ارينە, قوس پالاتالى پارلامەنتتىڭ قالىپتاسىپ, اياعىنان تىك تۇرىپ كەتۋى وڭاي شارۋا بولعان جوق. مۇنداي ۇلكەن جەتىستىكتى ەڭ الدىمەن رەسپۋبليكانىڭ تاۋەلسىزدىگىمەن بايلانىستىرامىز. تاۋەلسىزدىكتى جاريالاعاننان كەيىن ەلىمىز بىرتىندەپ ەڭسەسىن تىكتەپ, ءوزىنىڭ بۇدان بىلايعى الار بيىگىن ەركىن ءارى دۇرىس تاڭداۋدىڭ جارقىن جولىنا ءتۇستى. سونىڭ ءبىرى ءارى ەڭ باستىسى – بيلىك تارماقتارىنىڭ جۇمىسىن رەتتەۋ بولاتىن. اتقارۋشى بيلىك, زاڭ شىعارۋ بيلىگى جانە سوت بيلىگى ءوز وكىلەتتىكتەرى شەگىندە ءبىر-بىرىمەن ءوزارا تىعىز قارىم-قاتىناس جاساي وتىرىپ, دەربەس جۇمىس ىستەي بىلۋگە ءتيىس ەدى.
وسىنداي كەلەلى ماقساتتى جۇزەگە اسىرۋ ءۇشىن قۇرىلعان جوعارى زاڭ شىعارۋ ورگانىنا سايلانىپ, قازاقستاننىڭ تۇكپىر-تۇكپىرىنەن كەلگەن سۋ جاڭا دەپۋتاتتار 1996 جىلى قاڭتار ايىندا سول كەزدەگى ارۋ استانامىز الماتى قالاسىنداعى پارلامەنت ۇيىنە جينالىپ, ەل تاريحىنا شەجىرە بولىپ ەنگەن زاڭ شىعارۋ جۇمىسىن باستاپ تا كەتتى.
جالپى, قازاقستاننىڭ تاۋەلسىزدىگى جىلدارىندا تۇڭعىش دەگەن ءسوزدىڭ ءجيى قولدانىلاتىنىنا قۇلاعىمىز ۇيرەندى. ويتكەنى ءبارى دە تۇڭعىش رەت جاسالىپ جاتتى عوي. پارلامەنتتە دە سولاي بولدى. قوس پالاتالى تۇڭعىش پارلامەنت. ءماجىلىس پەن سەناتتىڭ تۇڭعىش توراعالارى, جاڭا زاڭ شىعارۋ ورگانىنا تۇڭعىش رەت سايلانعان دەپۋتاتتار... مىنە, وسى تۇڭعىشتاردىڭ اراسىندا ءبىزدىڭ بۇگىنگى كەيىپكەرىمىز ەرمەك جيەنشە ۇلى جۇماباەۆ تا بار ەدى.
سەناتورلىق ورىنعا جايعاسقانعا دەيىن بەلگىلى ءبىر دارەجەدە ءومىر تاجىريبەسىنەن وتسە دە پارلامەنت تابالدىرىعىنان اتتاعان كەزدەن باستاپ ەرەكەڭنىڭ ءوزىن ۇلكەن ءبىر ەمتيحاننىڭ الدىندا تۇرعانداي سەزىنگەنى بار-دى. ءبىر ەسەپتەن ونىڭ سەبەبى تۇسىنىكتى دە شىعار. تاۋەلسىز ەلدىڭ ەڭ جوعارى زاڭ شىعارۋ ورگانىندا جۇمىس ىستەۋ, رەسپۋبليكا ەگەمەندىگىن بەكەمدەي تۇسۋگە اتسالىسار زاڭدار قابىلداۋ جاۋاپكەرشىلىگى كىم-كىمدى دە تولعانتپاي, تولقىتپاي قويمايتىنى انىق.
