- مىسالى, باتىس قازاقستان وبلىسىندا جالپى ورتا ءبىلىم بەرەتىن مەكەمە پەداگوگتارىنىڭ قۇقىعى بۇزىلعانى انىقتالدى. ولاردى ءوز قاراجاتى ەسەبىنەن مەديتسينالىق تەكسەرۋدەن وتۋگە زاڭسىز مىندەتتەگەن. ءبىلىم بەرۋدىڭ ينكليۋزيۆتى باعدارلامالارى بويىنشا جۇمىس ءۇشىن قوسىمشا اقى تولەمەگەن. بۇل ىسكە پروكۋراتۋرا ورگاندارى ارالاسىپ, وڭىردەگى 10 مىڭنان استام مۇعالىمنىڭ قۇقىعى قالپىنا كەلتىرىلدى, - دەيدى باۋىرجان زاكي ۇلى.
سونداي-اق ورال قالاسى جانە ءبورلى اۋدانى بويىنشا كوممۋنالدىق قىزمەت ءۇشىن قارىزى بار 200 مىڭنان استام ازاماتتىڭ دەربەس دەرەكتەرىن قورعاۋ قۇقىعىن بۇزۋ فاكتىلەرىنىڭ جولى كەسىلگەن. وسىعان وراي «اقسايجىلۋقۋات» جشس, «باتىسەنەرگورەسۋرسى» جشس قازاقستان رەسپۋبليكاسى اكىمشىلىك قۇقىقبۇزۋشىلىق تۋرالى كودەكستىڭ 79-بابى بويىنشا دەربەس دەرەكتەر جانە ولاردى قورعاۋ تۋرالى زاڭناماسىن بۇزعانى ءۇشىن اكىمشىلىك جاۋاپكەرشىلىككە تارتىلدى.
بۇدان وزگە پروكۋراتۋرانىڭ ۇسىنۋى بويىنشا ورال قالاسىنىڭ 104 مىڭ تۇتىنۋشىسى ءۇشىن «باتىس سۋ ارناسى» جشس كورسەتەتىن سۋمەن جابدىقتاۋ قىزمەتىنە تاريف قۇنى تومەندەتىلگەنى. 66 كاسىپورىنداعى 190 قىزمەتكەردىڭ جالاقى بويىنشا شاعىمى قارالىپ, 53,9 ملن. تەڭگەنى قۇرايتىن بەرەشەك ءوندىرىلدى.
- قازتالوۆ اۋدانىندا قۇنى 1,3 ملرد. تەڭگە بولاتىن سۋكەرنەۋىش مۇناراسىن بالانسقا الماۋ فاكتىسى انىقتالدى, بۇل تۇرعىندارعا اۋىز سۋدى سۋبسيديالاۋعا تەرىس اسەرىن تيگىزدى. سونىڭ كەسىرىنەن اۋىلداعى 3931 تۇرعىن 30 تەڭگەنىڭ ورنىنا جىل بويى سۋدىڭ ءار تەكشە مەترىنە 385 تەڭگە تولەپ كەلگەن, - دەيدى پروكۋراتۋرا وكىلى.
ستاتيستيكالىق مالىمەتتەر وڭىردە قىلمىستىق قۇقىق بۇزۋشىلىق مولشەرى 10%-عا تومەندەگەنىن كورسەتىپ وتىر. جالپى, قۇقىق قورعاۋ قىزمەتتەرى ورتالىعىنا جىل باسىنان بەرى 1007 ادام ءتۇرلى شاعىممەن كەلگەن. سونىڭ ىشىندە 766 ازاماتتى پروكۋرورلار قابىلداپ سويلەسكەن. «ولاردىڭ بارىنە زاڭناما ءتۇسىندىرىلىپ, تالاپ ارىز جازۋعا كومەك كورسەتىلدى» دەيدى بقو پروكۋراتۋراسىنىڭ رەسمي وكىلى باۋىرجان احمەتجان.
باتىس قازاقستان
