«سق-فارماتسيا» جشس باسقارما توراعاسىنىڭ مىندەتىن اتقارۋشى بەرىك ءشارىپتىڭ ايتۋىنشا, مەديتسينالىق ۇيىمداردان تۇسكەن قاتە وتىنىمدەرگە بايلانىستى جەتكىزۋدە ىركىلىستى بولدىرماۋ ماقساتىندا بيىل ءبىرىڭعاي ديستريبيۋتور تمككك اياسىندا قىزمەت كورسەتەتىن مەديتسينالىق ۇيىمدارمەن جاريا وفەرتانى جاسادى.
«وفەرتا اياسىندا تۇپكىلىكتى ءوتىنىمدەردى مەديتسينالىق ۇيىمدار قالىپتاستىرادى. بىراق جونەلتۋ ءبىر رەت ءمالىمدەلگەن كولەمنىڭ نەگىزىندە ەمەس, ناقتى قاجەتتىلىك پەن تۇتىنۋ جىلدامدىعى نەگىزىندە جۇزەگە اسىرىلادى», دەپ ءتۇسىندىردى «سق-فارماتسيا» باسشىسى.
قازىرگى تاڭدا بىرىڭعاي ديستريبيۋتور ءدارى-دارمەكتەرگە قوسىمشا قاجەتتىلىككە ارنالعان ءوتىنىمدەردى تۇراقتى نەگىزدە قابىلداپ, وڭدەيدى. وسى ءوتىنىمدەردىڭ نەگىزىندە جونەلتۋگە رۇقسات قاعازداردى رەسىمدەيدى جانە سوعان سايكەس ءدارى-دارمەكتەردى وڭىرلەرگە تاراتادى.
بىرىڭعاي ديستريبيۋتوردىڭ ءدارى-دارمەك ساتىپ الۋ ءجونىندەگى ءمالىمەتىنە قاراعاندا, ءبىرىنشى جارتىجىلدىقتا امبۋلاتوريالىق پاتسيەنتتەردى تەگىن قامتاماسىز ەتۋ ءۇشىن ەڭ كوپ مەديتسينالىق پرەپاراتتار الماتى قالاسىنىڭ ەمحانالارىنا كەلىپ ءتۇستى. الماتىعا شامامەن 7,8 ملرد تەڭگە سوماعا ءدارى-دارمەك تيەلگەن, ال پاتسيەنتتەر قازىردىڭ وزىندە 5,3 ملرد تەڭگەگە تەگىن ءدارى-دارمەك العان. جىل سوڭىنا دەيىن مەگاپوليسكە مەديتسينالىق ۇيىمداردىڭ ءوتىنىمدەرى بويىنشا 12,3 ملرد تەڭگەنىڭ مەديتسينالىق ءونىمى تۇسەدى.
كولەمى بويىنشا ەكىنشى تەگىن ءدارى-دارمەك العان شىعىس قازاقستان وبلىسىندا 9,8 ملرد تەڭگەگە تاپسىرىس بەرىلگەن. ياعني جىلدىق كولەمنەن 5,7 ملرد تەڭگەگە دارىلىك زاتتار الىندى. وسى وڭىردەگى ەمدەلۋشىلەر قازىرگى تاڭدا 5,3 ملرد تەڭگەگە تەگىن رەتسەپت بويىنشا ءدارى-دارمەك الدى.
ەلوردالىق مەديتسينالىق ۇيىمدارعا ءبىرىنشى جارتىجىلدىقتا 6,2 ملرد تەڭگەلىك جالپى جىلدىق ءوتىنىمنەن 5,6 ملرد تەڭگەگە تەگىن ءدارى-ءدارمەك كەلىپ ءتۇستى. ونىڭ ىشىندە 1 شىلدەگە دەيىن نۇر-سۇلتان قالاسىنىڭ امبۋلاتورلىق ەمدەلۋشىلەرىنە 3,2 ملرد تەڭگە كولەمىندە ءدارى-دارمەك بەرىلدى.
5 ملرد تەڭگەگە ءدارى-ءدارمەكتەر قاراعاندى وبلىسىنا, 4,4 ملرد تەڭگەگە تۇركىستان وبلىسىنا جانە 4,1 ملرد تەڭگەگە الماتى وبلىسىنا جونەلتىلدى. قوستاناي وبلىسى ديسپانسەرلىك ەسەپتە تۇرعان امبۋلاتورلىق ەمدەلۋشىلەر ءۇشىن 2,9 ملرد, جامبىل – 2,8 ملرد, اتىراۋ – 2,7 ملرد جانە قىزىلوردا – 2,6 ملرد تەڭگەگە ءدارى-دارمەك الدى. باتىس قازاقستان وبلىسى جانە شىمكەنت قالاسىنا ءدارى-دارمەكتەر 2,5 ملرد, سولتۇستىك قازاقستان وبلىسىنا – 2,4 ملرد, اقمولا وبلىسىنا – 2,3 ملرد, اقتوبە وبلىسىنا – 2,1 ملرد, پاۆلودار وبلىسىنا – 1,8 ملرد جانە ماڭعىستاۋ وبلىسىنا 1,3 ملرد تەڭگەگە ءتۇستى.
ەستەرىڭىزگە سالا كەتەيىك, پاتسيەنتتەردىڭ تەگىن ءدارى-دارمەك الۋىن باقىلاۋ ءۇشىن دەنساۋلىق ساقتاۋ مينيسترلىگى, الەۋمەتتىك مەديتسينالىق ساقتاندىرۋ قورى, رەسپۋبليكالىق ەلەكتروندى دەنساۋلىق ساقتاۋ ورتالىعى جانە «سق-فارماتسيا» تۇراقتى نەگىزدە تەگىن ءدارى-دارمەك الاتىن پاتسيەنتتەرگە رەتسەپتىنىڭ ءنومىرى مەن ءدارى-دارمەك بەرۋ كۇنى تۋرالى اقپاراتى بار SMS-حابارلامالار تاراتادى. بۇدان باسقا, ءدارى-دارمەكپەن قامتاماسىز ەتۋدە ىركىلىس بولعان جاعدايدا ەمدەلۋشىلەر «سق-فارماتسيا» بايلانىس ورتالىعىنا تەگىن 1439 قىسقا ءنومىرى بويىنشا حابارلاسا الادى.