ول ءبىر ۇمتىلماس كەزدەر-ءدى. ەرەكەڭ ءوزى بەس جىل ستۋدەنتتىك قىزىقتى جىلدارىن وتكىزگەن, كەيىن تۋعان جەرگە ورالسا دا اسەم دە سۇلۋ كوركى كوكەيىنەن كەتپەگەن اياۋلى الماتىعا اراعا جىلدار سالىپ قىزمەت بابىمەن كەلەمىن دەپ ويلاماعان دا شىعار. اسقاق الاتاۋدىڭ باۋرايىنداعى بۇل قالانىڭ كەلبەتىنە كوز تويعان با. شىركىن, الماتىنىڭ, كورىكتى بويجەتكەندەي كەربەز قالپى جۇرەك قىلىن شەرتىپ, جان تەبىرەنتۋدەن جالىقپايدى-اۋ.
ءبىر جاعىنان سۇيىكتى قالاسىنا قىزمەت بابىمەن تۇراقتايتىنىنا, ەكىنشى جاعىنان بيلىك تارماعىنىڭ ەڭ جوعارى ورگانىنىڭ ءبىرى – پارلامەنتكە دەپۋتات بولىپ سايلانۋىنا مارقايعان كوڭىلى قۋانىش سەزىمىمەن استاسىپ تا جاتقان-دى. شىنىندا دا, «العاشقى سەزىمدى ەكىنشى رەت باستان وتكىزە المايسىڭ» دەگەن اعىلشىن ماتەلىنە سۇيەنە ايتساق, قايسىبىر وقيعالار ادام زەردەسىندە ءومىر باقي ەستەن كەتپەستەي بولىپ قالىپ قويادى ەمەس پە؟ ەرمەك جيەنشە ۇلى مۇنى سەناتقا پاۆلودار وبلىسىنان دەپۋتات بولىپ سايلانعان كەزدە ءوز باسىنان وتكىزدى.
وسى ارادا ءسال شەگىنىس جاساپ, ەرەكەڭنىڭ قازاقستان رەسپۋبليكاسى پارلامەنتى سەناتىنا دەپۋتات بولىپ سايلانعانعا دەيىنگى ءومىرىن قىسقاشا شولا كەتكەندى ءجون كورىپ وتىرمىز.
ءيا, سونىمەن پارلامەنت سەناتىنا پاۆلودار وبلىسىنان ءبىر ەمەس, قاتارىنان بىرنەشە رەت سايلانىپ, مارتەبەلى مەكەمە قابىرعاسىندا تابانداتقان 18 جىل تەر توگىپ, ونىڭ باقانداي توعىز جىلىندا سەناتتاعى جەتەكشى كوميتەت قاتارىنان سانالاتىن, اتاۋى ۋاقىت تالابىنا ساي وزگەرىپ وتىراتىن زاڭناما كوميتەتىنە باسشىلىق جاساپ, ەگەمەندىگىمىزدى بەكەمدەي تۇسەتىن جۇزدەگەن زاڭداردى وي ەلەگىنەن وتكىزىپ, كونستيتۋتسياعا وزگەرىستەر مەن تۇزەتۋلەر ەنگىزۋدىڭ باسى-قاسىندا ءجۇرىپ, قىسقارتىپ ايتقاندا, قىرۋار ءىس تىندىرىپ, قۇرمەتتى دەمالىسقا شىققان ەرەكەڭ پارلامەنتكە دەپۋتات بولىپ سايلانۋدان بۇرىن-اق ءوز ماماندىعىنا ابدەن ىسىلعان, زاڭگەرلىككە قاتىستى ءتيىستى مەكتەپتەردەن وتكەن جان ەدى.
