مەيىرىم» مەديتسينالىق ورتالىعىنىڭ قۇرىلتايشىسى گۇلدارا نۇرىموۆا, «جۇرەكتەن جۇرەككە» اتالىمىمەن جەكە كاسىپكەر مەرۋەرت لەشتاەۆا, «جىلدىڭ ۇزدىك ۇيىمى» اتالىمىمەن تاراز قالالىق №1 اۋرۋحاناسىنىڭ باس دارىگەرى نۇرلان ابىلداەۆ, «ەرەن ەرىكتىلىك» اتالىمىمەن «جاسىل ەل» ەڭبەك جاساعىنىڭ بەلسەندىسى, ۆولونتەر ماريام كەنجەمۇراتوۆا, «باتىل جۇرەك» اتالىمىمەن تاراز قالالىق پوليتسيا باسقارماسى جەرگىلىكتى پوليتسيا قىزمەتىنىڭ ۋچاسكەلىك پوليتسيا ينسپەكتورى, پوليتسيا كاپيتانى دانيار زاۋربەك سىندى ازاماتتار ماراپاتتالدى.
جامبىل وبلىسى
