بۇل پروبلەمالى نىساننىڭ قۇرىلىسىن 2011 جىلى «ازبۋكا جيليا» كومپانياسى باستاعان. تۇرعىن ءۇي 330 پاتەرگە ەسەپتەلگەن. 2016 جىلى «وردا ينجيرينگ» جشس بەرىلگەن. مۇنداعى ۇلەسكەرلەردىڭ سانى – 168 وتباسى.
ا.كولگىنوۆ پروبلەمالى نىساننىڭ قۇرىلىس قارقىنىن تومەندەتپەۋدى تاپسىردى.
ء«بىز سىزدەرمەن ماۋسىم ايىنىڭ 19-ى كۇنى كەزدەستىك. قازىردىڭ وزىندە ىلگەرىلەۋ بايقالادى. ەندى وسىنىڭ قارقىنىن تومەندەتپەۋ قاجەت. ءتيىمدى قۇرىلىس ماۋسىمىن دۇرىس پايدالانۋ كەرەك. قاۋىپسىزدىكتى ساقتاپ, ساپاعا ءمان بەرىڭىزدەر. ەكىنشى اۋىسىم جۇمىسشىلارى جاقىن ماڭداعى تۇرعىنداردىڭ مازاسىن الماي, ىشكى جۇمىستارمەن اينالىسۋ كەرەك. اۋماعىن اباتتاندىرۋدى كوكتەمگە قالدىرۋعا بولمايدى», – دەدى ا.كولگىنوۆ.
ەلوردا اكىمى جۇمىس ۋاقىتى باستالعانعا دەيىن قۇرىلىس الاڭدارىن ارالاپ, تاڭعى ۋاقىتتا باقىلاۋعا العان نىسانداردىڭ قۇرىلىسىن قاداعالايدى. قالادا قۇرىلىسى اياقتالماعان 51 پروبلەمالى نىسان بار.