مىسال ءۇشىن ايتساق, ءومىر جولىن ءوزى تۋىپ-وسكەن پاۆلودار وبلىسىنىڭ شارباقتى اۋدانىنداعى شالداي اۋىلىندا ورتا مەكتەپتى تامامداعاننان كەيىن وسى وبلىستىڭ لەبياجى اۋدانىنا قاراستى شاقا اۋىلىنداعى, سودان سوڭ شارباقتى اۋدانىنا قاراستى جاڭا زاۋىت اۋىلىنداعى مەكتەپتە مۇعالىم بولۋدان باستاعان ەرەكەڭ ەل الدىنداعى اسكەري بورىشىن وتەگەننەن كەيىن جۇرەك قالاۋىمەن زاڭگەرلىك ماماندىعىن الۋعا تالپىنىپ, الماتىعا اتتاندى. زەردەسى مىقتى, زەرەك تالاپكەر كوپ ۇزاماي س.م.كيروۆ اتىنداعى قازمۋ-ءدىڭ (قازىرگى ءال-فارابي اتىنداعى قازۇۋ) زاڭ فاكۋلتەتىنىڭ ستۋدەنتى اتاندى. ۋنيۆەرسيتەت قابىرعاسىنان زاڭگەر ماماندىعىن الىپ شىققاننان كەيىن پاۆلودار وبلىسىنىڭ پروكۋراتۋرا ورگاندارىندا ەڭبەك جولىن باستادى. باياناۋىل اۋداندىق پروكۋراتۋراسىنىڭ تەرگەۋشىسى, وبلىس پروكۋراتۋراسىنىڭ اعا تەرگەۋشىسى, پاۆلودار قالاسىنداعى يندۋستريالدىق اۋدانى پروكۋرورىنىڭ ورىنباسارى, ەكىباستۇز, ماي, جەلەزين اۋداندارىنىڭ پروكۋرورى بولىپ ابىرويمەن ەڭبەك ەتتى.
كورىپ وتىرعانىمىزداي, ەرەكەڭ وبلىستىڭ زاڭ سالاسىن دامىتۋعا 20 جىلدان استام ۋاقىتىن ارناپتى. وسى جىلدار ىشىندە ونىڭ وبلىستىڭ قاي اۋدانىنا بارماسىن ءوز ءىسىن ءمىنسىز اتقارۋى باسشىلىقتىڭ دا, قاراپايىم حالىقتىڭ دا ۇنەمى نازارىندا بولدى. بۇل ارادا اڭگىمە پروكۋروردىڭ اتقارىپ جۇرگەن تىرلىگىنە باسشىلىق تاراپىنان دا, جۇرتشىلىق تاراپىنان دا كورسەتىلەتىن ريزاشىلىق تۋرالى بولىپ وتىر. ءبىزدىڭ ويىمىزشا, بۇل – سيرەك كەزدەسەتىن جاعداي.
ادەتتە زاڭگەرلەردىڭ, ونىڭ ىشىندە پروكۋرورلاردىڭ جۇمىسى باسشىلىققا جاققانىمەن, جۇرتشىلىققا جاقپايتىن جايتتار ءجيى كەزدەسىپ جاتادى. مۇنىڭ سەبەبى باسشىلار جوعارى جاققا بەرگەن ەسەبىندە جەرگىلىكتى جەردەگى جاعدايدى, ونىڭ ىشىندە زاڭدىلىق ماسەلەسىن ويداعىداي ەتىپ كورسەتۋگە بۇيرەگى بۇرىپ تۇرادى. الايدا, كوپشىلىك بولعان سوڭ ماسەلەنىڭ بارلىق ۋاقىتتا بىردەي تاپ-تۇيناقتاي بولمايتىنى جانە بار. مىنە, وسىنداي ساتتەردە پروكۋروردىڭ قىراعىلىعى, سونىمەن بىرگە ماسەلەگە ادىلەتتىلىك تۇرعىسىنان قاراي بىلۋگە بەيىمدىلىگى سىنعا تۇسەدى. ياعني قىزمەت بابىندا بىرجاقتىلىققا ۇرىنباۋ, ادامدارمەن جۇمىس ىستەي ءبىلۋ, ولارعا زاڭ اكتىلەرىن ءتۇسىندىرۋ, ءتۇرلى ءتارتىپ بۇزۋشىلىقتاردىڭ الدىن الۋ ماقساتىندا حالىق اراسىندا اڭگىمەلەر جۇرگىزۋ ءتارىزدى شارالاردى قولدانۋ وڭ ناتيجەسىن بەرەدى. تۇپتەپ كەلگەندە وسىنداي ناتيجەلى جۇمىستاردىڭ ارقاسىندا ءتارتىپ كۇشەيەدى, زاڭ بۇزۋشىلىق ازايادى, دەمەك باسشىلار تاراپىنان جوعارىعا جالعان اقپارات بەرۋدىڭ دە جولى كەسىلەدى.
