وبلىستىق دەنساۋلىق ساقتاۋ باسقارماسىنىڭ مالىمەتى بويىنشا, 11 247 وقۋشىدان ءتۇرلى اۋرۋلار انىقتالعان. اسىرەسە اس قورىتۋ جۇيەسى بۇزىلعان بالالار كوپ. ەكىنشى ورىندا كوز اۋرۋلارى. مەكتەپ وقۋشىلارىنىڭ 28,4 پايىزىنىڭ كوزى ناشار كورەدى. جۇرەك-قانتامىر, جۇيكە جۇيەسى اۋرۋلارىنا شالدىققانداردىڭ دا پايىزدىق ۇلەسى جوعارى.
دۇنيەجۇزىلىك دەنساۋلىق ساقتاۋ ۇيىمىنىڭ «دەنساۋلىقتى نىعايتۋعا مۇمكىندىك بەرەتىن مەكتەپتەر», «سالاۋاتتى ۋنيۆەرسيتەتتەر» دەپ اتالاتىن جوبالارىنىڭ ماڭىزدىلىعىن وسىدان دا اڭعارۋعا بولادى. 2016 جىلى نۇر-سۇلتان, الماتى قالالارىندا, ماڭعىستاۋ, قىزىلوردا وبلىستارىندا قاناتقاقتى جوبا رەتىندە ەنگىزىلگەن بۇل باستاما جاقسى ناتيجە بەرگەن. از ۋاقىتتىڭ ىشىندە بالالاردىڭ دەنساۋلىقتارى وڭالىپ, ءبىلىم وشاقتارىندا وڭ وزگەرىستەر بايقالعان. وبلىستىق تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى باسشىسىنىڭ ورىنباسارى امانتاي جۇماعاليەۆتىڭ ايتۋىنشا, اتالعان جوبالار مۇنايلى ايماقتا دا ىسكە اسا باستادى.
ءبىر اتاپ وتەرلىگى, جاڭا جوبانى ىسكە اسىرۋعا كەدەرگى كەلتىرەتىن جايتتار بار. وقۋشىلاردى تازا اۋىز سۋمەن قامتۋ پروبلەماسى ءالى وزەكتىلىگىن جويعان جوق. «مىسالى, قۇرمانعازى اۋدانىندا وسى ماقساتقا قاراجات قاراستىرىلماعان, - دەيدى دەپارتامەنت وكىلى. – وبلىس بويىنشا 21 مەكتەپتە سپورت زالى بولماعاندىقتان, بالالاردىڭ دەنە شىنىقتىرۋ ساباقتارىندا مۇمكىندىكتەرى شەكتەۋلى بولىپ وتىر». ال اتىراۋ قالاسىنداعى 49 مەكتەپتىڭ 16-سى عانا قاجەت جابدىقتارمەن تولىق قامتىلعان. 33 مەكتەپتە مەديتسينالىق قۇرالدار جەتىسپەيدى. وسى ولقىلىقتاردىڭ ورنىن تولتىرىپ, جاڭا جوبانى بەلسەندى ىسكە اسىرۋ ءۇشىن ءبىلىم وردالارى ىنتىماقتاستىق مەموراندۋمىنا قول قويعان. بالالار اراسىنداعى اۋرۋشاڭدىلىق دەڭگەيىن تومەندەتىپ, سالاماتتى ءومىر سالتىن قالىپتاستىرۋعا تۇرتكى بولاتىن جوبا وتكەن جىلى وڭىردەگى 27 مەكتەپتە ەنگىزىلسە, بيىل بۇل كورسەتكىشتى 38-گە جەتكىزۋ جوسپارلانىپ وتىر.
اتىراۋ