ەرەكەڭنىڭ ءوز ماماندىعى بويىنشا ءمىنسىز قىزمەت اتقارۋىنىڭ قىر-سىرى دا وسىندا جاتىر. جوعارىدا ايتقانىمىزداي, زاڭدىلىق ءتارتىبىن قاتاڭ ساقتاۋ, ادىلدىكتى مۇرات تۇتۋ, ونىڭ ۇستىنە قاي جەردە دە, قانداي جاعدايدا دا زاڭ تىلىندە شەشەن سويلەپ, ويىن, پىكىرىن جۇرتقا دا, باسشىلارعا دا, ارىپتەستەرىنە دە ۇعىنىقتى ەتىپ جەتكىزە ءبىلۋ ەرمەك جيەنشە ۇلىنا ءتان قاسيەت. بۇعان پارلامەنت سەناتىنىڭ اپپاراتىندا قىزمەت ەتكەن جىلدارىمدا مەن دە كۋا بولدىم.
ءبىز, سەنات اپپاراتىنىڭ قىزمەتكەرلەرى, نەگىزىنەن دەپۋتاتتاردىڭ ساپالى زاڭدار شىعارۋىنا قولعابىس جاسايمىز. قاجەتىنە قاراي, رەتى كەلگەن جەردە كوميتەتتەردىڭ, سەناتتىڭ وتىرىستارىنا قاتىسامىز. مىنە, سونداي تۇستاردا قابىلدانعالى تۇرعان زاڭعا بايلانىستى ءارتۇرلى تالاس-تارتىستار تۋىندايدى. وسىنداي پىكىرتالاستار بارىسىندا كەيبىر زاڭ جوبالارىنىڭ شيكى تۇستارى ايقىندالىپ, ول قايتا پىسىقتاۋ ءۇشىن كەيىنگە قالدىرىلىپ جاتادى. مۇنداي پىكىرتالاستارعا ەرەكەڭ بەلسەنە ارالاسىپ, شەشەن تىلمەن باياندالعان بۇلتارتپاس دالەلدى تۇجىرىمدارىمەن ارىپتەستەرىن ءتانتى ەتەدى.
ەرەكەڭنىڭ بويىنداعى جالپى جۇرت مويىنداعان وسىنداي ءوز ىسىنە جەتىكتىگىنە, بىلىكتىلىگىنە, بۇعان قوسا ويىن دالەلدەۋ باعىتىندا كوسىلە سويلەيتىن شەشەندىگىنە كوپشىلىكپەن بىرگە ءسۇيسىنۋشى ەدىك. كەيىن بىلسەك, مۇنىڭ دا ارعى جاعىندا وزىندىك سىرى بار ەكەن. ەرەكەڭنىڭ اكەسى, ۇلى وتان سوعىسىنا قاتىسىپ, الدەنەشە مەدالدارمەن, وردەندەرمەن ماراپاتتالعان, كوپ بالالى وتباسىنىڭ وتاعاسى (ەكى ۇل, بەس قىز) جيەنشە قامزا ۇلى ەرەكەڭ مەكتەپ قابىرعاسىندا جۇرگەن كەزىندە-اق ۇلىنىڭ اياق الىسىن سىرتتاي باقىلاپ, ورايى كەلگەن كەزدە اسىقپاي, بابىمەن سويلەيتىن ادەتىمەن: «بالام, ۇقىپتىلىققا, تياناقتىلىققا وسى باستان ۇيرەن. ءبىزدىڭ ارعى-بەرگى اۋلەتىمىزدە ءىس-ارەكەتىمەن, كوپشىل مىنەزىمەن ۇرپاققا ۇلگى-ونەگە قالدىرعان اتالارىڭ از بولماعان. سونىڭ ىشىندە اسىرەسە سەنىڭ ءتۇپ ناعاشىڭ تەمىرعالي تۇيتە ۇلى نۇرەكەنوۆتىڭ حالقىنا سىڭىرگەن ەڭبەگىن جۇرت وسى كۇنگە دەيىن اۋزىنان تاستامايدى. انە سونداي اياۋلى جانداردىڭ اتىنا كىر كەلتىرمەيتىندەي تىرلىك جاساۋ كەرەك. ۇقىپتى, تياناقتى بول دەيتىنىم سوندىقتان» دەپ تۇيىندەيتىن.
كەيىن ەسەيىپ, بۇعاناسى قاتقان كەزدە تەمىرعالي تۇيتە ۇلىنىڭ ءوز زامانىنىڭ وزىق ويلى قايراتكەرى بولعانىن, سول كەزدە رەسەي قاراماعىنداعى قازاقستاننىڭ سەمەي گۋبەرنياسىنان توپ جارىپ, رەسەي مەملەكەتتىك دۋماسىنىڭ دەپۋتاتى اتانعانىن, تۋعان حالقىنىڭ تەڭدىگى جولىندا جان اياماي قىزمەت ەتكەنىن تولىعىراق, تەرەڭىرەك وقىپ بىلگەن تۇستا كەۋدەسىن ماقتانىش سەزىمى كەرنەۋمەن بىرگە قازىرگى اتقارىپ جۇرگەن جۇمىسىنداعى جاۋاپكەرشىلىكتى سونداي اياۋلى اتالاردىڭ اماناتىنداي تۇيسىنگەنى بار.
راسىندا دا, تەكتىدەن تەكتى تۋادى, تەكتىنىڭ جولىن قۋادى دەمەكشى, ءبىر كەزدە تەمىرعالي تۇيتە ۇلى ءتارىزدى اتالارى حالقىنىڭ مۇڭ-مۇقتاجىن وزدەرى تاۋەلدى بولىپ وتىرعان ەلدىڭ جوعارى مىنبەرىنەن ايتىپ, ەلىنىڭ ەڭسەسى ەزىلگەن جاعدايىن شاماسى كەلگەنشە جەڭىلدەتۋگە كۇش سالعان بولسا, ەرەكەڭ جەر بەتىندەگى تەرەزەسى تەڭ ەلدەردىڭ بىرىنە اينالعان قازاقستاننىڭ ەڭ جوعارى زاڭ شىعارۋ ورگانىنىڭ دەپۋتاتى بولا ءجۇرىپ حالقىمىزدىڭ ءوز ەلىمىزدە دە لايىقتى ءومىر ءسۇرىپ, شەت مەملەكەتتەرمەن دە قارىم-قاتىناس جاساۋدى جولعا قويۋدا ەشكىمگە جالتاقتاماي, وزىنە ءتان باعىتپەن ىلگەرى جىلجۋىنا سەپتىگىن تيگىزەتىن زاڭدار شىعارۋعا ۇلەس قوستى.
بۇل ارادا ءبىز ەرمەك جيەنشە ۇلىنىڭ 18 جىلدىق دەپۋتاتتىق قىزمەتتە اتقارعان قىرۋار شارۋالارىن جىپكە ءتىزىپ بايانداۋدى ماقسات ەتىپ وتىرعان جوقپىز. ول – ۇزاق اڭگىمە. سوندىقتان ءبىر ءسات تە تولاستامايتىن زاڭ شىعارۋ قىزمەتىنەن بولەك, پارلامەنت اياسىنداعى ونداعان ءىس-شارالارمەن شۇعىلدانعانىن اتاپ وتەيىك. ول سەناتتاعى ء«وڭىر» دەپۋتاتتىق توبىنا جەتەكشىلىك ەتتى, ۇلتتىق كەڭەسىنىڭ, پرەزيدەنتى جانىنداعى زاڭدار جيناعىن شىعارۋ جونىندەگى ۇلتتىق كوميسسيانىڭ, جوعارى سوت كەڭەسىنىڭ مۇشەسى بولدى. حالىقارالىق دەڭگەيدەگى جۇمىستارعا پارلامەنت اتىنان وكىلدىك ەتتى. قازاقستان اتىنان پارلامەنتارالىق وداقتىڭ قۇرامىنا; ۇلىبريتانيا بىرىككەن كورولدىگى مەن سولتۇستىك يرلانديا پارلامەنتتەرىمەن ىنتىماقتاستىق توبىنا; جاپونيانىڭ كەڭەسشىلەر پالاتاسىنىڭ قۇرامىنا كىردى, سونداي-اق ساۋد ارابياسىنىڭ كونسۋلتاتيۆتىك كورولدىگىمەن دە وسىنداي باعىتتا ىنتىماقتاسا جۇمىس ىستەدى.
ونىڭ وزىنە جۇكتەلگەن جۇمىسقا اسقان جاۋاپكەرشىلىكپەن قارايتىنىن, ءاربىر ماسەلەنى اقىلعا سالىپ, كەڭ ويلاپ شەشەتىنىن, ارىپتەستەرىمەن دە, قاراماعىنداعى قىزمەتكەرلەرىمەن دە ءتىل تابىسا جۇمىس ىستەيتىنىن, ءتىپتى الدىنا ءبىرىنشى رەت كەلىپ, شارۋا ايتىپ وتىرعان بەيتانىس ادامنىڭ قانداي جاعدايدا دا كوڭىلىن جىقپاۋعا, مەسەلىن قايتارماۋعا تىرىساتىن مىنەزىن ءوز تاجىريبەمنەن دە بايقادىم. ول بىلاي بولعان ەدى. الماتىداعى زاڭ اكادەمياسىندا ءبىلىم الىپ جاتقان ستۋدەنت بالامنىڭ استاناداعى ادىلەت مينيسترلىگىنەن تاعىلىمدامادان ءوتۋى كەرەك بولدى. اقمولاعا پارلامەنت سەناتى اپپاراتىنىڭ قۇرامىندا كوشىپ كەلگەنىمىزگە كوپ بولا قويعان جوق. ەشكىمدى تانىمايمىز. ونىڭ ۇستىنە اپپارات قىزمەتكەرلەرىنە دەپۋتاتتارعا جەكە شارۋامەن بارعانداردىڭ قاتاڭ جازالاناتىنى ەسكەرتىلگەن. سوعان قاراماستان, تانىماسام دا تاۋەكەل دەپ سەناتتا كوميتەت توراعاسى قىزمەتىن اتقاراتىن ەرمەك جيەنشە ۇلىنىڭ قابىلداۋىنا كىرۋگە بەل بايلادىم. قاس قارايعان كەشكى مەزگىل ەدى. جۇمىس ۋاقىتى اياقتالعاندىقتان, قابىلداۋ بولمەسىندەگى قىز كەتىپ قالىپتى. قوس قاباتتى ەسىكتىڭ بىرىنشىسىنەن ءوتىپ, ەكىنشىسىن توقىلداتىپ, رۇقسات الىپ, ىشكە ەندىم. ءوزىمنىڭ وسىنداعى اپپارات قىزمەتكەرى ەكەنىمدى ايتىپ, بۇيىمتايىمدى جەتكىزدىم. ەرمەك جيەنشە ۇلى مەنى بۇرىننان بىلەتىن ادامداي اشىق-جارقىن سويلەسىپ, شارۋامدى رەتتەپ, تاعى دا حابارلاسىپ تۇرۋعا تىلەك ءبىلدىرىپ, شىعارىپ سالدى. مىنە, بۇل ەرەكەڭنىڭ بويىندا كەيبىرەۋلەرگە ءتان قاتىپ-سەمگەن قاساڭدىقتان گورى ادام جانىن تۇسىنۋگە بەيىم تۇراتىن قاسيەتتىڭ باسىم ەكەنىن كورسەتسە كەرەك.
بۇگىندە 70 جاستىڭ بيىگىنە كوتەرىلگەن ەرەكەڭ تۇعىردان تايعان جوق. زاڭ سالاسىنا ارنالعان ونداعان كىتاپتاردىڭ اۆتورى, زاڭ عىلىمدارىنىڭ كانديداتى رەتىندە ستۋدەنتتەرگە ءدارىس وقيدى. ءومىر بويى ادال ەڭبەك ەتىپ, قايدا جۇرسە دە ابىروي بيىگىنەن كورىنە بىلگەن مەملەكەت پەن قوعامنىڭ كورنەكتى قايراتكەرىنە مەملەكەت تاراپىنان تالاي رەت لايىقتى ءىلتيپات كورسەتىلدى. پاۆلودار وبلىسىنىڭ, وسى وبلىستىڭ شارباقتى اۋدانىنىڭ قۇرمەتتى ازاماتى, قازاقستان پروكۋراتۋراسىنىڭ قۇرمەتتى قىزمەتكەرى اتاندى. ەلگە سىڭىرگەن ەڭبەگى رەسپۋبليكانىڭ جوعارى ناگرادالارىمەن «قۇرمەت», «پاراسات» وردەندەرىمەن, قازاقستان رەسپۋبليكاسىنىڭ قۇرمەت گراموتاسىمەن, التى مەدالمەن باعالانادى.
وتباسىنداعى جاعداي دا ويداعىداي ەدى. جان جارى ءۇمىتجان ەكەۋى قۇداي بەرگەن ۇل مەن قىزدان نەمەرەلەر ءسۇيىپ, جەر ورتاسىنا تايانعان شاقتارىندا قىزىق-قۋانىشقا كەنەلىپ, مارقايىپ جۇرەتىن. اتتەڭ... اتتەڭ... بىرىككەن ۇلتتار ۇيىمىنداعى قازاقستان وكىلدىگىندە جاۋاپتى قىزمەت اتقاراتىن تالانتتى ۇلدارى اسقاردىڭ 35 جاسىندا كەنەتتەن كوز جۇمۋى اتا-اناسىنىڭ قابىرعاسىنا قاتتى باتتى. شالعايداعى الپاۋىت ەلدە تۋعان قازاقستاننىڭ ءسوزىن سويلەپ جۇرگەن ورىمدەي جاستىڭ قازاسىنا سىرتقى ىستەر مينيسترلىگىنەن باستاپ, ەرەكەڭنىڭ تۋعان-تۋىستارى, جورا-جولداستارى, ارىپتەس-زامانداستارى تۇگەل كۇيزەلدى.
الايدا, ەرەكەڭنىڭ تابيعاتىنان رۋحى مىقتى. مايىستى, بىراق سىنعان جوق. ويتكەنى ول, ەگەر بەينەلەپ ايتساق, ءبىر كەزدە شاعىن عانا شالداي اۋىلىندا ءوسىپ-ونگەن جاي تەرەك ءتارىزدى بولسا, بۇگىندە تارامدانعان بۇتاقتارى تەرەڭگە تامىر جايىپ, كوككە قول سوزعان سايالى بايتەرەك ىسپەتتى. سوندىقتان ەرەكەڭ ءاربىر ادامنىڭ ومىرىندە كەزدەسەتىن وسىنداي قيىندىقتارعا توتەپ بەرىپ قانا قويماي, ءۇرىم-بۇتاعىن ساياسىنا الىپ, بيىكتەرگە بەتتەپ بارادى.
ورىنبەك جولدىباي,
قازاقستاننىڭ قۇرمەتتى ءجۋرناليسى
